Read Yupik Genesis 19 Bible Online

Genesis 19 - Yupik bible

Genesis 19

¹Taukuk an'gilak malruk Sodom-aamun tekituk atakumi; Lot-aaq-llu aqumgaluni Sodom-aam iteryarami. Lot-aam tangrramikek nangerrluni pairrsaagak, cikluni-llu ciuqerragnun.

²Lot-aaq qanertuq, “Ukuuk, allanruyarturtek enemni qavartarniartutek, it'gatek-llu erurluki; makcara'arlutek unuaqu ayagniartutek.” Taukuk qanertuk, “Qang'a, unugiciqukuk tumyarani.”

³Tau͡gaam Lot-aam cakneq aguagutak; tua-i allanruyarturtuk iterlutek-llu eniinun; neqkiurak-llu kelipiluni quuleciryarailngurmek, taukuk-llu nerlutek.

⁴Tau͡gaam inarpailgata, tamaq'apigmeng Sodom-aam angutain ak'allaurtellriit ayagyuat-llu avatairaat ena;

⁵qayagaurluku-llu Lot-aaq, “Nauwa imkuk angutek ullagtellregken? Anuskek wangkutnun akusrarutekniagput.”

⁶Lot-aaq-llu an'uq ikirtuqaq-llu palulluku.

⁷Qanerluni-llu, “Ilamni ukuut, tuaten assiitellriamek piyaqunaci!

⁸Paningqertua malrugnek angutem agtuqsailkegkenek; anutnaugka elpeci piyugtacirpecetun piniagci; ukuk tau͡gaam angutek qaillun piyaqunacikek uqisngiignek enemni.”

⁹Taukut tau͡gaam qanertut, “Aviten!” Cali-llu qanerluteng, “Una angun ak'anun maani uitaarkaunrilnge'rmi, ak'a wangkutni cuqcisten͞gurtellriatun ayuquq! Elkegnun pillerput elpenun arcaqanruluku piciqerput.” Tua-i Lot-aaq cingaat, ciutmurrluteng-llu amiik navegnaluku.

¹⁰Tau͡gaam taukuk enem iluanelnguuk yaggvikluku Lot-aaq itercetaak enemun amiik-llu palulluku.

¹¹Cikmircetakek-llu angutet tamalkuita amiigem elatiini uitalriit, taukut-llu taqsuqcirluteng ellmeggnek amiik caavtaaryaaqaat yuarluku.

¹²Taukuk angutek Lot-aamun qanertuk, “Allamek-qaa maani ilaituten? Nengaugpenek, qetunrarpenek, panigpenek. Ilangqerquvet nunarpagni anuski maaken,

¹³piunriqatararpuk una nunarpak, nepliutngullrat yuin anagut'ngengan ciuqerrani ATANREM, elliin ayagcetellruakuk piunriisqelluku.”

¹⁴Tua-i Lot-aam ullaglukek qanrutak uikautekek paniigmi, “Cukamek ayagtek waken nunanek. ATANREM piunriqataraa nunarpak.” Tau͡gaam taukuk umyuartequk Lot-aaq picingssagyukluku.

¹⁵Unuakumi erqaarallrani an'gilak kiikirturaak Lot-aaq qanerlutek, “Nangerrluten malikluki nulian, paniigken-llu maanelnguuk ayagci, tapqulluci piunriryuartuci nunarpak piunriumakan.”

¹⁶Lot-aaq pamailcaarluni uitaqertuq; tau͡gaam ATANREM takumcukngamiki taukut unataitgun teguluki anutai nunat-llu elatiitnun piluki.

¹⁷Tua-llu an'gilam aipaa qanertuq, “Qimagci tuquyuartuci; kingyaryaqunci arulairyaqunaci-llu kuignayuum iluanun. Qimagci qeminun, piunriumayuartuci.”

¹⁸Tau͡gaam Lot-aam kiugaa, “Qang'a, tuaten pivkaryaqunakut.

¹⁹Quyavkararpenga anirturlua, tau͡gaam qimagciigatua qeminun, yaaqsissiyaagata ayainanemni picurlagnarqellriamun angunayuklua, wiinga-llu tuqulua.

²⁰Nunatangqertuq yaani canimelngurnek qimagviksunaqluteng, nunat-llu angevkenateng. Tuavet qimagcessnga unguvaniartua, tangrraten nunarpaunritut.”

²¹Taum kiugaa, “Piyullerpetun tua-i pikina, nunat taukut qanrutkelten piunrinritnianka.

²²Cukamek ayii qimagluten tuavet. Qaillun pisciigatua tekitnatkarpenun tuavet.” Lot-aam nunarrauniaki aciraat Zoar-amek.[18]

²³Akerta piqaarallruuq Lot-aaq tekitellrani Zoar-amun.

²⁴ATANREM-llu ellallircetaa Sodom-aamun Gomorrah-mun-llu, kenermek quluuramek-llu,

²⁵nunarpiit tamaanelnguut piunrirluki, kuignayuk tamalkuan, yuit-llu nunarpiit, cat-llu naumalriit tamalkuita tamaani.

²⁶Lot-aam tau͡gaam nulirra kingyartuq, taryuurrluni-llu nangerngacirmitun.

²⁷Taum unuaquani unuakuarmi Abraham-aaq patangnaqluni ayagtuq ATANEQ-llu nangerngallermegnun.

²⁸Kiarrluni-llu tungiignun Sodom-aankuk Gomorrah-llu, tangerrluku-llu kuignayuk tamalkuan. Tangrraa-llu aruvak kaminiarpiim aruviitun ayuqluni.

²⁹Tua-i ATANREM piunrillermini nunarpiit kuignayugmi Abraham-aaq umyuaqluku Lot-aaq qimagcetellrua tamaaken nunarpagnek uitavillrinek.

³⁰Lot-aaq alingami Zoar-ami uitallerkaminek ayallruuq paniigni-llu qeminun. Tamaani-llu uitaluni qiurem nayugneran iluani paniigminek ilaluni.

³¹Alqaan kinguqlini qanrutaa, “Atavuk ak'allaurtuq angucetaunani-llu uikamegnek maani nunami, irniangyalriakuk.

³²Atavuk taangarcetnaurpuk, inarrlunuk-llu canianun kinguverkangniartukuk elliikun.”

³³Taum atakuani atasek wine-amek mer'avkaraak, alqaan-llu itervikluku canianun inarrluni. Atiin-llu nallua inartellra maktellra-llu.

³⁴Unuaquan alqaan kinguqlini qanrutaa, “Unuk wiinga atama canianun inartellruunga; ataku cali mer'avkarluku elpet canianun inareskina kinguverkangniartukuk atamegnegun.”

³⁵Taumi cali atakumi atasek mer'avkaraak; kinguqliq-llu canianun inarrluni; atiin-llu nallua inartellra maktellra-llu.

³⁶Tuaten pilutek Lot-aam paniik qingircetellruuk atamegnun.

³⁷Alqaa angutmek irnillruuq acirluku-llu Moab-amek.[19] Tauna man'a tekilluku Moabite-at ciuliaqluku.

³⁸Kinguqlia-llu cali irniuq angutmek acirluku-llu Benammi-mek.[20] Tauna Ammonite-at ciuliaqaat man'a tekilluku.