Read Yupik Genesis 37 Bible Online

Genesis 37 - Yupik bible

Genesis 37

¹Jacob-aaq-llu uitaurtuq Canaan-aami atami uitavikellrani.

²Man'a qanemciuguq Jacob-aam ilainek. Joseph-aaq allrakungluni akimiaq malrugnek cipluku qusnginek qusngirngalngurnek-llu qaunqiuq anelgutni-llu Bilhah-nkuk Zilpah-llu irniakek. Atani-llu qanrucartularaa anelgutni inerciigalliqaqata.

³Jacob-aam-llu kenkenrullrua Joseph-aaq ilaini, irniaqsagutellruamiu angutngurrnermikun; aturalia-llu akurtulriamek alilegmek.

⁴Anelgutain tau͡gaam nallunriamegteggu atameggnun kenkenrucia ellmeggni e'quyagutaat qancurlagaqurangluku-llu.

⁵Caqerluni Joseph-aaq qavangurturtuq, anelgutminun-llu qavanguni qanemcikellrani nutaan eq'ukevsiaraat.

⁶Waten qanemcitai, “Niiciu qavangurtulqa:

⁷Naucetaarvigmi tamamta mukaarkanek qillerqiukut, wiinga-llu qillerqaanka ellmeggnek napartut; elpeci-llu qillerqaaci qillerqaama avatiinun quyurrluteng ciktaarvikluki qillerqaanka.”

⁸Anelgutain qanrutaat, “Angayuqrurteqatalliuten atanirturluta-llu?” Nutaan anelgutain eq'ukekaniraat qavangui pitekluki, tuaten-llu ayuqelriakun qanrutkucirteng pitekluku.

⁹Allamek cali qavangurtunqigtuq qanemcikluku-llu anelgutminun, qanerluni, “Allamek cali qavangurturtua, akertem̄un, iralumun, qula-llu ataucimek cipluku agyanun ciktaarvikevkarlua.”

¹⁰Tau͡gaam ataminun qanemcikellrani qavanguni, atiin nunuraa, qanrulluku-llu, “Cauga man'a qavangurtullren? Wangkuta-qaa ilavni tamalkumta ciktaarvikciqamteggen?”

¹¹Anelgutain ciknakaat, tau͡gaam atiin qanellri umyuaqurarai.

¹²Caqerluteng anelgutai Joseph-aam atameng katngautai auluknaluki ayaggaartelluki Shechem-aamun,

¹³Jacob-aam qanrutaa Joseph-aaq, “Ayaasqumaamken anelgutevnun katngagnek aulukilrianun Shechem-aami.” Joseph-aaq kiuguq, “Upingaunga.”

¹⁴Jacob-aam qanrutaa, “Ayagluten paqeski anelgutvet qaillun ayuquciat, katngat-llu; tailuten qanrucarturniarpenga.” Tua-i ayagcetaa kuignayuanek Hebron-aam, tekilluni-llu Shechem-aamun.

¹⁵Angutet-llu iliita tangrraa tarratellrani yuilqumi; apluku-llu, “Camek yuarcit?”

¹⁶Joseph-aam kiugaa, “Anelgutemnek yuartua qaunqilrianek katngameggnek. Qanrusnga nallunrilkuvgu nanluciat.”

¹⁷Angun qanertuq, “Ak'a ayallruut. Niitellruanka qanellratni Dothan-aamun ayakatarniluteng.” Joseph-aam-llu kingunrirturluki nalaqai Dothan-aami.

¹⁸Yaaqsigluku anelgutain tangrraat, canimellivailgan-llu picirkiurtut tuqutnaluku.

¹⁹Qanruyutut, “Qavangurturta agiirtuq.

²⁰Tuquskilaut, petmiit-llu iliitnun igtelluku; qanerniartukut yuilqurmiutarmun ungungssimun nerniluku, tangerrniarput qaillun qavanguin iqungqerrarkauciat.”

²¹Tau͡gaam Reuben-aam niicamiki anirtungnaqsaaqaa Joseph-aaq qanerluni, “Tuqutevkenaku.

²²Igceciu tau͡gaam petmigmun maani yuilqumi. Akngircaqunaciu.” Tuaten qanertuq nuggnaluku petmigmek ut'rulluku-llu atiinun.

²³Joseph-aaq tekican ilain matartaat aturaa alilek akurtulria yuuvkarluku.

²⁴Igcetaat-llu petmigmun. Petmik tauna imaituq mertaunani-llu.

²⁵Aqumluteng ner'ut, kiarcameng-llu tangertut Ishmaelite-anek agiirtellrianek Gilead-aamek, ungungssit atmagluteng tepkegcilrianek ayuqenrilngurnek, ayagluteng Egypt-aamun.

²⁶Tua-llu Judah-m ilani qanrutai, “Camek wangkuta unangengaitukut tuquskumteggu anelgutvut, aassaqutekluku-llu.

²⁷Ishmaelite-anun tunenaurput wangkuta tuqutevkenaku, anelgutekngamteggu nakmiin ilakluku.” Ilai-llu qanellranun maligarutut.

²⁸Midianite-at kupcaat tamaaggun kitullratni Joseph-aaq nugtaat petmigmek, tunluku-llu Ishmaelite-anun yuinarnun (20) qerrirlinun. Taukut-llu ayautaat Egypt-aamun.

²⁹Reuben-aam paqcamiu petmik Joseph-aaq tuantenrilan aturani allgurai cakneq angniinani.

³⁰Uterrluni-llu ilani qanrulluki, “Tan'gaurluq tayima cataituq, qaillun tua-i wiinga waniwa piciqsia?”

³¹Joseph-aam aturaa piamegteggu qusngirngalngurmek tuqucirraarluteng, auganun akurqauraat.

³²Aturaq-llu tauna atameggnun ayaulluku qanrutaat, “Nataqerput una tailluku-llu elpenun elitaqnayukluku qetunrarpet pikekaku.”

³³Jacob-aam elitaqaa qanerluni-llu, “Qetunrama aturaqaa; yuilqurmiutaam ungungssim nerrlinia; Joseph-aaq tua-i nallunaunani caunriumauq.”

³⁴Jacob-aam-llu aturani allgurai, missuullermek-llu all'uni angniilutkaa qetunrani amllerni ernerni.

³⁵Tamarmeng qetunrain paniin-llu qarutengnaq'laryaaqaat, tau͡gaam qarutesciigatuq qanerluni, “Tuqumalriit nuniitnun ayagciqua qetunraqa angniiluteknginanemni.” Tuaten atiin angniilutkaa.

³⁶Tuaten piinanratni imkut Midianite-at ak'a Joseph-aaq tunellrurtaat Egypt-aami Potiphar-aamun, angayuqam Pharaoh-m atanerruarin iliitnun. Tauna atanruviim murilkestaini ciuqliuluni.