Read Yupik Genesis 30 Bible Online

Genesis 30 - Yupik bible

Genesis 30

¹Tau͡gaam Rachel-aaq irniarituq Jacob-aami, taumek ciknanguq alqerminek. Qanertuq-llu Jacob-aamun, “Irniangevkarnga tuquyuartua!”

²Jacob-aam-llu qenqerrutaa Rachel-aaq, qanerluni-llu, “Agayutem caliara wiinga pisciigataqa. Elliin irniangesciigatevkaraaten?”

³Rachel-aaq qanertuq, “Waniwa pisteka Bilhah. Tutgu irniangniartuq wiinga pikamnek, aanaurrniartua elliikun.”

⁴Tunaa-llu Bilhah uiminun, Jacob-aam-llu tutegluku.

⁵Bilhah-llu qingartuq irniluni-llu Jacob-aam qetunraanek.

⁶Rachel-aaq qanertuq, “Agayutem piyulqa piciurcetaa. Niilluku piicalqa cikiraanga qetunrarkamnek.” Taumek aciraa Dan-amek.[33]

⁷Bilhah cali qingartuq Jacob-aaq aipiriluni qetunrangevkarluku.

⁸Rachel-aaq qanertuq, “Cakviurlua callullruaqa alqaqa, anaggluku-llu”; taumek aciraa Naphtali-mek.[34]

⁹Leah-m elpekngamiu qinganqiggngailucini pisten̄i Zilpah Jacob-aamun nuliqsagucetaa.

¹⁰Zilpah-m-llu qetunrangevkaraa Jacob-aaq.

¹¹Leah qanertuq, “Piluaqertua”; taumek aciraa Gad-amek.[35]

¹²Zilpah cali allamek qetunranguq.

¹³Leah-llu qanertuq, “Angnipiartua! Arnat aterpagtelararkaurtaatnga angnimek.” Taumek aciraa Asher-aamek.[36]

¹⁴Quyurciyaram mukaarkanek nalliini Reuben-aaq ayallermini naucetaarvigmun nalaqutuq naunrarnek iinruktukaitnek mandrake-anek,[37] ut'rulluki-llu aanaminun Leah-mun. Rachel-aaq-llu qanertuq Leah-mun, “Cikiqernga qetunrarpet naunrautain ilaitnek.”

¹⁵Leah kiuguq, “Carrartun-qaa elpeni pitauq uimnek allurkengellren? Teguciqaten-llu-qaa qetunrama naunrautai?” Rachel-aaq qanertuq, “Cikiquvnga qetunrarpet naunrautainek qavallguteksugngaciqan Jacob-aaq unuku.”

¹⁶Jacob-aaq utercan atakumi naucetaarvigmek Leah-m pairrsaagaa qanrulluku, “Unuku canimni qavarciquten akilitellruamken qetunrama naunrautainek.” Tuani-llu unugmi caniani qavartuq.

¹⁷Agayutem niitaa Leah-m piicautii qingartuq-llu Jacob-aam qetunrain tallimakaatnek.

¹⁸Leah qanertuq, “Agayutem nunuliraanga pisteka tunellruamku uimnun.” Taumek qetunrani aciraa Issachar-amek.[38]

¹⁹Leah-llu ataam cali allamek qingartuq arvinelgurrluki Jacob-aam qetunrai ellmini.

²⁰Ellii qanertuq, “Agayutem cikiraanga cikiutmek assilriamek. Nutaan uima ciuniurarkaugaanga tua-i-wa qetunrangevkaamni arvinlegnek.” Taumek aciraa Zebulun-aamek.[39]

²¹Kinguqvaarni paningellruuq acirluku-llu Dinah-mek.

²²Agayutem-llu umyuaqaa Rachel-aaq; kiuluku-llu piicallra irniangyugngarivkallrua.

²³Qingartuq qetunrangluni-llu. Qanertuq, “Agayutem au͡g'araa kiaresngialutka, qetunrarkamnek cikirlua.

