Read Yupik Genesis 29 Bible Online

Genesis 29 - Yupik bible

Genesis 29

¹Jacob-aaq ayagtu'rtuq tungiinun nunam calarami.

²Kiarcami tangertuq elakamek marami pingasuinek katngagnek qusngirtarluni nunii; katngaat tuaken mercet'larait elakamek teggalqurpall'e'rmek patulegmek.

³Tamarmeng katngaat quyurcimariaqata tuavet, qusngiliurtet teggalquq akaggluku qusngit mercet'larait, ataam-llu teggalquq akaggluku elakaq patuluku.

⁴Jacob-aam aptai qusngiliurtet, “Yugnikek'maa, camiunguceci?” Kiugaat, “Haran-aarmiunguukut.”

⁵Aptai, “Nallunritarci-qaa Laban-aaq qetunraa Nahor-am?” Kiugaat, “Aa-ang nallunritarput.”

⁶Aptai, “Canrituq-qaa?” Qanertut, “Aa-ang canrituq, pania uka-i Rachel-aaq agiirtuq qusngiinek maligluni.”

⁷Jacob-aaq qanertuq, “Erenruuq cali ut'rutnariksaunaki katngaat. Mercecuavciki-llu ut'rulluki-llu nerrlerkaatnun.”

⁸Kiugaat, “Tuaten pisciigatukut katngaat tamalkuita quyurpailgata maavet. Teggalquq akagcimarikan merceciiqaput.”

⁹Jacob-aam qalarusnginanrani Rachel-aaq tekituq qusngiinek atami maligluni, tua-i elliin auluk'laamiki.

¹⁰Jacob-aam Rachel-aaq tangrramiu angami katngautainek maligluni, elakamun ag'uq teggalquq-llu akaggluku mercelluki Laban-aam aanami anelgutiin qusngiutai.

¹¹Jacob-aam-llu melugaraa Rachel-aaq, angnim-llu ugaani qialuni.

¹²Jacob-aam qanrutaa Rachel-aaq tungayakniluni, Rebecca-mun irniaqniluni. Rachel-aam-llu atani aqvaqurluni qanrucarturluku.

¹³Laban-aaq niicami Jacob-aamek nayagarmi qetunraanek aqvaqurluni pairrsaagaa akuqerluku-llu melugarluku, itrulluku-llu eneminun. Jacob-aam Laban-aaq qanemcitaa canek tamalkuitnek pillernek.

¹⁴Laban-aaq-llu qanertuq, “Aa-ang ilumun wiinga tungelquqamken!” Jacob-aaq-llu iraluq qaqilluku tuantuq.

¹⁵Laban-aaq Jacob-aamun qanertuq, “Caliyunaitaaten akingeksaunak tungelququcin pitekluku. Qaillun pitalriamek akingyugcit?”

¹⁶Laban-aaq paningqertuq malrugnek, alqaa Leah-mek aterluni nayagaa-llu Rachel-aamek.

¹⁷Leah iigmikun kenegnartuq, Rachel-aaq tau͡gken temtuumarmi kenegnaqapiggluni.

¹⁸Jacob-aam Rachel-aaq kenkaa, taumek qanertuq, “Kevgiurciqamken malrunlegni allrakuni Rachel-aaq nulirqevkararkaukuvgu.”

¹⁹Laban-aaq-llu kiuguq, “Assinruciqellilria-wa elpenun tunkumni allamun pivkenaku, maantauraa.”

²⁰Jacob-aaq tua-i caliuq malrunlegni allrakuni Rachel-aaq nuliqsagutnaluku. Calillermini-llu allrakut malrunelgen ernertun qavcirrartun elliini ayuqut, tua-i-wa Rachel-aaq kenekngamiu.

²¹Tua-llu Jacob-aaq Laban-aamun qanertuq, “Caliyuglua elpenun akqutkelqa qaqituq, nuliqsagucesgu paniin.”

²²Laban-aaq-llu nerevkariuq yuut tamalkuita kelegluki.

²³Tau͡gaam tuani atakumi Rachel-aaq pivkenaku Leah taitaa Jacob-aamun, elliin-llu nuliqsagulluku.

²⁴Laban-aam pisten̄i Zilpah pikiutekaa paniminun pistekesqelluku.

²⁵Unuaquan tau͡gaam Jacob-aam taringaa arnam nuliqsagutellermi Leah-ucia. Laban-aaq-llu ullagaa qanrulluku-llu, “Ciin waten pisia? Calillruunga Rachel-aaq nuliqsagutnaluku. Ciin iqluurcia?”

²⁶Laban-aam kiugaa, “Maani nunamten̄i piciryaraqenritarput uingevkarluku kinguqliim alqaa ciullegluku.

²⁷Utaqalgia nitiliq aturluku, kassuutem nerevkaritii pellugnatkaanun. Rachel-aaq elpenun tuneniarqa caliarkaukuvet cali allani malrunlegni allrakuni.”

²⁸Jacob-aaq tua-i tuaten piciqniuq. Nitiliq-llu iquklican, kassuutem nerevkaritii iquklican, Laban-aam Rachel-aaq tunaa nulirqesqelluku.

²⁹Laban-aam pisten̄i arnaq Bilhah tunaa paniminun pistekesqelluku.

³⁰Jacob-aam-llu tutgaa Rachel-aaq. Kenkenruluku-llu Leah-mi, caliluni-llu Laban-aamun allani allrakuni malrunlegni.

³¹ATANREM tangrramiu Leah-m kenkumanritellra qingatuvkaraa, Rachel-aaq tau͡gken qingayuunani.

³²Leah qingartuq irniluni-llu qetunrangluni. Qanertuq-llu, “ATANREM arenqiallugtelqa tangrraa, nutaan uima kenegyaguciiqaanga”; acirluku-llu Reuben-aamek.[29]

³³Cali qingartuq, irniami-llu qetunrangluni qanertuq, “ATANREM niicamiu kenkumanriluciqa uumek cali qetunrangevkaraanga.” Aciraa-llu Simeon-aamek.[30]

³⁴Cali allamek qingartuq irniluni-llu qetunrangluni. Qanertuq, “Nutaan uima malkanirciqaanga qeturangama pingayunek elliikun.” Taumek aciraa Levi-amek.[31]

³⁵Allamek cali qingartuq, irniluni-llu cali qetunrangluni. Qanertuq, “Watua wiinga nanrarciqaqa ATANEQ”; aciraa-llu Judah-mek.[32] Tuakenirnek qinganqigtenrituq.