Read Yupik Genesis 27 Bible Online

Genesis 27 - Yupik bible

Genesis 27

¹Isaac-aaq tamatum nalliini ak'allaurtuq cikmirluni-llu. Taisqaa anngaqliq qetunrani Esau qanrulluku-llu, “Qetunramaa!” Esau-m kiugaa, “Aa-ang waniwa.”

²Isaac-aaq qanertuq, “Tangrrucirpetun ak'allaurtua, tuqullerkaqa-llu ukaqsigillilria.

³Caskuten piluki, pitegcauciviin urluvren-llu, yuilqumun ayagluten pissuusnga.

⁴Kenirraarluku picalqukekemtun taiskiu nerniartua; nererraarlua atawaqaasqen̄iamken tuquvailegma.”

⁵Tuani Isaac-aam Esau qalarutellrani Rebecca-m niicugnia. Tua-i-llu Esau ayiin pissurluni

⁶Jacob-aamun qanertuq, “Niitaqa atavet qalarutellrani Esau,

⁷‘Taiskina pitarpenek kenirraarluku picalqukekemtun, nerumarikuma atawaqercetniamken ciuqerrani ATANREM tuquvailegma.’

⁸Kitaki, qetunramaa, niicugninga alerqurnaamken.

⁹Ayagluten katngagnun assilriignek qusngirngalnguyagaagnek taiskina wangnun, kenirniagka picalqurrurrlukek atavet assikekiitun.

¹⁰Elpet agutniaran atavnun neresqelluku atawaqaasqen̄iaraaten tuquvailegmi.”

¹¹Tau͡gaam Jacob-aam aanani qanrutaa, “Nallunritan Esau melqiuq, wiinga tau͡gken melqurrinani qaika.

¹²Atama caavtaaqunia picingssauteksukciquq, wiinga-llu aniqlaamaciqua atawaqercecimavkenii.”

¹³Aaniin kiugaa, “Aniqlaamakuvet wangnun tuskilit; niilluten aqvatesqellemnek aqvaten.”

¹⁴Tua-i aqvatuq tunlukek-llu aanaminun, elliin-llu kenirlukek atiin assikekiitun.

¹⁵Esau-m-llu aturain assinritnek tegutuq qemangqakminek enemi, at'elluki-llu Jacob-aamun.

¹⁶Ungungssim-llu amianek unatainun uyaqurrinun-llu melqurrilngurnun elliiluni.

¹⁷Tunaa-llu tauna kenirani kelipaq-llu uptellni Jacob-aamun.

¹⁸Jacob-aaq-llu ataminun ag'uq qanerluni-llu, “Aataa!” Kiuguq, “Waniwa. Kituusit qetunramaa?”

¹⁹Jacob-aaq kiuguq, “Esau-ruunga ciuqliq qetunraan. Qanrucirpetun pillruunga. Makluten pitamnek neri, atawaqercetniarpenga.”

²⁰Isaac-aaq qanertuq, “Qetunramaa, qaillun piluten piqanqegpakarcit?” Jacob-aam kiugaa, “ATANREM-wa Agayutvet ikayuanga pitarkamnek tangerrsara'artellua.”

²¹Isaac-aam qanrutaa, “Canimnun taiqaa caavtaarniamken, nallunrirniarqa ilumun Esau-rucin.”

²²Jacob-aaq malkaniutuq ataminun. Caavtaarraarluku-llu qanertuq elliinun, “Erinan Jacob-aam eriniitun ayuquq, talligken tau͡gken Esau-m talligketun ayuqlutek.”

²³Elitaqenritaa Jacob-aaq tallik melqiagnek Esau-tun. Atawaqaasqeqatarluku

²⁴aptenqigtaa, “Ilumun-qaa Esau-ruuten?” Kiugaa, “Taunguunga.”

²⁵Isaac-aaq qanertuq, “Taisgu nernaurtua qetunrama pitaanek, nutaan atawaqercetniamken.” Tua-i taitaa, ellii-llu nerluni, wine-amek-llu cali cikiani merluni.

²⁶Tua-llu atiin qanrutaa, “Taikanirluten melugarnga qetunramaa.”

²⁷Malkanirliku melugaqatallrani atiin aturai narai, atawaqercetaa-llu qanerluni, “Qetunrama narnirqellra ayuquq yuilqum tepiitun, atawaqercetellran ATANREM.

