Read Yupik Genesis 17 Bible Online

Genesis 17 - Yupik bible

Genesis 17

¹Abram-aaq yuinarnek tallimaunrita'arnek (99) allrakungeqerluku ATANREM alairvikaa qanrulluku-llu, “Wiinga Agayutnguunga Artuqailnguq, niisngakia canganarqutaunak-llu yuukina.

²Akqun una piurtaqa aipaqluten, kinguveten amllerivkarciqanka cakneq-llu yugyangevkarluten.”

³Abram-aam-llu ciktaarvikngani Agayutem qanrutaa,

⁴“Akqun una piurciiqaqa elpet aipaqluten: akqamken ciuliaqerkaurtelluten amllernun atanruvignun.

⁵Atren-llu Abram-aarungairutuq, tau͡gaam Abraham-aarurrluni,[15] tua-i-wa atanruvignun amllernun ciuliaqsagucecamken.

⁶Irnialingevkarciqamken; Atanruviit angayuqat-llu elpenek nauvkarciqanka. Amllerciqngameng kinguliaten atanruviurciiqut.

⁷“Akqutka piuvkarciqaqa elpenun kinguverpenun-llu tekitarkanun, nangyuilnguuluku. Agayutkevkarlua elpenun kinguverpenun-llu.

⁸Cikirciqamken elpet kinguveten-llu nunanek uitavikeqalallerpenek. Canaan-aaq tamalkuan cikiutekaqa elpecen̄un, nangyuilngurmek pikesqelluku, wiinga-llu Agayutkeciqerpecia.”

⁹Agayun-llu qanertuq Abraham-aamun, “Elpet tau͡gaam akqutka aturarkaugan, elpenek-llu kinguvalriit tamarmeng.

¹⁰Waniwa akqun aturarkan, taqumalria wangkugnun kinguverpenun-llu: Tamarmeng angutet elpecen̄i nuugiumaarkaugut.

¹¹Nuugiumaciquci amiq nuugani kepluku, nallunailkutnguvkarluku akqutmun taqumalriamun wangnun elpenun-llu.

¹²Pingayunlegnek ernengelria tan'gaurluq nuugiumaarkauguq; angutet-llu tamarmeng yuullgutkelriani, ayuqluku pista yuurtelleq nevcen̄i, wall'u kiputellerci allanernek.

¹³Tamarmeng nuugiumaarkaugut nallunairluku akqutma piugarkaucia akwarpak.

¹⁴Angun nuugiumanrilkuni ancimaciquq yum'inek; akqun atunrilamiu.”

¹⁵Agayun qanertuq Abraham-aamun, “Sarai-a-llu nulian Sarai-amek aterpagtenrirluku; wak'nirnek atra Sarah-uciquq.[16]

¹⁶Atawaqerceciiqaqa, cali-llu qetunrangevkarluten elliikun; aanakciqaat amlleret atanruviit; yuut atanerkait elliikun yuurciiqut.”

¹⁷Abraham-aaq-llu put'uq nunamun, tau͡gaam temciyugtuq umyuamikun qanerluni, “Angun-qaa irniangyugngauq yuinarnek tallimanek (100) allrakungelria? Sarah-llu-qaa irniyugngaciquq allrakungluni yuinaat cetaman qulnek cipluku (90)?”

¹⁸Abraham-aaq-llu qanertuq Agayutmun, “Assinruyartuq Ishmael-aakun akqutkellren piciurceskuvgu.”

¹⁹Tau͡gaam Agayutem qanrutaa, “Qang'a, Sarah irniciquq qetunrarkarpenek, acirarkaugan-llu Isaac-aamek.[17] Akqutkelqa elliikun piciurceciiqaqa nangyuilnguuluku elliinun kinguvrinun-llu.

²⁰Niitaqa kaigaten Ishmael-aaq kaigalluku. Ellii-llu atawaqerceciiqaqa irnialingevkarluku, cakneq yugyangevkarciqaqa; atakeciqaat qula malruk atanerruat, atanruvigpaurceciiqaqa-llu.

²¹Tau͡gaam akqutka piurceciiqaqa Isaac-aakun, Sarah-m irniarkaakun waten pitarikan allamiku.”

²²Agayutem qalarutenriamiu Abraham-aaq unitaa.

²³Taumi ernermi Abraham-aam Ishmael-aaq, tamalkuita-llu angutet ellmini uitalriit, pisten͞gungraata kiputellni nuugirai.

²⁴Abraham-aaq allrakungluni yuinarnek cetamanek qulnek cipluku (90) nuugiumallruuq.

²⁵Qetunraa-llu Ishmael-aaq allrakungluni qula pingayunek cipluku nuugiumallruluni.

²⁶Ernermi ataucimi nuugiumalutek,

²⁷ilalutek Abraham-aam pistainek.