Read Yupik Genesis 18 Bible Online

Genesis 18 - Yupik bible

Genesis 18

¹ATANREM-llu alairvikaa Abraham-aaq Mamre-m napain caniatni uitallrani, aqumgaluni pelatekami amiigani, erenrem puqlanillran nalliini.

²Ciugcami tangertuq pingayunek angutnek nangerngalrianek. Tangrramiki aqvaqurluni pairrsaagai, cikluni-llu nunamun.

³Qanertuq, “Eneka kituryaqunaciu arulairpek'naci; wiinga wantua kevgiurnaluci.

⁴Mermek taiciiqua it'gavci eruutekaatnek; mernuinercirniartuci-llu uum napam aciani.

⁵Neqkarpecen̄ek-llu taiciiqamci nerumarikuvci ayagniartuci. Quyavkararpecia arulairviklua, taumek kevgiurnaamci.” Taukut qanertut, “Tua-i qanllerpetun pii.”

⁶Abraham-aaq-llu cukangnaqluni pelatekamun agngami Sarah qanrutaa, “Cukangnaqluten mukaamek negtaara kelipayaginiartuten.”

⁷Abraham-aaq-llu cukangnaqluni ungungssiutminun piami kuluvayagarmek kemkegcilriamek tegulluni pistet iliitnun tunaa, taum-llu cali cukangnaqluni kenirluku tauna.

⁸Neqkat-llu uptellni agutai ciuqerratnun-llu elliluki. Elliin-llu kevgiurai napam aciani nerellratni.

⁹Tua-llu taukut aptaat, “Nauwa-mi nulian Sarah?” Elliin kiugai, “Pelatekami uitauq.”

¹⁰Iliit-llu qanertuq, “Pinritevkenii up'nerkaqan ataam uterciiqua elpenun, Sarah-llu nulian irniangeciquq qetunrangluni.” Sarah-m-llu Abraham-aam tunuani niicugnii pelatekam amiiganek.

¹¹Waniwa Abraham-aankuk Sarah-llu ak'allaurrlutek, Sarah-llu aglernanrillruluni.

¹²Sarah-llu niicetevkenani engelartuq, qanerluni, “Ak'allaurrlunuk-qaa uika-llu qingarciqua?”

¹³ATANREM Abraham-aaq qanrutaa, “Ciin Sarah engelarta qanerluni-llu, ‘Ilumun-qaa ak'allaurrlua irniciqua?’

¹⁴ATANERMI-qaa caperrnarqelriartangqertuq? Tuani apertuumalriami up'nerkami ataam taiciqua elpenun, Sarah-llu qetunrangarkauluni.”

¹⁵Tau͡gaam Sarah meci'irtuq alingami qanerluni, “Engelaqsaitua.” Elliin kiugaa, “Qang'a, engelallruuten.”

¹⁶Taukut-llu tuaken ayagtut, Sodom-aam-llu igvaumallranun ayagluteng kanavet tangvagaat, Abraham-aam-llu maligtai tumkaatnek apertuutnaluki.

¹⁷ATANEQ-llu qanertuq, “Aassaqusngaitaqa Abraham-aaq waniwa piqataq'ngamnek.

¹⁸Kinguvri angelriarurciiqut pinirluteng atanruvigpaurrluteng, elliikun-llu atawaqerceciiqanka tamalkuita atanruviit.

¹⁹Ellii cucukellruaqa alerquusqellukq irniari kinguvri-llu niisngasqellua, ellualria-llu pitalqeggsaraq-llu aturlukek. Tuaten pikata akqutkelqa tamalkuan elliinun aturciqaqa.”

²⁰ATANREM-llu Abraham-aaq qanrutaa, “Nepliutekagket cakneq Sodom-aaq Gomorrah-llu, arcaqalriamek-llu assiilngurmek aturnilukek.

²¹Ullagluki tangerrsarturciqanka ilumun nepliutekumacirmegcetun ayuquciat; piciunrilkan nallunrirciqaqa.”

²²Tua-i taukuk angutek tuaken ayagtuk Sodom-aam tungiinun; cali tau͡gaam Abraham-aaq nangengqauq ATANREM ciuqerrani.

²³Abraham-aam malkanirluku qanrutaa, “Ilumun-qaa piunrirciqaten ellualriit elluanrilngurnun tapquulluki?

²⁴Yugtangqerqan yuinaak malruk qulnek cipluku (50) ellualrianek nunarpagmi uitalrianek; tua-i-qaa piunrirciqan, taukut yuinaak malruk qulnek cipluku (50) catkevkenaki?

²⁵Tuaten piyunaitqapigtuten, tuqulluki ellualriit elluanrilngurnun tapquulluki, ellualriit aturtelluki elluanrilnguut pitaciluki! Tuaten piyunaitaaten. Cuqcistii-qaa nunam tamarmi elluarrluni pingaituq?”

²⁶ATANEQ-llu qanertuq, “Nalaquskuma yuinaak malruk qulnek cipluku (50) ellualrianek yugnek Sodom-aami, piunrirngaitaqa taukut pitekluki.”

²⁷Abraham-aaq kiuguq, “Tangerrluku wangnek cinglua ATANEQ qalaruskeka, caunritkacagang'e'rma.

²⁸Ellualriit tallimanek ikgellrukata, yuinaak malruk tallimanek cipluku (45) ellualriartangqerqan, cali-qaa nunarpak piunrirciqan taukut talliman ilangarutait catkevkenaki?” ATANREM kiugaa, “Piunrirngaitaqa ellualriartangqerqan yuinaak malruk tallimanek cipluku (45).”

²⁹Abraham-aam qanrutenqigtaa, “Yuinaagnek-mi malrugnek (40) ellualriartangqerqan?” ATANREM kiugaa, “Ellualriit yuinaak malruk (40) pitekluki piunrirngaitaqa.”

³⁰Abraham-aaq qanertuq, “Qannge'rma cali qenqerrucaqunii. Yuinaq-mi qulnek cipluku (30) ellualriartangqerqan?” ATANREM kiugaa, “Piunrirngaitaqa yuinaq qulnek cipluku (30) ellualrianek nalaquskuma.”

³¹Abraham-aaq qanertuq, “Tangerrluku wangnek cinglua qalarutaqa ATANEQ. Nalaquskuvet-mi yuinarnek (20) ellualrianek tuani?” Kiugaa, “Yuinaat ellualriit pitekluki piunrirngaitaqa.”

³²Abraham-aaq qanertuq, “ATANEQ qenqerrucaqunii, ataucirqumek cali qanernaurtua. Qulnek-mi ellualrianek pitangqerqan?” ATANREM kiugaa, “Qulen ellualriit pitekluki piunrirngaitaqa.”

³³ATANEQ-llu ayagtuq qalarutenriamiu Abraham-aaq; Abraham-aaq-llu nunaminun uterrluni.