Read Yupik Genesis 2 Bible Online

Genesis 2 - Yupik bible

Genesis 2

¹Qilak nuna-llu qaqituk, tamaanelnguut-llu tamarmeng.

²Erenret malrunelgatni Agayutem caliani qaqicimariamiki arulairtuq caliaminek.

³Agayutem-llu erneq tauna caliaminek arulaillni atawaqercetaa allakarluku-llu ernerni piunrurrluku. Tua-i-wa Agayutem tuani ernermi qaqicamiki piliaqellni.

⁴Waten waniwa ellarpak piliaqumallruuq. ATANREM [1] Agayutem piliaqellermini nuna qilak-llu,

⁵naulriartangqeqsaitellruuq naucetaarkat-llu naugaaqsaunateng, tua-i-wa ATANREM Agayutem ellallirceteksailaku nauceciiyurtetaunani-llu.

⁶Tau͡gaam meq ulvelartuq nunam acianek nuna mirluku.

⁷ATANEQ Agayun urr'amek tegulluni nunamek[2] piliuq yugmek; cupluku-llu qengagken'gun unguvanarqelriamek anernermek, yuk-llu anerteqelriaruluni yuurrluni.

⁸ATANEQ Agayun naucetaarviliuq Eden-aami calaralirnermi; tuavet-llu elliluku angun piliallni.

⁹ATANREM Agayutem nauvkarai tangssunarqelriit ayuqenrilnguut napat, atsangtulit neryunarqelrianek. Cali-llu naucetaarviim qukaani napatangqertuq yugnek unguvavkariyugngalriamek akwarpak, aipangqerrluni-llu napamek nallunrirceciyugngalriamek assiilngurmek assilriamek-llu.

¹⁰Kuigem qurrlulriim Eden-aami mertelaraa naucetaarvik. Tuaken kuik avtuq cetamaurrluni.

¹¹Ciuqliq atengqertuq Pishon-aamek qiptaarluni Havilah-m nuniin avatiinun suulutaartalegmun.

¹²Tamatum-llu suulutaara assilriaruuq. Teggalquqegtaarangqerrluni-llu, cali-llu nurnalrianek tepkegcautnek.

¹³Kuigem aipaa Gihon-aamek atengqertuq. Cush-am nuniikun tamalkuan qurrlurluni.

¹⁴Pingayuat kuiget atengqertuq Tigris-aamek, Assyria-m calaralirnerani uitaluni. Cetamiit-llu kuiget atengqerrluni Euphrates-aamek.

¹⁵ATANREM Agayutem elkartaa angun Eden-aam naucetaarvianun naungigcarluku aulukesqelluku.

¹⁶Agayutem qanrutaa, “Piyugtacirpetun neryugngauten napat atsaitnek naucetaarviim iluani.

¹⁷Tau͡gaam napamek nallunrirnarqellriamek assilriamek assiilngurmek-llu neryaqunak. Nerkuvet tuani ernermi nerrlerpeni tuquciquten.”

¹⁸ATANEQ Agayun qanertuq, “Assinrituq angutem kiimetlerkaa; aiparkaanek piliciqua ikayurtekniaraa.”

¹⁹Tua-i ATANREM Agayutem nunamek tegutaqluni piliaqai tamalkuita ungungssit yaqulget-llu. Angutmun-llu ayaulluki paqnayugluni camek acillerkaitnek. Tuani-llu acillrinek atengluteng.

²⁰Taum angutem acirai ungungssit yaqulget-llu tamalkuita; tau͡gaam iliitnek nalaqutenrituq angutmun ikayurkarnilriamek.

²¹ATANREM-llu Agayutem angun qavarcetaa mamtulriamek, qavallrani-llu tegulluni tulimain iliitnek, mamlluku-llu uitavillra.

²²Tulimaq-llu aturluku arnamek piliuq, iluvaulluku-llu angutmun.

²³Angun qanertuq, “Nutaan wiinga ayuqengua, piliaqumalriamek enemnek kememnek-llu. ‘Arnamek’ aterpagcimaciquq, angutmek tegumiimi.”[3]

²⁴Man'a pitekluku angutem unitarkaugak angayuqaagni nepingavikluku-llu nuliani, kememegnegun atauciurrlutek.

²⁵Tamarmek angun nuliani-llu matangqang'e'rmek kasnguyunrituk.