Read Yupik Genesis 25 Bible Online

Genesis 25 - Yupik bible

Genesis 25

¹Abraham-aaq nulirturtuq allamek, aterluni Keturah-mek.

²Elliikun yung'ellruuq Zimram, Jokshan, Medan, Midian, Ishbak, Shuah-wa.

³Jokshan-aaq atakaak Sheba-nkuk Dedan-aaq-llu, kinguvri-llu Dedan-aam ukuugut Asshurim-aat, Letushim-aat, Leummim-aat-llu.

⁴Qetunrai Midian-aam waniwa: Ephah, Epher, Hanoch, Abida, Eldaah-llu. Ukut tamalkuita kinguveqai Keturah-m.

⁵Abraham-aam cani tamalkuita unitellrui Isaac-aamun.

⁶Tau͡gaam cali unguvaluni, allat qetunrani allani nuliamini, cikiutnek cikillrui ayagtelluki-llu calaralirnermun, Isaac-aam nuniincetevkenaki.

⁷Abraham-aaq tuqullruuq ak'allaurrluni, allrakungluni yuinaat pingayunlegen akimiarmek cipluku (175).

⁹Qetunraagken Isaac-aam Ishmael-aam-llu tungmagtaak Machpelah-m Qerranqurranun, Mamre-m calaralirnerani, Ephron-aam Zohar-am qetunraan Hittite-am pikellranun.

¹⁰Abraham-aam nuna kiputellruluku Hittite-anek. Tamarmek Abraham-aaq nuliani-llu Sarah tungmagcimauk tuavet.

¹¹Abraham-aam tuqullran kinguani Agayutem atawaqercetaa Isaac-aaq, uitallruuq yaaqsinrilkiini apqiita “Elakaa Unguvalriim Tangertem̄a.”

¹²Waniwa kinguvri Ishmael-aam, Hagar-am Egypt-aarmium Sarah-m pistiin irniaran Abraham-aakun.

¹³Igausngaluteng yuurtellermeggni tungliqutacirmegcetun: Nebaioth, Kedar, Abdeel, Mibsam,

¹⁴Mishma, Dumah, Massa,

¹⁵Hadad, Tema, Jetur, Naphish, Kedemah-llu.

¹⁶Makut ciuliaqait qula malrugnek cipluku kinguveqellriit. Atrit-llu aciusngaluteng nunaitnun uitaviggaitnun-llu.

¹⁷Ishmael-aaq yuinarnek arvinlegnek akimiaq malrugnek cipluku (137) allrakungluni tuqullruuq.

¹⁸Kinguvri Ishmael-aam uitallruut nunami akuliigni Havilah-m Shur-am-llu, calaralirnerani Egypt-aam tungiini Assyria-m. Ilalirpek'naki uitallruut kinguvri Abraham-aam.

¹⁹Una qanemciuguq Isaac-aamek, qetunraanek Abraham-aam.

²⁰Isaac-aaq yuinaagnek malrugnek (40) allrakungellruuq Rebecca-mek nuliangellermini, panianek Bethuel-aam Aramean-aam Mesopotamia-mek Laban-aam Bethuel-aaq nayagaqluku.

²¹Rebecca irniangyuilan Isaac-aam piicautelaraa ATANERMUN. ATANREM-llu kiugaa piicallra Rebecca-llu qingarluni.

²²Malriqataami, yuurpailegmek callulartuk aanamek engeliagkeni. Rebecca qanertuq, “Ciin waten wiinga pisia?” Tua-i ATANEQ ullagaa apluku-llu tamana kangingyugluku.

²³ATANREM kiugaa, Atanruviik malruk iluvni uitauk; “Irniciquten inglukutellriignek, aipaan-llu yui inglukiluteng aipami yuinek. Aipaa pininruarkauluni aiparmini; Ciuqlian-llu kevgiurciqaa kinguqlini.”

²⁴Tua-llu irnillerkani pinarian qetunranguq malrignek.

²⁵Ciuqliq kavirrlugcetuq amia-llu ayuqluni melqilriatun aturatun, taumek aciraat Esau-mek.[24]

²⁶Kinguqlia yuurtuq qecugmiaqluku Esau-m kitngia, taumek aciraat Jacob-aamek.[25] Isaac allrakungellruuq yuinarnek pingayunek (60) taukugnek nuliani irnillrani.

²⁷Tua-i tan'gaurluuk angliuk, Esau piculriarullruuq yuilquq nunanikluku. Jacob-aaq tau͡gken ell'aramikun yuuluni, enemetesten͞guluni.

²⁸Isaac-aam kenkenrua Esau pitainek assililuni nerlaami, Rebecca-m-llu kenkenruluku Jacob-aaq.

²⁹Erenret iliitni Jacob-aaq keniinanrani suupamek, Esau tekituq pissullerminek kaigluni.

³⁰Qanerluni-llu Jacob-aamun, “Cakneq kaigtua, nerevkarnga tuaken kavircetellriim iliinek.” (Tauna pitekluku acillruat Edom-aamek.)[26]

³¹Jacob-aam kiugaa, “Cikirciqamken ciuqlikacagauluten paitarkan tau͡gaam wangnun piksagutarkaurceskuvgu.”

³²Esau qanertuq, “Kitaki! Tuquqatalrianga tang; paitarkanka kaillemni catnguciqat?”

³³Jacob-aam kiugaa, “Ukvernarcarirraara wangnun, ciuqliuluten paitarkan wiinga pikarkaurrluku.” Tua-i Esau ukvernarcariluni paitarkani Jacob-aamun pikarkaurcetaa.

³⁴Nutaan Jacob-aam kelipamek cikiraa suupam-llu iliinek. Ellii-llu ner'uq merluni-llu, taqngami-llu anluni. Tua-i tuaten piluni Esau-m yung'eqarraarutem paitaqtukiinek caukinrilucini nasvallrua.