Read Yupik Genesis 26 Bible Online

Genesis 26 - Yupik bible

Genesis 26

¹Tua-llu piitnaq tamaani nunami tut'uq, imuunrilnguq ciuqvaarni Abraham-aam nalliini pilleq. Isaac-aam ullagaa Abimelech-aaq angayuqaulria Philistine-ani Gerar-ami.

²ATANEQ alaillruluni Isaac-aamun qanellruluni-llu, “Egypt-aamun ayagyaqunak maani nunami uitasqellemni uitauraa.

³Makumiungu, nayurciqamken atawaqertelluten-llu. Man'a nuna tamalkuan elpenun kinguverpenun-llu tunqataraqa piciurrluku akqutkelqa atavnun Abraham-aamun.

⁴Kinguveten amllertaarkauvkarciqanka qiliim agyaitun, man'a-llu nuna tamalkuan ellaitnun tunciqaqa; tamarmeng atanruvilget atawaqercecesqeciqut wangnun kinguveten atawaqercetellrucimtun.

⁵Atawaqerceciiqamken, tua-i-wa Abraham-aam niisngallruanga aturluki-llu alerquutenka pisqutenka-llu.”

⁶Tua-i Isaac-aaq uitallruuq Gerar-ami.

⁷Tuani yuut aptaqatni nulirranek kiularai nayagaqniluku. Qanerciigatuq nuliqniluku alingluni tamaani angutnun tuqutnayukluni Rebecca tegunaluku kenegnaqapigcan.

⁸Tuani Isaac-aaq akaarnun uitallrurrluku angayuqaq Abimelech-aaq egalerkun uyanglluni kiartellermini tangrrak Isaac-aaq Rebecca-llu kenkuurutellragni.

⁹Abimelech-aam Isaac-aaq aqvavkarluku qanrutaa, “Cuna-wa nulirqeken, ciin qanercit nayagaqniluku?” Kiugaa, “Umyuarteqngama-wa tuqutnayuklua qanquma nuliqniluku.”

¹⁰Abimelech-aam pia, “Ciin waten pisit wangkutnun? Angutet iliita tutegyaraa nulian, elpet-llu pinarqelriarurcecararpekut.”

¹¹Abimelech-aam yuut tamalkuita aarcirturai, “Uum angutem nulirran-llu agturtii tuqucimaarkauguq.”

¹²Isaac-aaq nauceciiguq tuani nunami, taumi-llu allrakumi quyurciluni yuinarnek tallimataarluki amllenrulrianek nauceciillermini, tua-i-wa ATANREM atawaqercecani.

¹³Tuakenirnek piluaqertu'rtuq tukuurrluni-llu cakneq.

¹⁴Katngaucian qusnginek, kuluvagnek, pistelirluni-llu Philistine-at ciknakaat.

¹⁵Taumek imilarait elakat tamalkuita atiin Abraham-aam pistain elallrit Abraham-aaq unguvallrani.

¹⁶Tua-llu Abimelech-aaq qanertuq Isaac-aamun, “Maaken nunamten̄ek ayii, wangkutni tang pininrurtellriaten.”

¹⁷Isaac-aaq-llu ayagtuq, Gerar-am-llu kuignayuani uitaqerluni.

¹⁸Ataam elakat elagai elaumallret Abraham-aam nalliini, Philistine-at kevillrit tuqullran kinguani. Isaac-aam-llu acirai nutem atritnek atami aciutellrinek.

¹⁹Isaac-aam-llu pistai elagtut allamek elakamek kuignayugmi tuani-llu mermek nalaqulluteng.

²⁰Qusngiliurtet Gerar-ami qanemyuugautait Isaac-aam qusngiliurtai qanerluteng, “Una meq wangkuta pikarput.” Taumek Isaac-aam elakaq aciqii “Nakukuyun.”

²¹Isaac-aam pistai elagtut allamek elakamek, tauna cali nakukuyutnguuq, taumek aciqii “Inglukun.”

²²Nugtarrluni allamun cali elagtuq. Tauna qanernaituq, taumek aciqii “Pivigtulria.” Qanerluni-llu, “Waniwa Agayutem pivingevkaraakut uitallerkamten̄ek nunami, piluaqeraluta yuuciqukut maani.”

²³Isaac-aaq-llu tuaken ayagtuq Beersheba-mun.

²⁴Taumi unugmi ATANREM alairvikaa, qanerluni, “Wiinga Agayutkaanga atavet Abraham-aam, alingevkenak nayuramken, atawaqerceciiqamken amllernek kinguvengevkarluten akqutka aturluku Abraham-aamun.”

²⁵Isaac-aam-llu tuani ekuavililuni ciktaarvikaa ATANEQ. Tuani-llu qavartarluni, pistai-llu elagluteng allamek elakamek.

²⁶Abimelech-aaq taiguq Gerar-amek malikluku Ahuzzath-aaq alerquasten̄i, Phicol-aq-llu angayuqrat anguyagtem̄i, tangerrsarturluku Isaac-aaq.

²⁷Isaac-aam aptaa, “Ciin ullagcia eq'uk'ngerpenga, ayagcetellrulua-llu nunavnek?”

²⁸Kiugaat-llu, “Wangkuta nallunrirarput ATANERMUN nayuucin, umyuartequkut-llu umyuallgutekluta atunem pinarqucirput. Akqesqukut elpenun,

²⁹akngirngaitniluta elpeci akngirtellrunrilucimcetun, ayagtelluci-llu uitacurlagcetevkenaci. Watua-llu elpeci atawaqercecimalriaruuci ATANERMEK.”

³⁰Tua-i elliin neqkiurai, ellait-llu ner'ut merluteng-llu.

³¹Unuaquan makcara'arlutek atunem akqut'liuk, Isaac-aam-llu ayagcetai qaillun pivkenaki.

³²Taumi ernermi Isaac-aam pistain ullagaat qanrucarturluku elakamek elallermeggnek. Qanertut, “Mermek nalaqutukut.”

³³Aciraa-llu “Picirkiurun.” Tuaten nunarpak piluni Beersheba at'ngellruuq.

³⁴Esau yuinaagnek malrugnek (40) allrakungluni nulirtullruuq Hittite-agnek nasaurluugnek: Judith-aamek Beeri-m panianek, Basemath-aamek-llu Elon-aam panianek.

³⁵Taukuk cakneq uitacurlagcetakek Isaac-aankuk Rebecca-llu.