²⁴ATANREM cali allamek qetunrangevkaqilia.” Tua-i aciraa Joseph-aamek.[40]

²⁵Joseph-aam yuurtellran kinguakun Jacob-aaq qanertuq Laban-aamun, “Ayagcessnga uterrniartua kingunemnun.

²⁶Nulianka irnianka-llu malikevkarluki piksagutellruamki calilua elpeni. Ayagceskia nallunritan qaillun pitalriamek elluarrlua kevgiulqa elpenun.”

²⁷Laban-aaq qanertuq elliinun, “Canrilkekuvgu qanernaurtua: Nallunrillruaqa ciunerkarcuryarakun ATANERMUN atawaqercecuciqa elpet pitekluten.

²⁸Ap'ri akiliutekarpenek akilirniamken.”

²⁹Jacob-aaq kiuguq, “Elpet nallunritan qaillun kevgiullruciqa elpenun, qaillun-llu kuluvautvet ayuquciat auluk'ngerraanemnek.

³⁰Carraullruyaaqut taivailegma, maa-i-llu amlleriluteng; ATANREM-wa atawaqercecamiten wiinga piteklua. Tau͡gaam wangnek yuungnaqnarianga.”

³¹Laban-aam aptaa, “Camek akiliisqessit?” Jacob-aam kiugaa, “Akingyunritua, waten tau͡gaam pivkaquvnga katngauteten auluku'urciqanka:

³²Unuamek pulaarcessnga katngautvet akuliitni, allakarluki tamalkuita tungulriit qusngiyagaat qusngirngalnguyagaat-llu kukupalget kukupayagalget-llu. Kiingita tamakunek akingyugtua.

³³Kinguqvaarni nallunaitniartuq piciuciqa paqeskuvki akingutkellrenka. Kukupayagailngurnek kukupailngurnek-llu wall'u tungunrilngurnek ilangqerquneng piyagarnek tamakut teglegauciqut.”

³⁴Laban-aaq qanertuq, “Qanellren assirtuq, tuaten piciqukuk.”

³⁵Tau͡gaam tuani ernermi Laban-aam allakarai qusngirngalnguut angucalut keptalget, kukupalget, qatellrialget-llu qaimegteggun. Cali-llu allakarluki tungulriit qusngit, qetunraminek-llu qaunqescirluki.

³⁶Ayagluni-llu Jacob-aamek katngautni ayaulluki erenret pingayun aturluki, tuaten pitalriamek yaaqsigtaluni Jacob-aamek. Jacob-aam-llu aulukai tuanelnguut Laban-aam katngautai.

³⁷Jacob-aaq-llu quyurtuq cungagcetellrianek avayaitnek napat ayuqenrilnguut, qeltairluki-llu akulperrluki qatellria alaicetaqluku qeltaita akuliitgun.

³⁸Tamakut avayat ellii katngaat merviata manuitnun, ungungssiaraat nulirtelaata meqsarturaqameng.

³⁹Katngaat nulirtaqameng tamakut avayat akuliitni irnilartut keptalegnek, kukupayagalegnek, kukupalegnek-llu.

⁴⁰Jacob-aam allakarai qusngit qusngirngalngurnek, cauvkarluki-llu keptalget tungulriit-llu Laban-aam katngautai. Elliin-llu pikani allakaumai, ilaucetevkenaki Laban-aam piinun.

⁴¹Segganqellriit ungungssit nulirtaqata, Jacob-aaq avayanek elliilartuq merviitnun, irnisqelluki avayat nuniitni.

⁴²Tau͡gaam avayanek elliiksaitelartuq ungungssit pinialnguut ciuqerritnun. Ak'anun pivkenani Laban-aaq pinialngurrlainarnek ungungssiutenguq, Jacob-aaq tau͡gken pinilriarrlainarnek.

⁴³Waten piluni Jacob-aaq cakneq tukuurtuq, katngautai amlleriluteng, pisterluni arnanek, angutnek, ungungssiuterluni-llu cali qulugnelegnek ciulvagnek-llu.