Read Yupik Genesis 14 Bible Online

Genesis 14 - Yupik bible

Genesis 14

¹Angayuqat cetaman, Amraphel-aaq Babylonia-mek, Arioch-aq Ellasar-amek, Chedorlaomer-aaq Elam-aamek, Tidal-aaq-llu Goiim-aamek,

²anguyallruut angayuqat allat talliman inglukluki ukuuluteng: Bera Sodom-aarmiu, Birsha Gomorrah-rmiu, Shinab-aq Admah-rmiu, Shemeber-aaq Zeboiim-armiu, Bela-m-llu angayuqra.

³Ukut angayuqat talliman iliksagutellruut anguyagteteng-llu quyurtellruit Siddim-aam kuignayuanun, maa-i aprumalriamun Dead Sea-mek.

⁴Chedorlaomer-aamek ataniurtengqellruyaaqluteng allrakuni qula malrugnek cipluku, tau͡gaam qulen pingayuatni allrakut tauna inglukengluku.

⁵Akimiarunritariitni allrakut Chedorlaomer-aaq ilini-llu anguyagtet tekitellruut cirlakluki-llu Rephaim-aat Ashteroth Karnaim-aami, Zuzim-aat Ham-ami, Emim-aat marami Kiriathaim-aami,

⁶Horite-at-llu ingriini Edom-aam, maliggluki Elparan-aaq tekilluku uitalria nunam kinertellriim engeliini.

⁷Kingutmun-llu ataam uterrluteng Kadesh-aamun, (tamatum nalliini Enmishpat-aamek ap'lallruat). Teguaqellruit nuniit tamalkuan Amalekite-at, cirlakluki-llu Amorite-at Hazazon Tamar-ami uitalriit.

⁸Tua-llu angayuqrita Sodom-aam Gomorrah-m, Admah-m, Zeboiim-aam, Bela-m-llu quyurtait anguyagteteng callugluteng-llu Siddim-aam kuignayuani,

⁹inglukluki angayuqri Elam-aam, Goiim-am, Babylonia-m, Ellasar-am-llu. Angayuqat talliman ingluluteng angayuqanek cetamanek.

¹⁰Kuignayuani Siddim-aam elanret amllertut taarnek imarluteng. Angayuqaagket Sodom-aam Gomorrah-m-llu qimangnaqsaaquk, tau͡gaam tamakunun taarnun igtuk; taukut-llu allat pingayun angayuqat qimagluteng ingrinun.

¹¹Taukut-llu cetaman angayuqat avurtut akluitnek Sodom-aarmiut Gomorrah-rmiut-llu, neqkautaitnek tuaten, nutaan-llu ayagluteng.

¹²Lot-aaq-llu cali teguat qetunraa Abram-aam anelgutiin ayaulluku-llu aklutuumaan.

¹³Tua-llu iliita anagillrata, ullagluku qanemcitaa Abram-aaq Hebrew-q. Abram-aaq uitaluni yaaqsinrilkiitni napat kenciknarqelriit, Mamre-m Amorite-am napautain. Mamre anelgutkaak Eschol-ankuk Aner-aaq-llu, Abram-aam iliklukek.

¹⁴Abram-aam-llu niicamiu nurr'ani tegulliniatgu yun'i angutet callugyaramun elitnaurumalriit tamalkuita quyurcetai. Amllertaluteng yuinaat akimiaq, akimiaq pingayunek cipluku (318), kingunrirturait-llu taukut angayuqat cetaman Dan-am nuniin engeliinun.

¹⁵Tuani-llu avgai anguyagten̄i quyungqaaqluki. Curugait-llu taukut unugmi, cirlakluki-llu. Kingunrirturait-llu engelekluku Hobah-q Damascus-aam neglirnerani,

¹⁶tegullrit-llu cat tamalkuita ut'rulluki. Cali-llu ut'rulluku nurr'ani Lot-aaq, aklui-llu tamalkuita, arnat-llu, allat-llu yuut tegullrit ilakluki.

¹⁷Abram-aaq utercan anguyallerminek cirlakraarluki Chedorlaomer-aaq allat-llu angayuqat, Sodom-aam angayuqran pairrsaagaa Shaveh-m kuignayuani (cali aterpagcimalartuq atanrem kuignayuanek).

¹⁸Cali Melchizedek-aaq Salem-aam angayuqra agayulirten͞gunrulria ATANERMUN Quyinrulriamun, taituq kelipamek wine-amek-llu Abram-aamun,

¹⁹atawaqercetaa-llu qanerluni, “ATANREM Quyinrulriim piliaqestiin nunam qiliim-llu atawaqertelliu Abram-aaq!

²⁰Nanraumali Agayun Quyinrulria aviutestellren cirlakevkarluki inglukesteten!” Abram-aam-llu elliivikaa Melchizedek-aaq cat tamalkuita ut'rutellmi qulngurutaitnek.

²¹Sodom-aam-llu angayuqran Abram-aaq qanrutaa, “Yuut tailluki wangnun, aklut tegulten elpet pikekiki.”

²²Tau͡gaam Abram-aam qanrutaa Sodom-aam angayuqra, “Akqellruaqa ATANEQ Agayun Quyinrulria, piliaqestii qiliim nunam-llu,

²³tegusngaunii yualukarraungraan, aluilitam-llu cingiqengraaku, wall'u allamek camek elpet pivnek, waten qanernayukluten, ‘Wiinga Abram-aaq tukuurcetellruaqa.’

²⁴Wiinga camek pikamnek tegusngaitua. Malillma tau͡gaam atullrit akurturciqanka. Cat avgumakilit ukunun ikayurteklemnun, Aner-aamun, Eshcol-aamun, Mamre-mun-llu.”