Read Yupik Genesis 16 Bible Online

Genesis 16 - Yupik bible

Genesis 16

¹Abram-aaq Sarai-akun cali irniangeksaituq. Tau͡gaam Sarai-a Egypt-aarmiumek kevgangqellruuq nasaurlurmek aterluni Hagar-amek.

²Sarai-a qanertuq Abram-aamun, “ATANREM irniangevkaqsaitaanga, inartellguteksuavgu-llu kevgaqa nasaurluq, irniniartuq pikamnek.” Abram-aaq-llu Sarai-am qanellratun piuq.

³Abram-aam allrakuni qulni Canaan-aami uitallran kinguani, Sarai-am Hagar-aq Egypt-aarmiu nuliqsagucetaa Abram-aamun.

⁴Abram-aam-llu qingiraa Hagar-aq. Qingaucini-llu elpekngamiu ellminek pingakuq, qumlik'ngarrluku-llu Sarai-a.

⁵Tua-llu Sarai-am Abram-aaq qanrutaa, “Elpenun atauq Hagar-am qumlikillra wangnek. Wiinga elpenun tunellruaqa, qingaucini-llu elpekraanerminek qumlikaanga. ATANREM cuqeskiliu nalirpuk alarucia, elpet wall'u wiinga!”

⁶Abram-aaq kiuguq, “Elpet kevgan ataniumaan, umyuan aturluku piyullerpegun pikiu.” Tua-i Sarai-am mulngakenriqercani Hagar-aq ayakartuq.

⁷ATANREM-llu an'gilaan pairtaa Hagar-aq nunami kinertellriami mer'em ulvelriim nuniini, tumyarami ayalriami tungiinun Shur-am,

⁸qanerluni-llu, “Hagar-aaq, pistiini Sarai-am, naken taisit? Natmun-llu ayagcit?” Kiuguq, “Qimagtua kevgiuqengamnek.”

⁹An'gilaan ATANREM qanrutaa, “Uterten ataam, maligtaquurautniartuten elliinun.”

¹⁰Tua-llu cali qanertuq, “Kinguvengevkarciqamken amllerem ugaani naaqumasciigalngurnek.

¹¹Qetunrangciquten, acirciqan-llu Ishmael-aamek,[14] tua-i-wa ATANREM niitellruaten nanikualuten kaigallerpeni.

¹²Tau͡gaam qetunraan unguvallermini yuungnaqciquq ciulvagtun yuilqurmiutartun; inglukciqai yuut tamalkuita, tamarmeng-llu yuut ellii inglukarkauluku. Tungayaminek ellminek allakarluni yuuciquq.”

¹³Hagar-aq-llu ellminek aptuq, “Ilumun-qaa wiinga Agayun tangrraarluku unguvalua qanengssaksugngaqata'rqa?” Tua-i ATANEQ qalarutestellni aterpagtaa, “Agayun Tangtulria.”

¹⁴Tauna pitekluku yuut tamana elakaq aterpagtelaraat, “Elakaa Unguvalriim Tangertem̄a.” Tauna uitaluni akuliigni Kadesh-aankuk Bered-aaq-llu.

¹⁵Hagar-aq-llu irniuq qetunrangluni; Abram-aam-llu acirluku Ishmael-aamek.

¹⁶Abram-aaq allrakungellruuq yuinarnek cetamanek (80) Ishmael-aaq yuurtellrani.