Read Yupik Genesis 22 Bible Online

Genesis 22 - Yupik bible

Genesis 22

¹Kinguqvaarni Agayutem naspaanaluku Abraham-aaq qayagauraa, “Abraham!” Abraham-aam-llu kiugaa, “Aa-ang, waniwa!”

²Agayun qanertuq, “Ayausgu qetunraan kiingan qetunraan Isaac-aaq, kenkeken cakneq, nunamun Moriah-mun tuavet ingrim qainganun aperturarkamnun, tuani elliitekniaran wangnun.”

³Unuaquan unuakuarmi Abraham-aaq eqiurtuq ekuagissuutekaminek, atmiulluki-llu ciulvagmun. Isaac-aaq-llu piluku pistegnek-llu malrugnek malilirlutek ayagtut Agayutem qanrutkellranun.

⁴Erenret-llu pingayuatni Abraham-aam tangrraa tauna yaaqvaarnek.

⁵Pistek-llu qanrutak, “Wantaurtek ciulvak nayurluku. Qetunraqa-llu wangkuk yaavet ayaglunuk agayuyartuqatartukuk. Agayurraarlunuk ataam taiciqukuk.”

⁶Abraham-aam muriit ekuagissuutekat tegumiaqevkarai Isaac-aamun, elliin-llu nuussiq kangipluut-llu kumarcissuutekatek tegumiaqluki ayagtuk.

⁷Isaac-aam atani pia, “Aataa!” Atiin-llu kiugaa, “Aa-ang, niitamken!” Isaac-aaq qanertuq, “Muragkangqertuten kenermek-llu kumarcissuutekaatnek, nauwa-mi qusngiyagaq ekuagarkaq?”

⁸Abraham-aam kiugaa, “Agayutem pikangqerceciiqaakuk.” Tua-i ayagtur'tuk.

⁹Tekicamek Agayutem qanrutkellranun Abraham-aaq ekuaviliuq muriit-llu elliluki qaingatnun. Qillerqelluku-llu qetunrani Isaac-aaq, elliluku-llu ekuavigmun muriit qaingatnun.

¹⁰Abraham-aam-llu nuussiq tegua tuqutnaluku qetunrani.

¹¹Tau͡gaam ATANREM an'gilaan qayagauraa qilagmek, “Abraham, Abraham!” Ellii kiuguq, “Aa-ang, waniwa!”

¹²An'gilam-llu qanrutaa, “Akngircaqunaku qetunraan. Waniwa nallunriraqa niisngalriarucin qigcikluku-llu Agayun, qunukutenrilavnga kiingan qetunrarpenek.”

¹³Abraham-aaq-llu kiarcami tangertuq qusngimek nagingaluni naparrluggni cirunregminun. Ullagluku-llu tegua ekuagiluni-llu taumek qetunrani pivkenaku.

¹⁴Abraham-aam aciraa tauna, “ATANEQ Pikangqercecilria.” Mat'um cali nalliini yuut qanraqluteng, “ATANREM ingriani pikangqercecilartuq.”

¹⁵ATANREM an'gilaan qayagaura Abraham-aaq qilagmek aipiriluni,

¹⁶qanerluni, “Akqiunga wiinga atemkun —ATANEQ wani qalartuq— angelriamek atawaqerceciiqamken, waten piavet kiingan qetunraan qunukevkenaku wangnun.

¹⁷Akqamken kinguverkarpenek qiliim agyaitun amllertalrianek, imarpiim-llu cen̄iini qau͡gyatun amllertalrianek. Kinguverpet cirlak'larciqait ingluteng.

¹⁸Tamarmeng atanruviit yuita kaigavikeciqaatnga atawaqercecesqelluteng kinguveten atawaqercetellrucimtun. Makut tamarmeng tuaten ellirciqut alerquuteka niitellruavgu.”

¹⁹Abraham-aaq-llu utertuq pistem̄inun, malikluteng-llu utertut Beersheba-mun. Tuavet-llu Abraham-aaq elgartuq.

²⁰Makut kinguatni iliita qanrutellrua Abraham-aaq, “Milcah anelgutvet Nahor-am nulirra irniangellruuq:

²¹Uz-aq ciuqliq, Buz-aq anelgutii, Kemuel-aaq Aram atii,

²²Chesed-aaq, Hazo, Pildash, Jidlaph, Bethuel-aaq-llu.”

²³Bethuel-aaq Rebecca-m atakaa. Ukut pingayunlegen Milcah-m irniaqai Nachor-amek uiluni Abraham-aam anelgutiinek.

²⁴Cali-llu arnautii Nahor-am irniangellruluni Tebah-mek, Gaham-aamek, Tahash-aamek, Maacah-mek-llu.