Read Yupik Genesis 1 Bible Online

Genesis 1 - Yupik bible

Genesis 1

¹Nutem etellrani Agayutem ellarpak nuna-llu piliaqellruak.

²Nuna-llu eluciinani, imaunani-llu. Tan'gerem mer'em-llu caqumaluku. Agayutem-llu anernera pekluni mer'em qaingakun.

³Tua-llu Agayun alerquiguq, “Tanqigtangli” —tanqik-llu piurrluni.

⁴Agayutem-llu tanqik tangrramiu assikaa. Elliin-llu avtak tanqik tan'geq-llu.

⁵Aciraa-llu tanqik “Ernermek” tan'geq-llu “Unugmek.” Atakuq pelluggaartelluku unuakurtuq —tua-i tauna erenret ciuqliat.

⁶Tuamta-llu Agayun qanertuq, “Qilakutartangli tumarnermek mer'ek akuliik, avvlukek malruurrlukek mer'ek” —tuaten-llu ellirluni. Agayutem-llu piliaqaa qilakutaq mer'ek avvlukek, aipaa qilakutam acianun, aipaa-llu quliinun.

⁸Pagna-llu qilakutaq piliaqellni aciraa “Qilagmek.” Atakuq pelluggaartelluku unuakurtuq —waniwa erenrem aipaa.

⁹Tuamta-llu Agayun qanertuq, “Mer'et quyurrlit mer'em aciani ataucimun kinertellria-llu alairli” —tuaten-llu ellirluni.

¹⁰Kinertellria-llu aciraa “Nunamek.” Mer'et-llu quyungqalriit acirluki “Imarpignek.” Agayutem-llu tangrraa assirluni.

¹¹Tua-llu Agayun qanertuq, “Nuna naugili, ayuqenrilngurnek naugiluni, naunrarnek naucetaarkalegnek, napanek atsangtulinek atsait qumilegnek naucetaarkameggnek, ayuqmeggnek naugiarkauluteng nunami” —tuaten-llu ellirluni.

¹²Nuna-llu naugiuq naunrarnek, napanek atsangtulinek naucetaarkalegnek ayuqmeggnek naugiarkauluteng. Agayutem-llu tangrraa assirluni.

¹³Atakuq pelluggaartelluku unuakurtuq —waniwa erenret pingayuat.

¹⁴Tuamta-llu Agayun qanertuq, “Qilak tanqigcetellrianek pitangli avegluku erneq unugmek. Nallunailkutaukilit uksumun, kiagmun, ernernun, allrakunun, yuut-llu ukvemeggnun cayaraita nallaitnun.

¹⁵Tanqiulit pagaani, nuna tanqigmek ciqinqerluku.” Tuaten-llu ellirluni.

¹⁶Agayun-llu piliuq malrugnek angtuagnek tanqiignek. Akerta piliaqaa tanqiusqelluku ernermun, iraluq-llu tanqiusqelluku unugmun. Agyat-llu cali piliaqluki.

¹⁷Tanqiusqelluku aipaa ernermun, aipaa-llu unugmun,

¹⁸avvlukek tan'geq tanqik-llu. Agayutem tangrraa assirluni.

¹⁹Atakuq pelluggaartelluku unuakurtuq —waniwa erenret cetamiit.

²⁰Tuamta-llu Agayun alerquiguq, “Mer'et pitanglit amllernek ayuqenrilngurnek unguvalrianek, ella-llu yaqulegtangli.”

²¹Agayun piliuq angelrianek unguvalrianek allanek-llu imarpigmiutarnek, imarpik imangevkarluku ayuqenrilngurnek unguvalrianek. Agayun-llu piliuq ayuqenrilngurnek yaqulegnek. Agayutem tangrraa assirluni.

²²Atawaqaasqai qanerluni, “Irnikici amlleriinarluci imarpiit imirluki, yaqulget-llu amllerilit nunam qaingani.”

²³Atakuq pelluggaartelluku unuakurtuq —waniwa erenret tallimiit.

²⁴Tuamta-llu Agayun qanertuq, “Nunam qaingani pitangli ayuqenrilngurnek unguvalrianek: kuluvagnek yuilqurmiutarnek-llu, angelrianek mikellrianek-llu ungungssinek” —tuaten-llu ellirluni.

²⁵Agayutem tamalkuita piliaqai, tangrrai-llu assirluteng.

²⁶Cali Agayun qanertuq, “Yugnek pililta wangkucicetun ayuqellrianek. Ataniumaciqait neqet mermi, yaqulget, allat-llu ungungssit kuluviit yuilqurmiutaat-llu, mikellriit angelriit-llu.”

²⁷Agayun piliuq yugnek ellmitun ayuqelrianek arnauluki angutnguluki-llu elliin piliaqellrui.

²⁸Agayutem-llu atawaqaasqai qanrulluki, “Irnikici amlleriinarluci nuna yirluku atanirturluku-llu. Ataniumakiciki-llu unguvalriari nunam, ellam, imarpiim-llu.”

²⁹Tua-llu Agayutem yuut qanrutai, “Tangerrluku cikiramci naucetaarkalegnek naunrarnek, napanek atsangtulinek, atsait naucetaarkameggnek qumilegnek neq'akesqelluki.

³⁰Tau͡gaam nunam ungungssii mikellriit angelriit-llu yaqulgi-llu cikiranka neqkaitnek makunek nunam naunrainek cuyalegnek” —tuaten-llu ellirluni.

³¹Agayutem tangrrai piliallni tamalkuita assikluki-llu cakneq. Atakuq pelluggaartelluku unuakurtuq —waniwa erenret arvinelgat.