Read Yupik Genesis 20 Bible Online

Genesis 20 - Yupik bible

Genesis 20

¹Mamre-mek Abraham-aaq ayagtuq Canaan-aam ungalalirneranun uitaluni-llu akuliigni Kadesh-aankuk Shur-aq-llu. Tamatum kinguakun, Gerar-aami uitaqallermini,

²qanellruluni nuliani Sarah nayagaqniluku. Taumek angayuqam Abimelech-aam, atanirturilriim Gerar-ami aqvavkallrukii Sarah, taitelluku ellminun.

³Tau͡gaam Agayutem ullagaa Abimelech-aaq unugmi qavangurturtelluku, qanrulluku-llu, “Tuquarkauguten, tauna arnaq tegullren uingqerran.”

⁴Tau͡gaam Abimelech-aam agtuqsailamiu qanertuq, “ATANEQ, tuquciciquten-qaa yugnek camek pinarqutkailengraata?

⁵Abraham-aaq-llu tungaunani qanellrulria nayagaqniluku. Sarah-llu qanerluni anngaqniluku. Assiilngurmek umyuarteqevkenii nalluamku uingqerrucia tuaten pillrulrianga.”

⁶Agayutem qanrutaa qavanguakun, “Aa-ang, wiinga nallunritaqa assiilngurmek umyuarteqevkenak tuaten pillrucin, wiinga-llu assiilngircetenritamken wangnun; agturcetevkenaku tauna arnaq.

⁷Kitaki arnaq uinganun utercessgu; prophet-aaruuq piicauciiqaaten unguvasqelluten. Tau͡gaam utercetenrilkuvgu pinritevkenak tuquciquten ilaten-llu tamarmeng.”

⁸Abimelech-aaq unuakuarmi makcara'arluni qayagaurai pisten̄i, qanrulluki-llu makunek. Pistai-llu alingeqapiggluteng.

⁹Abimelech-aam-llu Abraham-aaq taisqaa qanrulluku-llu, “Ciin waten pisikut? Camek elpenun assiilngillruama tuc'eciu man'a assiilnguq wangkutnun? Yuum piarkaqenrilkiinek wangnun piuten.

¹⁰Qaillun umyuarteqluten waten pisit?”

¹¹Abraham-aam kiugaa, “Waten pillruunga umyuarteqngama, ‘Ukut yuut qigcikenritaat Agayun. Tuqutarkaugaatnga nuliaqa tegunaluku.’

¹²Ilumun-wa nayagaqkeka, atama panikngaku, allamek tau͡gaam aanaluni, wiinga-llu nuliqsagulluku.

¹³Agayutem-llu ayagcecanga atama eniinek qanrutellruaqa, ‘Wangnun piciucin nasvaggu. Nunanun tekitaqamta qanlaqina wangnun nayagaqniluten.’”

¹⁴Tua-i Abimelech-aam utercetaa Sarah Abraham-aamun, cali-llu taum nalliini cikirluku Abraham-aaq qusnginek, kuluvagnek angucalunek, pisten̄ek-llu angutnek arnanek-llu.

¹⁵Abimelech-aaq-llu qanertuq, “Tangerrluku nunauteka ciuqerpeni tangrran. Nani piyullerpeni uitakina.”

¹⁶Sarah-mun-llu qanertuq, “Anngaan cikiraqa tiissitsaanek qerrirlinek akinek, pinarqutailucin nallunritesqelluku ilavnun; camek pinarqutaitellren tuaggun asguranairumauq.”

¹⁷Abraham-aam nulirran Sarah-m tuaten pimallra pitekluku ATANREM arnat Abimelech-aam atanruviani qingarciigatevkallrui. Taumek Abraham-aam piicautellrukii Abimelech-aaq canrirtelluku-llu. Nulirra-llu arnat-llu cali pistai ataam qingaryugngarivkarluki.