Read Yucateco 1 Samuel 9 Bible Online

1 Samuel 9 - Yucateco bible

1 Samuel 9

¹Ti' u ch'i'ibalo'ob Benjamine', yaan ca'ach jun túul j xiib cu kaaba'intic Cis, u paal Abdiel u yáabil Zeror, leti'e' u ca'a áabil ca'ach Becorat u paal Afia. Cis jun túul j xiib jach tzicbe'en,

²yaan ca'ach jun túul u j táanquelem paal jach qui'ichquelem, cu kaaba'intic Saúl. Mina'an u láak j israelil sen qui'ichquelem je'el bix leti'e', ti' u ca'analile', mix máac ch'actic u queléembal.

³Jun p'éel kiine', Cise', j sa'at u yalak x burraob. Leti' túune' tu ya'alaj ti' Saúl u paal: Líiksabae', ca xi'ique'ech a caxant le x burraobo'. Bis jun túul ti' le palitzilo'obo'.

⁴Saule', j bine' ca tu ch'actaj u pu'uquilo'ob Efraine' ca j máan tac tu tojil Salisa; ba'ale' ma' tu nactáantaj le x burraobo'. J máam xan tu tojil Salim bey xan tu lu'umilo'ob Benjamín, ba'ale' mix bey tu nactáantajo'obo'.

⁵Le ca j kuch tu tojil Sufe', Saule' tu ya'alaj ti' le palitzil láakintmailo': Co'ox suut, tumen in taatae' táan wal u tucultico'one', mix tu tuclic wal le x burraobo'.

⁶Le palitzilo' tu núucaj: Way ti' le caaja' yaan jun túul aj bóobat tzicbe'en tu táan tuláacal máac, tumen tuláacal ba'ax cu ya'alique' cu yúuchul. Co'ox tu yicnal tumen ma' xan ca u yáal to'on ba'ax bejil u najmal c bini'.

⁷Saule' tu núucaj: co'ox túun. Ba'ale', ¿ba'ax bíin c bis ti' le j máaco'? mix waaj yaanto'on ichil c sáabucan. Mix ba'al yaan u ti'al c dzáa ti' le aj bóobato'.

⁸Le palitzilo' tu núucaj: Yaan teen jun p'éel chan plata taakin. Leti' bíin c dzáa ti' le aj bóobat u ti'al u ya'alic to'on tu'ux bejil u najmal c bin.

⁹(Úuch ca'ache', wa yaan jun túul j israelita yaan ba'ax u najmal u káatic ti' Kue', cu ya'alic: Cone'ex c ila'a' le aj ilaj náayo'; tumen le máaxo'ob cu kaaba'intico'ob aj bóobato'obo' bejela'e', aj ilaj náayo'ob ca'ach u ya'ala'al ti'ob.)

¹⁰Saule' tu ya'alaj: ma'alob, Co'ox tu yicnal. Tu ca'a túulalo'ob j bino'ob tu caajal le aj bóobato',

¹¹ca'aliquil táan u bin u na'acalo'ob te j níix, tu tojil le caajo' tu núuptanto'ob dze'edzec j x ch'úupaalal cu bino'ob jóokesaj ja', ca tu káat chi'itajo'ob ti' leti'ob: ¿Tu'ux je'el u páajtal nactáantic le aj ilaj náayo'?

¹²Leti'obe' tu núucajo'ob: Je'ele' ba'axten ma', ba'ale chan yaan u bin a xíimbale'ex. Séebcunt a bine'ex, dzo'oc u taal way j caaje' tumen bejela'a' yaan u kiinbesa'al le quíimsbil ba'alche' te j quili'ich najo'.

¹³Le quéen kuchque'ex te'elo', caxte'ex ca'aliquil ma' xi'ic te j quili'ich naj u ti'al janalo'. Le máaco'obo' ma' bíin janaco'ob ca'aliquil ma' kuchuqui', tumen yaan u qui' t'antic le quíimsbil ba'alche'o', cu dzo'ocole' cu janal le máaxo'ob t'ana'ano'ob j janalo'. Let o'olale', xeene'ex jun puli', tumen ti' le súutuquila', je'el a nuptáantique'exe'.

