Read Yupik Genesis 31 Bible Online

Genesis 31 - Yupik bible

Genesis 31

¹Jacob-aaq niituq Laban-aam qetunrai qanerniluki, “Jacob-aam cat tamalkuita tegui atamta pikellri, tukuurrluni atamta piikun.”

²Laban-aam-llu cali ciunganitun ayuqutenrirluku.

³ATANREM Jacob-aaq qanrutaa, “Ataam uterten atavet nunautiinun ilavnun-llu, wiinga nayurciqamken.”

⁴Tua-i Jacob-aam taisqak Rachel-aankuk Leah-llu maramun katngaat nuniitnun.

⁵Qanrutak, “Nallunaunani atavtek ciunganitun ayuqutenriraanga, tau͡gaam atama Agayutiin nayullruanga.

⁶Tamarpetek nallunritarpetegnga calillruunga atavtegnun pitacirramtun.

⁷Tau͡gaam elliin teglegillruanga akingutkanka-llu cimiraqluki qulerqunek. Tau͡gaam Agayutem elliinun akngircetenritaanga.

⁸Laban-aaq qanraqan, ‘Kukupayagalget qusngirngalnguut akingutkeciqaten,’ tamarmeng katngaat irnilartut keptalegnek. Waten-llu qanran, ‘Keptalget qusngirngalnguut akingutkeciqaten,’ tamarmeng katngaat irnilartut keptalegnek.

⁹Agayutem tegullrui katngaat atavtegnek cikiutekluki-llu wangnun.

¹⁰“Nulirtellrata nalliini qavangurtullruunga tangerrlua angucalunek qusngirngalngurnek nulirtellrianek keptarluteng, kukupagluteng, kukupayagarluteng-llu.

¹¹An'gilaan Agayutem qanrutaanga qavangumni, ‘Jacob-aaq!’ Kiugaqa, ‘Aa-ang!’

¹²‘Tangerki atam tamarmeng nulirtellriit angucalut qusngirngalnguut keptangqertut, kukupagluteng, kukupayagarluteng-llu. Waten pivkaranka, tangrramku Laban-aam qaillun picia elpenun.

¹³Wiinga Agayutnguunga alailleq Bethel-aami elpenun, tuani qigcignarivkallruan teggalquq umyuaqutngurrluku, uqumek-llu kuvluku akqut'liluten wangnun. Watua upluten uterten nunamun yuurrvillerpenun.’”

¹⁴Rachel-aankuk Leah-llu kiugaak, “Paitarkairutukuk atamegnek.

¹⁵Allanertun pitarrlunuk pilaraakuk. Elliin tunellruakuk akiliutngullret-llu wangkugnun tamalkuita atullrurtai.

¹⁶Makut tukuutet Agayutem tegullrui atamegnek wangkuk irniamegnuk pikluki. Agayutem qanrutellratun tuaten pikina.”

¹⁷Tua-i Jacob-aaq uptuq uterrnaluni ataminun, nunamun Canaan-aamelngurmun. Irniani nuliani-llu ungungssit qulugnelget qaingatnun ekevkarluki, ungungssiutni kasemluki cat-llu tamalkuita Mesopotamia-mi piksagutellni ang'aqluki.

¹⁸

¹⁹Laban-aaq ayaumaluni asmegcarturluki qusngiutni. Cataitellrani Rachel-aam teglegai enemeggni agayutet, atami pii.

²⁰Jacob-aam usviilqia Laban-aaq nalluvkarluku ayakatallerminek.

²¹Cani tamalkuita teguluki cukangnaqluni ayagtuq. Kuik Euphrates-aaq qerarluku ayagtuq tungiinun qertulriim nunam Gilead-aam.

²²Erenret pingayun kinguatgun Laban-aaq qanrutaat Jacob-aaq ayagartellruniluku.

²³Angutnek malilirluni malirqeraat Jacob-aaq ernerni malrunlegni anguluku-llu qertulriami nunami Gilead-aami.

²⁴Qavanguakun taumi unugmi Agayutem ullagaa Laban-aaq qanrulluku-llu, “Mulngakekina camek qaneryaqunak Jacob-aamun assingraan assiilengraan-llu.”

²⁵Laban-aam angua Jacob-aaq. Jacob-aaq arulaillruluni qertulriamun nunamun, Laban-aaq-llu ilani-llu arulairluni cali qertulriamun Gilead-aami.

²⁶Laban-aaq qanertuq Jacob-aamun, “Ciin aassaqluten ayaga'rcit paniigka-llu ayaullukek teguaqelriatun anguyagkun?

²⁷Ciin qanrutenricia ayakatarniluten? Qanrutellrukuvnga ayagcecaramken angnirluta aturpagaluta maliggluki aturcetaat.

²⁸Tua-ingunrituurcetevkenaki-llu paniigka tutgaraanka-llu. Umyugailngurtun tuaten piuten.

²⁹Piningqertua akngircugngaluten, tau͡gaam atavet Agayutiin unuk aarcirturaanga, ‘Mulngakekina, camek akeqnerrlugcaqunaku Jacob-aaq.’

³⁰Tua-i-wa ayalriaten tangerrsuavki ilaten, tau͡gaam ciin teglegciki agayutenka?”

³¹Jacob-aaq qanertuq, “Alingama-wa umyuarteqlua paniigken tegunayuklukek wangnek.

