Read Yupik Genesis 33 Bible Online

Genesis 33 - Yupik bible

Genesis 33

¹Jacob-aam kiarcami tangrraa Esau agiirtellria maligluni yuinarnek yuinarnek (400) angutnek. Tua-i elliin avgai mikelnguut Leah-mun, Rachel-aamun, pistegnun-llu.

²Pistek-llu irniartuumakenka ciuqliuvkarak, Leah-llu irniari-llu tungliuvkarluku, Rachel-aankuk-llu Joseph-aaq-llu kinguqlikacagaulutek.

³Ellii Jacob-aaq ciunratgun ayagtuq, ciktaqluni malrunlerqunek anngani ullainanermini.

⁴Tau͡gaam Esau-m aqvaqurluni pairrsaagaa akuqerluku-llu melugarluku. Tamarmek aluviliurlutek.

⁵Esau-m tangrramiki arnat mikelnguut-llu aptaa, “Kinkuugat-mi makut maliten?” Jacob-aam kiugaa, “Agayutem takumcuklua wangnun cikiutekelqai.”

⁶Pistek arnak irniatek-llu iluvartuk, cikluteng-llu ciuqerranun;

⁷tuamta-llu Leah irniani-llu kinguatgun tailuteng, kinguatgun-llu Joseph-aankuk Rachel-aaq-llu, tamarmeng ciktaqluteng ciuqerranun.

⁸Esau-m qanrutaa, “Qaillun umyuartequlluki au͡gkut pairtellrenka ayagcetellrusiki?” Jacob-aaq kiuguq, “Tuaten pillruunga elluarrlua ciuniuresqumalua.”

⁹Esau qanertuq, “Amllertut wiinga pinka; elpet piten avaliqiki.”

¹⁰Jacob-aaq qanertuq, “Elpeni ciuniuyunarqekuma kaigavikamken cikiutenka ciuniurki. Tangellren Agayutmek tangellriatun ayuqngan, assirlua ciuniuravnga.

¹¹Ciuniurki cikiutenka elpenun Agayutem takumcuknganga cikirlua nuuqairullua.” Aguagucani tua-i ciuniurai.

¹²Tua-llu Esau qanertuq, “Upluta ayagnaurtukut. Wiinga ciunerpeciuggun piurniartua.”

¹³Tau͡gaam Jacob-aam qanrutaa, “Nallunritaten mikelnguut piniatut, ungungssiutenka-llu piyagangqerrata, cukangnaqulluki kasmekuneng ernermi ataucimi ping'e'rmeng tamarmeng tuquciqut.

¹⁴Ciunemkun tua-i ayii, wiinga maligciiqamken cukassaagarpek'nii ungungssiaraat mikelnguut-llu 'gilertellrat pitaciluku. Anguciqamken Edom-aami.”

¹⁵Esau-m qanrutaa, “Kitak unisviknaamken ikayurkarpenek malima angutet ilaitnek.” Jacob-aam kiugaa, “Aturyunritanka, assirlua tau͡gaam ciuniuresqumallruunga elpenun.”

¹⁶Taumi ernermi Esau ayagtuq Edom-aamun.

¹⁷Jacob-aaq tau͡gaam Sukkoth-aamun ayagtuq, tuani-llu pikaminek eneliluni, uqisvililuki tuaten ungungssiutni. Tauna pitekluku tauna aterpagtellruat Sukkoth-aamek.[47]

¹⁸Mesopotamia-mek utertellermi Jacob-aaq cavkenani tekituq nunarpagmun Shechem-aamun Canaan-aam nuniini. Carr'ilngurmun-llu arulairluni nunarpiit caniatnun.

¹⁹Nuna-llu tauna arulairvikellni kiputaa yuinaq tallimanek (100) akinek kinguvrinek Hamor-am Shechem-aam atiinek.

²⁰Tuani-llu ekuavililuni acirluku-llu El-amek, Agayutiinek Israel-aam.