Read Yupik Genesis 21 Bible Online

Genesis 21 - Yupik bible

Genesis 21

¹ATANREM atawaqercetaa Sarah akqellrucimitun.

²Qingartuq qetunrangluni-llu Abraham-aakun. Tamaani Abraham-aaq ak'allaurrluni. Tan'gaurluq-llu yuurtuq tuani ATANREM apertullrani yuurciiqniluku.

³Abraham-aam aciraa Isaac-aamek.

⁴Pingayunlegnek ernengan Isaac-aaq Abraham-aam nuugiraa, Agayutem alerqullruciatun.

⁵Abraham-aaq allrakungellruuq yuinarnek tallimanek (100) Isaac-aaq yuurtellrani.

⁶Sarah-llu qanerluni, “Agayutem taitaanga angnimek engelallerkamnek-llu.[21] Tamarmeng niitestain engelallgucirciqaatnga.”

⁷Kingunertaa-llu, “Kia-kiq qanrutellruyartau Abraham-aaq Sarah mikelngurmek aamarciciqniluku? Tau͡gken wiinga irnilua qetunrarkaanek ak'allaurtenrakun.”

⁸Mikelnguq-llu angliuq, neryugngarian-llu Abraham-aaq angelriamek nerevkariuq.

⁹Erenret iliitni Sarah-m tangrraa Ishmael-aaq, Hagar-am Egypt-aarmium qetunraa Abraham-aakun, aquillrani aipaqluku qetunrani Isaac-aaq.

¹⁰Sarah-m tangrramikek Abraham-aaq qanrutaa, “Ayagcessgu una pista nasaurluq qetunraa-llu. Qetunraa uum arnam avgucunaituq tukuutvet ilaitnek Isaac-aam paitarkainek.”

¹¹Abraham-aam umyugaa nall'artenrituq, tua-i-wa Ishmael-aaq-llu elliin qetunraqngamiu.

¹²Tau͡gaam Agayutem qanrutaa, “Umyuarniurutkenrilgu tan'gaurluq pisten-llu Hagar-aaq. Sarah-m qanruciatun pii, Isaac-aakun kinguverkangciqngavet akqellrucimtun.

¹³Irnialingevkarciqaqa qetunraa pistevvet atanruvigpaurtesqelluki, elpet-llu-wa qetunraqngavgu.”

¹⁴Unuaquan-llu unuakuarmi Abraham-aam Hagar-aq neqnek caqutmek-llu mermek imalegmek atmirluku, tan'gaurluq malikluku ayagcetaa. Arnaq-llu ayagtuq calligtaarluni-llu Beersheba-m yuilqurtaani.

¹⁵Meriucamek-llu mikelnguq unitaa napam acianun,

¹⁶aqumluni-llu yuinarnek tallimanek (100) yaaltanek yaaqsigtalriamun. Umyuamikun qanertuq, “Irniaqa tuqullrani tangvagciigataqa.” Tuani-llu aqumgainanermini arnaq qiaguq.

¹⁷Agayutem-llu niitaa mikelnguq qiallrani. Qilagmek-llu ATANREM an'gilaa qanertuq Hagar-amun, “Hagar-aaq cam umyuassuugarcetaten? Alingenrilu Agayutem niitaa mikelnguq qiallrani.

¹⁸Nangerrluten teguyarturru nepairturluku-llu. Angelria atanruvik nauvkarciqaqa kinguvrikun.”

¹⁹Agayutem-llu iigni uicecakek tangrraa elakaq ullagluku-llu caqutni imiraa mermek tan'gaurluq-llu mertelluku.

²⁰Agayutem-llu nayuraa tan'gaurluq anglillrani, uitallruuq-llu yuilquani Paran-aam, pissulangami-llu piculiuluni.

²¹Aaniin-llu Egypt-aarmiumek nulirturtelluku.

²²Taum nalliini Abimelech-aam Phicol-aq maligtellrua anguyagtem̄i angayuqrat, qanerluni-llu Abraham-aamun, “Agayutem nayuraaten callerpeni tamalkuan.

²³Taumek akqikina wani ciuqerrani Agayutem piciugarkauluten wangnun irniamnun-llu wall'u kinguvemnun. Wiinga elpenun piciullruunga taumek akqi elpet-llu wangnun piciugarkauluten mat'umun-llu nunamun uitavigpenun.”

²⁴Abraham-aaq qanertuq, “Pisqucirpetun akqiunga.”

²⁵Abraham-aaq qanemyuugallrani Abimelech-aamun elakaq pitekluku Abimelech-aam pistain tegullrat,

²⁶Abimelech-aaq qanertuq, “Nalluaqa kitumun piciitaqa, qanrutellrunritarpenga. Wiinga nutaan niitua tamatumek.”

²⁷Abraham-aam-llu qusngit kuluviit-llu ilait cikiutekai Abimelech-aamun, atunem-llu umyuallguteklutek akqutlilutek.

²⁸Abraham-aaq-llu allakariuq malrunlegnek qusngiyagarnek katngautminek.

²⁹Abimelech-aam-llu aptaa, “Ciin waten pisit?”

³⁰Abraham-aam kiugaa, “Ciuniurki ukut qusngiyagaat. Waten piluten elpenek nallunairniartuten nallunrilucirpenek wangnun elakiaqucianek uum elakam.”

³¹Taumek tauna atengqertuq Beersheba,[22] tua-i-wa tuani taukuk atunem akqut'lillruagnek.

³²Tuaten pirraartellukek Beersheba-mi, Abimelech-aankuk Phicol-aq-llu utertuk Philistia-mun.

³³Abraham-aaq-llu nauceciiguq napamek tamarisk-aamek Beersheba-mi, agayuluni-llu ATANERMUN, Nangyuilngurmun Agayutmun.

³⁴Abraham-aaq-llu uitallruuq Philistia-mi ak'anun.