Read Yupik Genesis 3 Bible Online

Genesis 3 - Yupik bible

Genesis 3

¹Waniwa ciissirpak usvituyartenruqapigcami, ungungssini tamaitni Agayutem piliarini nunami, arnaq aptaa, “Agayun-qaa qanellruuq ner'arkaunritnilutek napanek tamalkuitnek naucetaarvigmelngurnek?”

²Arnam-llu ciissirpak kiugaa, “Neryugngaukuk napat atsaitnek naucetaarvigmelngurnek;

³tau͡gaam Agayun qanellruuq, ‘Napam naucetaarviim qukaanelnguum atsainek ner'arkaunritutek, agturngaunaku-llu, tuaten pikuvtek tuquyuartutek.’”

⁴Ciissirpiim arnaq qanrutaa, “Tuqungaitutek.

⁵Agayun nallunrilami nerkuvtek tuaken napamek iitek uiciiqngagnek, Agayucetun-llu ayuqlirilutek, nallunrirluku assilria assiilnguq-llu.”

⁶Arnam tangrramiu napa tangssunaqluni atsai-llu neqkarnirluteng umyuarturinarqellinian-llu, atsamek tegulluni ner'uq; uinga-llu cali cikiani nerluni.

⁷Nerngamek egmian ellanguk, elpekluku-llu matangqacirtek. Napat-llu cuyaitnek mingqulluki patukiurlutek ellmegnek.

⁸Taum atakuani niitaak ATANEQ Agayun piyuallrani naucetaarvigmi niicamegnegu-llu iirlutek napat akuliitnun.

⁹Tua-llu ATANREM Agayutem qayagauraa angun apluku, “Nancit?”

¹⁰Kiugaa, “Niicamken naucetaarvigmi alinglua iirtua matangqalliniama.”

¹¹Agayutem qanrutaa, “Kia matangqaniaten? Inerquuteklemnek-qaa napam atsainek ner'uten?”

¹²Angutem kiugaa, “Arnam taitellerpet cikianga nerellruunga.”

¹³Tua-llu ATANREM Agayutem arnaq aptaa, “Ciin waten pisit?” Arnam kiugaa, “Ciissirpiim iqluurlua ukvercanga nerua.”

¹⁴ATANREM-llu Agayutem qanrutaa ciissirpak, “Aniqlaamaciquten waten pillruavet; ungungssini tamalkuitni elpet kiivet aniqlaan aturciqan: Wak'nirnek ayagluten aurrluten tau͡gaam pektelarciquten, urr'armek-llu neqengqerciquten unguvarpet taktaciatun.

¹⁵Ingluksaguceciiqamtek elpet arnaq-llu, kinguverpetegnun eq'ukutellertek kinguvararkauluni; arnam kinguvran qamiqun qiurqeciqaa, elpet-llu kitngiakun kinguvra kegciqan.”

¹⁶Tuamta-llu arnaq qanrutaa, “Ilaciqanka arenqialluguteten qingallerpeni, irniaqavet-llu nangteqellren. Tuaten ping'e'rpet uin aglumakelarciqan, elliin-llu atanirturciqaaten.”

¹⁷Angutmun-llu qanertuq, “Maligtaquavgu nulian nerluten-llu atsamek neresqenritlemnek, waten piavet nuna aniqlaamaarkauguq. Cakviurluten nunam naugillrinek nerangnaq'larciquten unguvarpet taktaciatun.

¹⁸Naugiciquq caarrlugnek cukilananek-llu, nerlararkauguten-llu yuilqum naunrainek.

¹⁹Cakviurluten, kiiryugluten, caliaqeciqan nuna naugivkangnaqluku neqkarpenek uterrnatkarpenun nunamun. Nunamek piliaqumallruavet nunamun uterciiquten.”

²⁰Adam-aam-llu[4] nuliani aciraa Eve-amek,[5] aanakngatgu yuut tamarmeng.

²¹ATANREM-llu Agayutem Adam-aankuk Eve-aq-llu aturarkiurak ungungssit amiitnek, at'elluki-llu.

²²Tua-llu ATANEQ Agayun qanertuq, “Angun wangkucicetun ayuqliriuq, nallunrirluku assiilnguq assilria-llu. Aarnarquq cali tegulluni nernayukluni unguvanarqelriim napam atsainek, unguvaarkaurrluni akwarpak.”

²³Tua-i ATANREM Agayutem anevkaraa naucetaarvigmek Eden-aamek nuna aulukesqelluku.

²⁴Calaralirneranun-llu naucetaarviim elkarciuq cherubim-aanek[6] ekualriamek-llu nuussirpagmek, calligtaalriamek. Ullagciigatevkarluku unguvanarqelria napa.