Read Yupik Genesis 13 Bible Online

Genesis 13 - Yupik bible

Genesis 13

¹Abram-aaq ayagtuq Egypt-aamek nuliani akluni tamalkuita malikluki. Lot-aam-llu maliggluku Negeb-aamun,

²Abram-aaq tukuupiallruuq tukuuterluni qusnginek, kuluvagnek, cali-llu suulutaanek qerrirlinek-llu.

³Ayagtuq-llu Negeb-aamek Bethel-aaq tekilluku, pelatekaqerraallerminun akuliignun Bethel-aankuk Ai-aq-llu,

⁴ekuavilillerminun. Tuani Abram-aam piicagvikaa ATANEQ.

⁵Lot-aaq, Abram-aam malikellra, nakmiin ungungssiutengqertuq qusnginek, qusngirngalngurnek, kuluvagnek-llu, cali ilaluni pisterluni-llu.

⁶Tua-i amllerrameng tamakut ungungssiutekek maramek nervigkaiturluteng, ataucimi-wa uitallerkaak piviinani.

⁷Nakukutengluteng-llu Abram-aam Lot-aam-llu ungungssiutegkenka qaunqestait. Tamatum nalliini Perizzite-at Canaanite-at-llu cali tamaani nunami uitallruut.

⁸Tua-llu Abram-aam Lot-aaq qanrutaa, “Nakukullunuk uitayunaitaakuk qusngiliurtetuumamegnuk, tungayakngamegnuk.

⁹Nuna avatemegni tangrru. Avvluten wangnek ayakina piyullerpenun. Wiinga piyulqenrilkevnun ayagniartua.”

¹⁰Lot-aam-llu kiarcami tangrraa Jordan-aam kuignayua mel'irluni tamarmi naucetaarviatun ATANREM[13] ayuqluni-llu cali Egypt-aatun Zoar-am tungiini. Tuaten ayuqellruuq ATANREM piunrirpailgakek Sodom-aankuk Gomorrah-llu.

¹¹Tua-i Lot-aam Jordan-aam avatii cucukaa piknaluku ayagluni-llu calaratmun; tua-i tuaten pilutek uniyutellruuk.

¹²Abram-aaq Canaan-aami uitallruuq, Lot-aaq-llu nunaliluni nunarpiit akuliitni kuignayugmi. Uitaluni-llu Sodom-aam yaaqsinrilkiini.

¹³Sodom-aam yui arenqiatut assiilnguq cakneq aturluku inglulirluku-llu ATANEQ.

¹⁴Lot-aaq ayiin ATANREM Abram-aaq qanrutaa, “Tuaken nangerngallerpenek nacessgu yaaqvaq tamalkuan.

¹⁵Tangerqen nuna tamalkuan cikiutekciqaqa elpenun kinguverpenun-llu, pikesqelluku akwarpak.

¹⁶Kinguveten-llu amllertarivkarciqanka nunam urraatun. Kia imum nunam urraa naaqsugngakuniu kinguveten-llu naaqsugngayarai.

¹⁷Piyualuten paqesgu tamana nuna, cikiutekciqngamku elpenun.”

¹⁸Tua-i Abram-aaq uitallerminek nugtartuq uitavigkiurluni-llu yaaqsinrilkiitni napat kenciknarqelriit Mamre-mi. Tauna Hebron-aam nuniini uitauq, tuani-llu ekuavililuni ATANERMUN.