Read Yucateco 1 Samuel 8 Bible Online

1 Samuel 8 - Yucateco bible

1 Samuel 8

¹Le ca j nuxibchaj Samuele' tu dzaj u paalalo'ob u beeto'ob u nuuquilo'ob caaj.

²U nojoch paal cu kaaba'intic Joel yéetel Abías u yíidzine', u méektáano'ob ca'ach Beerseba.

³Chéen ba'ale' le paalalo'obo' ma' cuxlajo'ob toj je'el bix u taataobe', tumen yanchaj kaakas dzíibolaj ti'ob, tu cha'ajo'ob u dza'abal ti'ob u bo'olal tuus, ma' tu beetajo'ob ba'ax tu beeli'.

⁴Tu much'ajuba'ob túun u nuuquilo'ob Israele' ca j bino'ob j t'aan tu yéetel Samuel tu caajil Ramae',

⁵u ti'al ca u ya'alo'ob ti'. Teche' dzo'oc a nuxibtal, cu dzo'ocole' a paalale' ma' toj u cuxtalo'ob je'el bix teche'; let o'olale' dzáa jun túul ajaw u ti'al méektáantico'on je'el bix u láak caajo'obe'.

⁶Samuele', j p'áat ma' qui' u yóol úuchic u ya'ala'al ti' ca u dzáa jun túul ajaw u ti'al méektáantico'obi', ca j payalchi'inaj ti' Yuumtzil;

⁷ba'ale' j núuca'ab ti' tumen Yuumtzil: Táan óolt je'el ba'alac bíin u káat ti' teech le caajo', tumen ma' teech cu kex óoltico'obi', teen cu kex óoltiqueno'ob u ti'al ma' in beetic in ajawil tu yóokolo'ob.

⁸Líikbal ti'ilie' kiin tin jóokeso'ob Egiptoe', tac bejela'e', xi'ic u bin u beetico'ob ti' teen le ba'ax cu beetico'ob ti' techo', tumen cu p'atiqueno'ob u ti'al u kultico'ob u yaanal kuob.

⁹Bey túuno' beet le ba'ax cu káatico'obo': ba'ale' a'al ti'ob jun puli' ba'axo'ob cu najmatic jun túul ajaw le bíin méektáantico'obo'.

¹⁰Samuel túune' tu ya'alaj ti' le caaj ba'ax tu ya'alaj Yuumtzil tu yo'olal le ajaw cu káatico'obo'.

¹¹Tu ya'alaj ti'ob: Je'el ba'axo'ob bíin úuchuc te'ex yéetel le ajaw bíin méektáantique'exo' bíin u t'aan a paalale'ex u ti'al u beeto'ob u aj ba'atelilo'ob, jujun túul ti'obe' bíin u dza'ob ti' bolano'ob, u láako'obe', u ti'al ca ba'atelnaco'ob u nat'majo'ob tzíimin, u láako'obe' u ti'al canantic le ajawo'.

¹²jujun túul ti'obe' bíin u dza'ob tu yóokol mil aj ba'atelo'ob, u láakobe' yóokol cincuenta. Dze'edzec ti' te'exe', bíin u dzáa pot lu'um u ti'al paakal yéetel u jocho'ob u cool, wa quex u ti'al u beeto'ob u nu'ucul u yúuchul ba'atel yéetel u nu'uculo'ob u bolanilo'ob u ba'atel.

¹³Bíin xan u x paalitzilt a x ch'upul paalale'ex, u ti'al qui'ibocquintic, u ti'al beetic u janal yéetel u ti'al u pakachtic u yo'och waaj.

¹⁴Bíin u ch'a'a u asab ma'alobilo'ob a lu'ume'ex yéetel u asab ma'alobilo'ob u x péet paachil a paakale'ex yéetel u x péet paachil a olivoex u ti'al u dzáa ti' u aj dzíibo'ob.

¹⁵bíin u lukes te'ex jun jaatz ti' u diez jaatzul a jejeláas janalbe'en neeko'ob, u x péet paachil a paakale'ex u ti'al u dzáa ti' u aj dzíibo'ob yéetel u nuuquil u aj meyajilo'ob u jalach naj.

¹⁶Yaan xan u lukesic ti' te'ex a j xiibil palitzile'ex, a x ch'upul palitzile'ex, bey xan u asab ma'alobil a wacaxe'ex, a burro'ex u ti'al u beet meyajo'ob u ti'al leti'.

¹⁷Bíin xan u ch'a'a u jun jaatz ti' u diez jaatzul a j tamane'ex, bey xan tac te'ex bíin meyajtic.

¹⁸Bey túuno' le kiin bíin tacpoolnaque'ex ti' Yuumtzil tu yo'olal le ajawo', Yuumtzile' ma' bíin u táan óolte'exi'.

¹⁹Ba'ale' le caajo' bey ma' tu dzaj u yóol u yu'ubic ba'ax tu ya'alaj Samuelo', tu núucaj: Ba'ax c káat ti' ca úuchuc beyo'. C káat ca dza'abac to'on jun túul ajaw,

²⁰tu yo'olal c p'áatal je'el bix u láak múuch' caajo'obo', bey xan tu yo'olal beyo' le ajawo' bíin u méektáanto'on yéetel bíin u nu'ucto'on u ti'al j ba'atel.

²¹Cu dzo'ocol u yu'ubic Samuel ba'ax cu ya'alic le caajo'. Tu ya'alaj ti' Yuumtzil.

²²Yuumtzile' tu núucaj: Táan óolt ba'ax cu káatico'obo', dzáa jun túul ajaw ti'ob. Samuel túune' tu ya'alaj ti' tuláacal le j israelitaobo' ca suunaco'ob tu caajalo'ob.