Read Yupik Genesis 28 Bible Online

Genesis 28 - Yupik bible

Genesis 28

¹Isaac-aam tua-i taisqaa Jacob-aaq atawaqaasqerraarluku-llu qanrutaa, “Canaan-aarmiut iliitnek nulirturyaqunak.

²Ayakina Paddanaram-aamun apa'urlurpenun Bethuel-aamun, nulirturluten-llu Laban-aam aanavet amaqlian paniin iliitnek.

³Agayutem Artuqailnguum atawaqertelliten yugyangevkarluten-llu, atanruvigpiit amlleret nauniartut elpenek.

⁴Atawaqertelliten Abraham-aaq atawaqercetellrucimitun, man'a-llu nuna uitavikellren piksagutniaran, Agayutem cikiutekellra Abraham-aamun!”

⁵Isaac-aam ayagcetaa Jacob-aaq, ayagluni-llu Mesopotamia-mun, Laban-aamun Bethuel-aam qetunraanun Aramean-aamun anelgutiinun Rebecca-m, aaniignek Jacob-aankuk Esau-llu.

⁶Esau-m nallunriamiu Isaac-aamun atawaqercessucia Jacob-aaq ayagtelluku-llu Mesopotamia-mun nulirkaanek pisqelluku, nallunriraa-llu atawaqercetlermini alerqullrucia Canaan-aarmiumek nulirtuusqevkenaku.

⁷Nallunriraa-llu Jacob-aam niisngalukek angayuqaagni ayallrucia Mesopotamia-mun.

⁸Taumek Esau-m kangingamiu ataminun Canaan-aarmiut arnat assikenriluciat,

⁹ayagtuq Ishmael-aamun qetunraanun Abraham-aam. Nulirturluni-llu panianek Mahalath-aam, anelgutiinek Neboiath-aam.

¹⁰Jacob-aaq ayagtuq Beersheba-mek tungiinun Haran-aam.

¹¹Akerta teviqanrakun tekituq tanqilriamun nunamun, tuani-llu qavartarluni. Inarrluni qavangcartuq teggalqumek akicirluni.

¹²Qavangurturtuq mayuryaranek tekisngaluteng nunamek qilagmun, an'gilat mayurluteng atrarluteng-llu taukutgun.

¹³Tangrraa-llu ATANEQ nangengqaluni canimini. Qanrutaa-llu, “Wiinga ATANRUUNGA, Agayutii Abraham-aam Isaac-aam-llu. Cikirciqamken kinguveten-llu uumek nunamek inangqavigpenek.

¹⁴Kinguveten amllertaciqut urraitun nunam. Nunautseng ilangeciqaat negetmun, ungalatmun, calaratmun, kanavatmun-llu. Elpegun kinguverpegun-llu atawaqerceciiqanka tamalkuita nunarpiit.

¹⁵Neq'akekiu camun pivkarngaitamken ayallren tamalkuan, uterceciiqamken-llu wavet nunamun. Unisngaitamken akqutkellrenka tamalkuita pimarivailemki.”

¹⁶Jacob-aaq tupiimi qanertuq, “ATANEQ wantelliniuq! Wani nunami uitalliniuq, wiinga-llu wanlucia nalluluku!”

¹⁷Alingluni qanertuq, “Nuna una irr'inarqelriarulliniuq! Agayutem una enekellia. Iteryarauyugnarquq amiiguluni qilagmun.”

¹⁸Jacob-aaq maktuq unuakuarmi, teggalquq-llu teguluku ellia alailngurmun umyuaqutngurrluku. Uqumek-llu kuvaa allakaumalriarurrluku Agayutmun.

¹⁹Tauna nuna aciraa Bethel-aamek.[28] (Nunat taukut aterpagcimatullruut Luz-amek.)

²⁰Jacob-aaq akqut'liuq ATANERMUN, “Nayurarkaukuvnga camun pivkarpek'nii maa-i ayallemni cikiumalua neqkamnek aturarkamnek-llu,

²¹ataam-llu ut'reskuma atama eniinun cavkenii, wiinga Agayutkeciqamken.

²²Una-llu umyuaqun teggalquq ellilqa piicalarviugarkauguq elpenun, cikiutvet-llu tamalkuita qulngurutait tunlarciqanka elpenun.”