Read Yupik Genesis 24 Bible Online

Genesis 24 - Yupik bible

Genesis 24

¹Abraham-aaq ak'allaurtuq ATANREM-llu atawaqercecimaluku callra tamalkuan.

²Abraham-aam pistem̄i angutngurtenrat, aklumi tamalkuita qaunqestiit, qanrutaa, “Unateten elliki acianun mecangqama[23] akqiluten-llu.

³Akqisqamken ATANREM atrakun Agayutiin qiliim nunam-llu, cucukiarkauvkenak maaken uitavimnek Canaan-aarmiumek nulirkaanek qetunrama.

⁴Uterrluten tau͡gaam nunamun yuurrvillemnun nulirkaanek qetunraqa Isaac-aaq piniaran tungelquma iliitnek.”

⁵Pista kiuguq, “Qaillun-mi piciqsia nasaurluum maligcuumiilkanga maavet nunamun. Ayagteskilaku-qaa qetunraan kingunerpenun?”

⁶Abraham-aaq kiuguq, “Angurrluk qetunraqa tamaavet utercecaqunaku!

⁷ATANREM, qiliim Agayutiin, ayautestellma atama nuniinek yuurrvillemnek, qanrutestellma akeqlua, ‘Kinguverpenun nuna man'a cikiutekciqaqa.’ An'gilani ciunerpegun ayagceciiqaa, nutaan elpet qetunrama nulirkaanek piniartuten.

⁸Tau͡gaam arnam maligcuumiilkaten, akqillerpenek angicimaciquten; qetunraqa tau͡gaam angurrluk tamaavet ayaucaqunaku.”

⁹Pistem unatni Abraham-aam mecangqerran acianun elliluki akqiuq tuaten piarkauluni.

¹⁰Pista tauna qulnek ungungssinek qulugnelegnek piami ucilirai assinkacagarnek cikiutnek atanemi ayautesqellrinek; ayagtuq Mesopotamia-mun nunarpagmun Nahor-am uitavianun.

¹¹Tekicami ungungssit qulugnelget aqumevkarai elakam canianun nunarpiim elatiini, atakuyartumi arnat mertaryaraata nalliini.

¹²Piicagtuq, “ATANEQ, Agayutiini angayuqama Abraham-aam, piluaqerceskia unuamek akquten piciurtelluku angayuqamnun.

¹³Wani uitaunga elakam caniani, nunarpagmek arnat mertaryaraatni.

¹⁴Neviarcar waten qanruskeka, ‘Mertarcuuten atrarteqerr'u merniartua.’ Waten-llu qanqan, ‘Mer'a, ungungssiuteten-llu merr'iciiqanka,’ taungukili cucukellren nulirqesqelluku Isaac-aamun. Tuaten pikan wiinga nallunritarkaugaqa akquten Abraham-aamun atuucirpenek.”

¹⁵Piicallni iquklipailgaku Rebecca tekituq assigtaminek mertarcuutmek tusegmiarluni. Una panikluku Bethuel-aam, qetunraan Nahor-am, Abraham-aam anelgutiin. Tauna-llu Nahor-aq nuliarluni Milcah-mek.

¹⁶Kenegnarluni nasaurluq angutem agtuqsailkii. Atrarluni elakamun imiraa assigtani, ataam-llu mayurluni.

¹⁷Pistem aqvaqurluni pairrsaagaa qanrulluku-llu, “Merr'isnga mertarcuutevnek.”

¹⁸Arnaq qanertuq, “Mer'a,” egmian-llu tusminek atrarrluku mertarcuutni nayumiqaluku mercetaa.

¹⁹Mer'umarian-llu qanertuq, “Ungungssiten-llu merceciiqanka meqsuirnatkaatnun.”

²⁰Egmianun mervini kuvaa ungungssit merviatnun ataam-llu elakamun uterrluni mer'utni imiryarturluku. Tuaten mercetai ungungssiutai tamalkuita.

²¹Angutem murilkuraraa nepaunani, nallunriryugluni ilumun ATANERMUN piluaqercessucianek tamaavet ayallni.

²²Ungungssit men'ermek taqngata angun tegutuq kulutmek akitulriamek suulutaamek, angelriignek-llu suulutaagnek tallirirluku.

²³Qanerluni-llu, “Qanrusnga kia panikaten. Atavet-qaa enii pivingqertuq uitavigkamten̄ek?”