³²Ilamten̄i agayuteten nalaqekuvki, tauna unguvangaituq. Ukunun ilamegnun tangvagtelluten nallunairki elpet piten teguluki-llu.” Jacob-aam nallua Rachel-aamun agayutet tegullruciit.

³³Laban-aam yuaraa Jacob-aam pelatekaa, tuamta-llu Leah-m pelatekaanun iterluni, arnak-llu pistek pelatekaagnun, tau͡gaam agayutni nalaqenritai. Rachel-aam tua-i pelatekaanun itertuq.

³⁴Rachel-aam tegullruluki enemi agayutet qemaggluki-llu ungungssim qulugnelgem aqumvian qemaggvianun aqumvikluku-llu. Laban-aam pelatekaq qaqilluku yuaryaaqaa tau͡gaam camek nalaqutevkenani.

³⁵Rachel-aaq ataminun qanertuq, “Qenrucaqunii nangertenrilnge'rma ciuqerpeni, nangercesciigatua agelrumiima.” Laban-aaq yuaryaaquq tau͡gaam agayutni nalaqenritai.

³⁶Tua-i Jacob-aam qenqercami Laban-aaq apcecurlagaa, “Camek pinarqelriamek pillrusia? Camek inerquutmek navgilrianga malirqercia?

³⁷Yuaryaaqaten aklunka tamalkuita, tua-llu-qaa camek pivnek nalaqucit? Elliki wavet ilamegnuk tangerrnauraat nalimegnuk piciuluni picia.

³⁸Allrakuni yuinarni nayullruamken, qusngiten qusngirngalnguuteten-llu irninriteksaitut, nerellruksaunii-llu angucalumek katngautevnek.

³⁹Qusngiq tuqucimaaqan wangnun tuc'et'larqa elpenun-llu taiteksaunaku qaneryarturlua wiinga pillrunritniluku. Cimiisqelaran-llu wangnun iliit tegelgumaaqan erenrungraan unuungraan-llu.

⁴⁰Amllermi nangteqaqlua kiirmek erenrani nengelmek-llu unugmi, qavarciigataqlua tuaten.

⁴¹Ukuni allrakuni yuinarni enevni uitallemni tuaten ayuqellruunga. Allrakut-llu akimiarunritaraat aturluki calillrulrianga paniigken nuliqsagutnalukek, cali-llu allrakuni arvinlegni kevgiullruluten katngautengllerkaqa piluku. Tuaten-llu pillrung'e'rma elpet akingutkanka cimillruluki qulerqunek.

⁴²Agayutiita atama, Agayutiin Abraham-aam Isaac-aam-llu, nayullrunrilkanga ak'a ayagcecallruarpenga talligka aqevlakenka. Tau͡gaam Agayutem tangellrua arenqialluguteka calilqa-llu, unuk-llu alairvikluten aarcirturluten.”

⁴³Laban-aam kiugaa Jacob-aaq, “Ukuk arnak wiinga panikagka, irniakek-llu cali wiinga pikanka, katngaat-llu wii pikluki, tangelten wiinga tamalkuita pikanka. Tau͡gaam qaillun pisciigalama avaliqsungramki paniigka irniakek-llu,

⁴⁴akqut'linaurtukuk atunem. Naparcinaurtukuk qalliqelrianek teggalqunek nallunailkutauvkarluku wangkuk akqut'lillemegnun.”

⁴⁵Tua-i Jacob-aaq teggalqumek tegulluni umyuaqutngurrluku elgartaa.

⁴⁶Angutet-llu ilani qanrulluki teggalqunek avuusqelluki. Avuameng quyurrluki qalliqluki elliit. Nutaan-llu nerluteng taukut teggalqut caniatni.

⁴⁷Laban-aam tauna aterpagtaa Jegar Sahadutha,[41] Jacob-aam tau͡gken acirluku Galeed-amek.[42]

⁴⁸Laban-aam Jacob-aaq qanrutaa, “Teggalqut ukut umyuaqutnguciqut wangkugnun.” Taumek tauna aterpagcimalria Galeed-amek.

⁴⁹Laban-aaq cali qanertuq, “Ataki ATANREM murilkekilikuk avvingatlemegni.” Taumek tauna cali atengqellria Mizpah-mek.[43]

⁵⁰Laban-aaq cali qanertuq, “Elluarrlukek aulukenrilkuvkek paniigka wall'u allanek arnanek nulirtuquvet, wiinga nallungramku, umyuaqekiu Agayutem tangvagaakuk.

⁵¹Waniwa tang teggalqut qalliqluki napartellrenka akunlemeggnun, waniwa-llu umyuaqutngulria teggalquq.

⁵²Tamarmek, ukut teggalqut qalliqelriit una-llu umyuaqun teggalquq, neqaarturitnguuk. Watqapik curukarluten kiturngaitanka ukut qalliqellriit, elpet-llu watqapik kiturngaitaten una-llu umyuaqun teggalquq kiturngaunaku curukarlua.

⁵³Agayutiin Abraham-aam Nahor-aam-llu[44] cuqciiqaakuk.” Nutaan-llu cali Agayutem atrakun atami Isaac-aam qigcikekiikun Jacob-aam akqutni aturciqnia.

⁵⁴Ungungssiarmek tuquciami elliitekaa ekuagarkauluku ingrimi, kelegluki-llu angutet malini neresqelluki. Nerumariameng tuani ingrim qaingani unugiut.

⁵⁵Unuaquan Laban-aam melugarai tutgarani panini-llu, atawaqaasqelluki-llu; uterrluni-llu kingunerminun.