Read Yupik Genesis 34 Bible Online

Genesis 34 - Yupik bible

Genesis 34

¹Caqerluni Dinah Leah-m pania, Jacob-aamun irniangutellra, elalirtelliniuq arnanun Canaan-aarmiunun tamaani nunami.

²Shechem-aam-llu, Hamor-am Hivite-am qetunraan, nunami tamaani atanerruam, tangrramiu callugluku akusrarutekaa.

³Tau͡gaam nalluyagucesciigataa umyuamikun kenekluku cakneq, elliin-llu qarutaa kenegyagucetengnaqluni.

⁴Atani-llu qanrutaa, “Nulirrniarusnga taumek nasaurlurmek nuliqsagutniarqa.”

⁵Tua-i Jacob-aam nallunriraa panimi kasngunarqellriamek pimallra, tau͡gaam qetunrani maramelata nayurluki kuluviit, qaillun pinrituq uterrnatkaatnun.

⁶Shechem-aam-llu atiin, Hamor-aam, ullagaa Jacob-aaq qalarucarturluku,

⁷Jacob-aam qetunrai uterteqanratgun maramek. Niicamegteggu tatamut qenqerrluteng-llu, ciin waten Shechem-aaq picianek Israel-aam yui kasngunarqelriamek piluki, callugluku akusrarutekluku Jacob-aam pania.

⁸Hamor-aq qanertuq Jacob-aamun, “Qetunrama Shechem-aam kenkaa paniin. Nulirturcessgu taumek.

⁹Akqutmek taqutnaurtukuk yup'uk atunem nuliqsagutelararkaurtelluki.

¹⁰Nunamten̄i maani nani uitayullerpecen̄i uitaniartuci, tuneniarluci, kipulluci, nunautengluci-llu.”

¹¹Tua-llu Shechem-aaq qanertuq Dinah-m atiinun anelgutainun-llu, “Piyulqa unakevkaquvciu camek piyullerpecen̄ek cikirciqamci.

¹²Qanrucia camek cikiisqumakuvci camek-llu nulirruciisqumacirpecen̄ek; wiinga cikirciqamci pisqumallerpecen̄ek nasaurluq tauna nulirqevkarciu wangnun.”

¹³Jacob-aam qetunrain kiugaat Shechem-aaq atii-llu usvituyarullukek, alqermeng Dinah-m kasngunarqelriamek pimallra pitekluku.

¹⁴Waten qanrutagket, “Wangkuta waten pisciigatukut, alqerput tunluku nuugiumanrilngurmun, kasngunarqelriaruan tamana wangkutni.

¹⁵Waten tau͡gaam pikuvci pivkarciqamceci; wangkucicetun angutet tamalkuita nuugiquvciki.

¹⁶Nutaan panimten̄ek nulirturcet'larciqamceci, wangkuta-llu panigpecen̄ek nulirturaqluta, nunalguteksagulluta ataucimurrluta yuuniartukut.

¹⁷Tau͡gaam niitenrilkuvcikut nuugirpek'naci panigput teguluku ayagciqukut.”

¹⁸Qanellrata ilukegcivkarakek Hamor-aankuk qetunraa-llu Shechem-aaq.

¹⁹Tan'gaurluq-llu tauna qarivkenani tuaten piyugtuq, Jacob-aam pania nuliqsuamiu. Ellii-llu takaqumanrulriaruuq ilamini.

²⁰Hamor-aq qetunrani-llu aglutek nunarpamegnun iteryaramun qalarutakek angutet qanerlutek,

²¹“Ukut yuut ilaliunqegtut, uitavkarnauput maani nunami tuneniartelluki, nuna man'a pivigtuuq. Nulirtularniartukut paniitnek, wangkuta-llu nulirturtelluki panimten̄ek.

²²Atauciq tau͡gaam piyullerteng pikumteggu uitallguciryugaitkut ilaksagulluta; anguteput tamalkuita nuugircecesqelluki ellmegcecicetun.

²³Akluit ungungssiarautait-llu piksaguciiqaput. Pisqellrat aturnaurput uitallgucirniaraitkut.”

²⁴Taukut nunarpiit yuit maligarutut taukugnun Hamor-ankugnun Shechem-aaq-llu, angutet-llu tamarmeng nuugirtelluteng.

²⁵Erenret pingayuatni taukut angutet nuugiumallret engellugtullratni, Jacob-aam malruk qetunraak Simeon-aankuk Levi-aq-llu, Dinah-m anngaagken, nuussirpatek pirraarluki nalluvkarlutek nunarpagnun iterlutek tuqurqakek tamalkuita angutet.

²⁶Tuqutakek-llu Hamor-aankuk Shechem-aaq-llu, Dinah-llu Shechem-aam eniinek anulluku ayagluteng.

²⁷Jacob-aam-llu qetunrain nunarpiit taukut uayaarait nayagarmeng menuurcimallra pitekluku.

²⁸Teguit-llu ungungssiutait, kuluviit, ciulviit, cat-llu allat tamalkuita nunarpagni yuilqumi-llu uitalriit.

²⁹Tukuutait teguit, teguaqluki-llu mikelnguit, nulirrit, cali-llu enet imait tamalkuita teguluki.

³⁰Jacob-aam-llu qanrutak Simeon-aankuk Levi-aq-llu, “Picurlak wangnun tuc'etartek; waniwa Canaanite-at Perrizzite-at-llu yuut-llu tamarmeng tamatum nunam yuin eq'ukarkaurtaatnga. Ikgetukut wangkuta; quyurrluteng curukaqunegtekut piunrirciqaitkut tamamta.”

³¹Tau͡gaam elkek qanertuk, “Canrituq-qaa nayagarpuk akissutun pitarrluku pingraatgu?”