²⁸Agayutem cikirliten qiliim yukutaanek naucetaarviten naungigivkarluki. Cikiqiliten-llu amllernek mukaarkanek wine-anek-llu.

²⁹Atanruviit yuit pisteksaguskiki, yuut-llu ciktelaqilit ciuqerpenun. Atanirturilriarukina tungelqurpenek, aanavet-llu kinguvri ciktelaqilit ciuqerpenun. Aniqlaasteten aniqlaamakilit, atawaqercecilriit-llu elpenek atawaqercecimakilit.”

³⁰Isaac-aam atawaqercecillerminek taqeqanrakun Jacob-aamek, Jacob-aaq-llu anqanrakun Esau tekituq pissullerminek.

³¹Kenirmiluni-llu picalqumek neqkamek taitaa ataminun qanerluni, “Atamaa, makluten neri qetunrarpet pitaanek, atawaqercetniarpenga.”

³²Isaac-aam-llu aptaa, “Kituusit?” Esau-m pia, “Amaqliugua qetunraan Esau.”

³³Isaac-aaq qiivenga'artuq qainga-llu tamarmi pekluni, apluni-llu, “Kituuga-mi au͡gna pissulleq, taicaku-llu wiinga nerluku tamalkuan tekipailegpet, atawaqertelluku-llu? Tua-i ellii atawaqercecimaarkaurtuq.”

³⁴Esau-m niicamiu man'a qiaguq qastuluni iluteqeqapiggluni, atani-llu qanrulluku, “Atamaa, atawaqercessnga-llu wiinga.”

³⁵Isaac-aam qanrutaa, “Kinguqliin umyuarrliqluni taillruuq atawaqautekarpenek allurrluten.”

³⁶Esau qanertuq, “Elluatun atengqertuq Jacob-aamek.[27] Aipiriluni waniwa usvituyarrluni pikairaanga. Paitarkaqa yung'eqarraarutngulua piksaguqaarluku, waniwa-llu cali tegua atawaqautekaqa. Ilakuiqanrituten-qaa wiinga atawaqautekamnek?”

³⁷Isaac-aam kiugaa Esau, “Ak'a atanrurtellruaqa elpenun, tamalkuita-llu tungelqurri elliinun pisteksagutelluki. Nuuqitarkaunrirtelluku-llu mukaarkanek wine-amek-llu. Tua-i camek elpet pisciigatamken.”

³⁸Esau-m tua-i atani aguaguquraraa, “Atauciungraan-qaa atawaqautmek piituten? Atawaqercessnga-llu wiinga.” Aluviliurluni-llu.

³⁹Isaac-aam qanrutaa, “Yukutartangqerrngaituq qilagmek naucetaarvigpeni. Naucetaarvignek-llu naugilrianek pitangqerrngaunani pikarpenek.

⁴⁰Yuuciquten nuussirpegun, tau͡gken pisten͞guluten kinguqlirpenun. Tau͡gaam pegleqruskuvet elliinun ataniumanrirceciiquten.”

⁴¹Esau-m tua-i cakneq eq'ukaa Jacob-aaq atami yung'eqarraarutem atawaqautii elliinun piaku. Waten-llu umyuarteqluni, “Tuquilriit piyaraatnek atama tuaten pimallerkaa canimellirtuq; tuani tuquciiqaqa Jacob-aaq.”

⁴²Tau͡gaam Rebecca-m niicamiu Esau-m picirkiuraa, Jacob-aaq taisqaa qanrulluku-llu, “Amaqliin qarutelartuq ellminek picirkiurluni tuqutnaluten.

⁴³Taumek niillua qimakina Laban-aamun amaqlimnun, Haran-aami.

⁴⁴Uitauraqervikluku-llu anelgutvet qenertellra pellugnatkaanun,

⁴⁵nalluyagutnatkaanun man'a elliinun pillren, wiinga aqvavkarciqamken tuaken. Yuarnaksuumiitamtek tamarpetek ernermi ataucimi.”

⁴⁶Rebecca-m Isaac-aaq qanrutaa, “Unguvayuumiirutua makut Hittite-at arnat Esau-m nulirri tangerrluki. Jacob-aaq iliitnek nulirtuqan, unguvalqa caunrilngurtun ellirarkaungan.”