¹⁴Leti'obe' j bino'ob te j caajo'. Tu séeblaquil kuchico'ob, Samuele' táan ca'ach u jóokol u binbal dzictáan ti' le ti'ob, tumen táan u bin te j quili'ich najo'.

¹⁵Jun p'éel kiin u bin u kuchul Saule', Yuumtzil tu dzáa u yojéelt Samuel le t'aana':

¹⁶Walquil sáamala', bíin in túuchi'it ti' teech jun túul j xiib cu taal tu lu'umil Benjamín, leti'e' u najmal a jun páaycuntic u ti'al u méektáant in caajal Israel. Leti' bíin toquic yáanal u kab le j filisteobo', tumen dzo'oc in ch'a'ic óotzilil ti' in caajal cu kuchul tac tin wicnal u yokolo'ob.

¹⁷P'elac ila'abic Saúl tumen Samuele', Yuumtzile' tu ya'alaj ti': Je'el le j xiib tin wa'alaj techo'. Leti' bíin méektáantic in caajal.

¹⁸Le ca j kucho'ob tu jool le caajo', Saule' tu nadzajubáa ti' Samuele' ca tu ya'alaj ti': Quin káat óoltic ti' teech ca a beet utz a wa'alic ti' teen tu'ux yaan u yotoch le aj ilaj náayo'.

¹⁹Samuele', tu núucaj: teen le aj ilaj náayo'. Na'aquen táanil ti' teen te j quili'ich najo', ca janaquech tin wéetel bejela'e'. Ja'atzcab sáamale', bíin in wa'al ti' teech je'el ba'alac bíin a káat ti' tene', cu dzo'ocole' je'el u páajtal a bine'.

²⁰Ba'ale' tu yo'olal le x burraob dzo'oc u máan óox p'éel kiin sa'atco'obo', ma' a tucultico'ob tumen dzo'oc u caxta'alo'ob. Ba'ale', tuláacal ba'al asab dzíibolta'an Israele' a ti'al teech yéetel a láaktzilo'ob.

²¹Saule' tu núucaj: ¡Tene' ti' in taal tu ch'i'ibalo'ob Benjamín u asab chichanil tuláacal le u múuch' caajilo'ob u láaktzililo'ob Israele'! Cu dzo'ocole' in láaktzilo'obe', leti'ob u asab chichanil ti' tuláacal u múuch' cajtalil u láaktzililo'ob Benjamín. ¿Ba'axten ca wa'alic ti' teen tuláacal le ba'alo'obo?

²²Samuel túune' tu ch'a'aj Saúl yéetel u palitzile', ca tu bisajo'ob te j jáacalo', ca tu dzaj ti'ob jun p'éel noj cúuchil ichil le máaxo'ob yano'obo', yaan ca'ach míin treinta tu pa'ate'ilo'ob.

²³Cu dzo'ocole' Samuele' tu ya'alaj ti' le j meen janalo': Taas u janalil le bak tin kubaj ti' teech tin wa'alaj ca a jun páaycunto'.

²⁴Tu séeblaquile', le j meen janalo' tu jóokesaj jun p'éel túulis muuk ooque', ca tu dzaj tu táan Saúl. Samuele' tu ya'alajti': Je'el yaan ta táan le ba'ax jun páaycuta'an a ti'alo'. Ch'a'a u ti'al a jaanté, tumen tin jun páaycuntaj a ti'al ti'ilie' kiin tin páayab t'antaj in caajala'. Saúl yéetel Samuele' jano'ob ti'ilie' kiino'.

²⁵Le ca j éemo'ob ti' le quili'ich naj u ti'al u binbalo'ob te j caajo', máakanta'ab u nu'ucul u yúuchul wenel tu yóokol le naj u ti'al Saulo',

²⁶Saule' j chilaji'. Tu láak kiine' Samuele' tu t'anaj Saúl tu yóokol le najo' ca tu ya'alaj ti': Líiken, xeen tu'ux ca bin. Saule' j líikí. Cu dzo'ocole' j jóok leti' yéetel Samuel te j bejo,

²⁷le ca j éemo'ob tu paach le caajo', Samuele' tu ya'alaj ti' Saúl: A'al ti' a palitzil ca xi'ic táanil, teche' p'áaten jun súutuc, tumen yaan in wa'alic teech ba'ax dzo'oc u ya'alic ti' teen Ku.