Read Yupik Genesis 35 Bible Online

Genesis 35 - Yupik bible

Genesis 35

¹Agayutem qanrutaa Jacob-aaq, “Upluten egmian ayii Bethel-aamun uitaluten-llu tuani. Ekuavililuten-llu wangnun Agayutmun alairvikestellerpenun tuani qimallerpeni amaqlirpenek Esau-mek.”

²Jacob-aam ilani ellmini-llu uitalriit qanrutai, “Ciqiciki agayutnguat avalici; menuircarci ac'inqiggluci-llu.

³Upluta ayagnaurtukut Bethel-aamun, tuani ekuaviliniartua Agayutmun kiustellemnun nanikuallemni nayurlua-llu natmun tamiin ayallemnun.”

⁴Jacob-aamun-llu tunait tamalkuita agayutnguat avaliteng, aqliteteng-llu atuqeteng; Jacob-aam-llu elautai iirluki napam acianun Shechem-aam canianelngurmun.

⁵Tamaani pektaullratni Agayutem alingevkarai cakneq avaqliit yuut nunani, kingunrirturtaunateng-llu Jacob-aam yui.

⁶Jacob-aaq-llu tekituq malini-llu tamarmeng Luz-amun, maa-i nallunrilkiitnun Bethel-aaruluku Canaan-aami.

⁷Tuani-llu ekuavililuni nuna-llu acirluku Elbethel-aamek, tuani Agayutem alairvikellruani qimallrani anngarminek.

⁸Rebecca-m kevgiurtii Deborah tuquuq, tungmagtaat-llu napam acianun ungalalirnerani Bethel-aam. Taumek aterpagtellrukiit “Napaa Qiatem.”

⁹Agayutem alairvikenqigtaa Jacob-aaq atawaqertelluku-llu uterrnginanrani Mesopotamia-mek.

¹⁰Agayutem qanrutaa, “Atren Jacob-aaruuq, tau͡gaam aterpagtenrirciqaatgen Jacob-aamek Israel-aamek tau͡gaam.” Tua-i aterpagtelangaat Israel-aamek.

¹¹Agayutem-llu qanrutaa, “Wiinga Agayutnguunga Artuqailnguq: Irnialingkina. Atanruviit kinguvarciqut elpenek, ciuliaqeciqaatgen-llu angayuqat.

¹²Nuna cikiutekelqa Abraham-aamun Isaac-aamun-llu elpenun cikiutekciqaqa kinguverpenun-llu.”

¹³Nutaan-llu Agayutem unitaa.

¹⁴Tuani-llu Agayutem qalarusvillrani Jacob-aaq naparciuq teggalqumek umyuaqutkauluku, kencignarcaraa-llu qainganun kuvevikluku wine-amek olive-aat-llu uquatnek.

¹⁵Jacob-aam aciraa tauna Agayutem qalarvillra ellminun Bethel-aamek.

¹⁶Ayagtut Bethel-aamek, yaaqsigluku-llu cali Ephrath-aaq Rachel-aaq teggiurciuq cakneq au͡gtarnaqluni.

¹⁷Teggiurcian cakneq irnivkartekaan qanrutaa, “Alingevkenak, allamek cali qetunrangqatartuten.”

¹⁸Yuucimi-llu unisnginanrani (tua-i tuani tuquami) aciraa Benoni-mek,[48] tau͡gaam atiin aciraa Benjamin-aamek.[49]

¹⁹Rachel-aaq tuquuq tungmagcimaluni-llu Ephrath-amun (tauna Bethlehem-aaruuq) tumyaram canianun.

²⁰Jacob-aaq-llu teggalqumek naparciuq umyuaqutmek, tauna-llu cali uitauq man'a engelkarrluku.

²¹Jacob-aaq cali ayagtuq arulairluni-llu yaatiinun qertulriartaan Eder-aam.

²²Jacob-aaq uitallrani tamaani nunami Reuben-aam akusrarutekaa Bilhah atami nulirruara; Jacob-aam-llu tuaten pillra niilluku cakneq qenertuq. Jacob-aaq qetunrangqertuq qula malrugnek cipluku.

²³Leah-m qetunrai: Reuben (Jacob-aam yung'eqarraarutii), Simeon, Levi, Judah, Issachar, Zebulun-aaq-llu.

²⁴Qetunrai Rachel-aam: Joseph-aaq Benjamin-aaq-llu.

²⁵Bilhah-m qetunrai Rachel-aam pistiin: Dan-aq Naphtali-llu.

²⁶Zilpah-m qetunrai Leah-m pistiin: Gad-aq Asher-aaq-llu. Ukut waniwa Jacob-aam irniari yuurtellret Mesopotamia-mi.

²⁷Jacob-aaq tekituq ataminun Isaac-aamun Mamre-mi wall'u Kiriatharba-mi (Hebron-aami-wa), Abraham-aankuk Isaac-aaq-llu uitavikellragnun.

²⁸Isaac-aaq unguvallruuq allrakuni yuinarni pingayunlegni (160)

²⁹tuquluni-llu ak'allaq'apiaraurrluni; qetunraagken-llu Esau-nkuk Jacob-aaq-llu tungmaggluku.