²⁴Taum-llu qanrutaa, “Ataka Bethuel-aaruuq, qetunraak Nahor-am Milkah-m-llu.

²⁵Can'gucirtukut ungungssit-llu neqkaitnek, qavarvigkartarluni-llu.”

²⁶Abraham-aam pistiin ciisqumiggluni piicagvikaa ATANEQ,

²⁷qanerluni, “Nanraumali ATANEQ, Agayutii angayuqama Abraham-aam, akqutni elliinun atuaku, ciuliqagglua-llu eniinun angayuqama tungelqurrin.”

²⁸Nasaurluq-llu aqvaqurluni utertuq aanami uitavianun, qanemcilluku-llu makunek tamalkuitnek.

²⁹Rebecca anelgutengqertuq tan'gaurlurmek aterluni Laban-aamek. Tauna aqvaqurluni ayagtuq elakamun Abraham-aam pistiin uitallranun.

³⁰Laban-aam tangrramiki kulun tallirat-llu nayagarmi talligkeni, niicamiu-llu Rebecca-m qanellra, “Tuaten angutem qanrutaanga,” Abraham-aam pistii ullagaa nangengqalria ungungssit caniatni elakam nuniini.

³¹Qanerluni-llu, “Maligesnga enemten̄un. Elpet ATANREM atawaqaasqellruaten. Ciin nangengqasit ellami? Uptellruunga uitavigkarpenek, ungungssiten-llu uitavigkangqertut.”

³²Tua-i angun itertuq enemun, Laban-aam-llu atmairai ungungssit neqkaitnek-llu cikirluki, mermek-llu tailluni Abraham-aam, pistiin, maliin-llu it'gaita eruutekaatnek.

³³Neqkat taicatki angun qanertuq, “Nerngaitua qanerkaqa qanrutekvailemku.” Laban-aam-llu pia, “Kitaki qanra.”

³⁴Angutem qanrutaa, “Abraham-aam pistekaanga.

³⁵ATANREM cakneq atawaqercecimaa angayuqaqa tukuurtelluku, cikirluku katngagnek, qusnginek, qusngirngalngurnek, kuluvagnek, qerrirlinek suulutaanek, angutnek arnanek-llu pisten̄ek, ungungssinek qulugnelegnek, ciulvagnek-llu.

³⁶Sarah angayuqama nulirra qetunrangellruuq ak'allaurrluni, angayuqama-llu cani tamalkuita taumun qetunraminun piksagucetellrui.

³⁷Angayuqama-llu akqivkallruanga pisqutni niisngaarkauvkarluku qanerluni, ‘Cucukiyaqunak nasaurlurmek maaken Canaan-aam nuniinek.

³⁸Tau͡gaam ayakina atama yuinun tungayamnun, qetunrama nulirkaanek aqvalluten.’

³⁹Aptaqa-llu, ‘Qaillun-mi piciqsia nasaurluq qessakan maligcuumiinii?’

⁴⁰Kiugaanga, ‘ATANREM kesianek niisngak'ngama an'gilani ayagceciiqaa maliggluten piluaqertelluten. Qetunraqa nulirkaanek piciqan ilamnek atama yuin iliitnek.

⁴¹Tungayamnun tekiskuvet, ellaita-llu nasaurluq qunukekatgu, tuaten tau͡gaam pillratgun akqutkellerpenek wangnun angicimaarkauguten.’

⁴²“Unuamek elakamun tekicama piicallruunga, ‘ATANEQ, Agayutiini kevgiuqengama Abraham-aam, piluaqercessnga mat'umek calillemni.

⁴³Waniwa nangengqaunga elakam caniani; nasaurluq mertalria waten qanrutarkaqa, “Mervigpenek merriarteqernga,”

⁴⁴elliin-llu qanruskanga waten, “Mer'a, ungungssiuteten-llu merr'iciiqanka,” taunguvkaqiu cucukellren nulirqesqelluku kevgiuqengama qetunraanun.’

⁴⁵Qanenrirpailegma nepaunii piicallemni, Rebecca taiguq mertarcuutellgirluni, atrarluni-llu elakamun mertarluni. Qanrutaqa, ‘Merr'itqernga.’

⁴⁶Egmian mertarcuutni atrarrluku tusminek qanertuq, ‘Mer'a, ungungssiten-llu merr'iciiqanka.’ Tua-i mertua, mer'umariama-llu ungungssinka mercetai.

⁴⁷Tua-llu aptaqa, ‘Kituuga aatan?’ Kiugaanga, ‘Ataka Bethuel-aaruuq, qetunraak Nahor-aankuk Milkah-llu.’ Tua-i qengagken'gun cigviliraqa tallirirluku-llu.

⁴⁸Ciklua-llu quyavikaqa ATANEQ, nanrarluku ATANEQ Agayutii kevgiuqengama Abraham-aam, ciuliqagcanga tungelqurranun, tuani-llu nataqullua panianek, Abraham-aam qetunraan nulirkaanek.

⁴⁹Tua-llu Piciulriakun piarkaukuvet kevgiuqengamnun, qanrusnga; wall'u piarkaunrilkuvet qanrullua, qaillun picirkaqa nallunrirniarqa.”

⁵⁰Laban-aankuk Bethuel-aaq-llu kiuguk, “Man'a ATANERMEK kingunengqerran wangkuk picirkamek taqutnarqenritaakuk.

⁵¹Waniwa Rebecca, teguluku ayii nuliqsagutelluku angayuqerpet qetunraanun, ATANREM qanellruciatun.”

⁵²Man'a Abraham-aam pistiin niicamiu cikluni ATANEQ nanraraa.

⁵³Anciuq-llu aturanek, qerrirlinek, suulutaanek-llu tangnircautnek, Rebecca-mun-llu tunluki. Akitulrianek-llu cikiutnek cikirlukek anelgutii aanii-llu.

⁵⁴Abraham-aam pistii ilani-llu ner'ut merluteng-llu, tuani-llu unugpak uitaluteng. Unuaquan makcameng qanertuq, “Utercessnga angayuqamnun.”

⁵⁵Tau͡gaam Rebecca-m anelgutiin aaniin-llu qanrutai, “Nasaurluq maantauraqarraarceciu nitilimi wall'u qulni ernerni, nutaan ayagniartuq.”

⁵⁶Ellii tau͡gaam qanertuq, “Ayagnaciariinarcetenrilkut, ATANREM maavet ayalqa atawaqercecaku; ayagcessnga uterrnaurtua angayuqamnun.”

⁵⁷Elkek kiuguk, “Nasaurluq taivkarluku apnaurput.”

⁵⁸Tua-i Rebecca taisqaat apluku-llu, “Una-qaa angun maligcugan?” Tauna kiuguq, “Aa-ang, maligciiqaqa.”

⁵⁹Tua-i Rebecca ayagcetaat pisten͞gullermek ak'a ellmeggni malilirluku, maligutevkarluku Abraham-aam pistiinun, elliin-llu cali pistainun.

⁶⁰Ellaita-llu Rebecca atawaqercetaat waten qanerluteng, “Elpet nayagamten̄i aanaureskina yugugarnun naaquciilngurnun! Kinguverpet piksagutelaqilitki nunarpait inglukestem̄eng!”

⁶¹Nutaan Rebecca pisten̄i-llu ayagtut ungungssini qulugnelegni ekumaluteng, maliggluku Abraham-aam pistii ilai-llu.

⁶²Tamaani Isaac-aaq taillruluni yuilqurranun apqiita “Elakaa Unguvalriim Tangertem̄a” uitaluni-llu ungalalirnerani Canaan-aam.

⁶³Atakuarmi Isaac-aaq an'uq umyuangcarluni piyualuni yuilqumi. Kiartellermini-llu tangertuq ungungssinek qulugnelegnek agiirtellrianek.

⁶⁴Rebecca-m-llu Isaac-aaq tangrramiu atrartuq ungungssim qainganek,

⁶⁵apluku-llu Abraham-aam pistii, “Kituuga angun tailria pairrsaagluta?” Kiugaa, “Angayuqaqaqa.” Tua-i pelatuuminek Rebecca-m kegginani patua.

⁶⁶Pistem-llu qanemcitaa Isaac-aaq tamalkuitnek pillerminek.

⁶⁷Isaac-aam-llu Rebecca pelatekamun itrutaa, aanami Sarah-m uitalallranun, elliin-llu nuliqsagulluku. Isaac-aam Rebecca kenkaa, qarucimaluni-llu elliikun aanaminek yuarnayullerminek.