Read Yupik Genesis 38 Bible Online

Genesis 38 - Yupik bible

Genesis 38

¹Taum nalliini Judah-m ilani unilluki uitallgucillrua Hirah, Adullam-aarmiu.

²Tuani Judah kenkiuq Canaan-aarmiumek nasaurlurmek, atii aterluni Shua-mek. Tauna nuliqsagutaa,

³qetunrangluni-llu elliikun acirluku-llu Er-amek.

⁴Ataam qingaami qetunranguq cali, acirluku-llu Onan-aamek.

⁵Allamek cali qetunranguq acirluku-llu Shelah-mek. Judah Achzib-aami uitallruuq tauna tan'gaurluq yuurtellrani.

⁶Ciuqliq qetunrani Er-aq Judah-m nulirturcetaa Tamar-amek.

⁷Er-am ayuqucia assillrunrituq ilulliqevkarluku ATANEQ, taumek ATANREM tuqutellrukii.

⁸Judah qanertuq Er-am kinguqlianun Onan-aamun, “Anngairutvet nulirra ullagluku tutegyarturru. Cakiraqngaten picirkiun tamatumun taqumalria aturyarturru anngaan kinguvengqerrniartuq.”

⁹Tau͡gaam Onan-aam nallunrilamiu qingiutni elliin kinguveqngailamiki cailkamun maq'ilartuq anngani kinguverkiuryuumiinaku.

¹⁰Tuaten pillra ilukegcitkenritaa ATANREM, taumek tauna-llu tuqutaa.

¹¹Tua-llu Judah-m ukurrani Tamar-aq qanrutaa, “Uterrluten atavnun uilgaugurniartuten Shelah qetunraqa anglirinatkaanun.” Tuaten qanertuq alingami tuqunayukluku anngaagketun. Tua-i Tamar-aq atami eniinun ayagtuq uitayarturluni.

¹²Tamatum kinguani Judah-m nulirra tuquuq. Tuqullrem kinguakun piciryararteng pelluan ayagtuq Timnah-mun yugnikek'ngani Hirah Adullamite-aq malikluku, qusngiminek asmegcilriit ullagluki.

¹³Tua-i iliita Tamar-aq qanrutaa cakia ayakatarniluku Timnah-mun qusngiminek asmegciyarturluni.

¹⁴Qanrucatni tuaten yuugai aipainertaat aturani, 'lumarrarmek-llu at'uq, kegginani-llu capkucirluku aqumuq Enain-am iteryaraanun. Tauna nunacuarauluni tumyarami Timnah-mun. Elliin nalluvkenaku Shelah-m yun'erraurucia, tau͡gken taumun cali nulirkiutekumaksaunani.

¹⁵Judah-m tangrramiu akissuuyukluku umyuartequq kegginani patumiiku.

¹⁶Tumyarat caniatni uitallrani ullagaa qanrulluku-llu, “Tailuten arnaqnaamken.” (Elliin nalluluku ukurraqucia.) Arnam qanrutaa, “Camek-mi cikirciqsia arnaqevkaquma?”

¹⁷Ellii kiuguq, “Payugceciiqamken katngautma piyagaita iliitnek.” Arnam kiugaa, “Camek kitak asguranairutkarpenek cikirnga avaliqerkamnek taicetnatkarpenun ungungssim piyagaa akqutkellren.”

¹⁸Angun qanertuq, “Camek cikiisqessit?” Arnam kiugaa, “Takarnarqucirissuutevnek uyamigtuumaan ayarurpenek-llu.” Tua-i taukut tunai arnaqluku-llu, arnaq-llu qingarluni.

¹⁹Arnaq makluni an'uq kegginami-llu capii au͡g'arluku, uilgaussuutni-llu all'uki.

²⁰Judah-m-llu tuyuqaa ungungssiyagaq akqutkellni yugnikekmikun Adulamite-akun, taukut-llu asguranairutkellni arnamek tegusqelluki, tau͡gaam taum arnaq nalaqesciigataa.

²¹Enaim-am yui angutet apqaurai, “Nauwa imna akissuq maantelleq tumyarat caniatni?” Taukut kiugaat, “Man'a akissurtangqeqsaituq.”

²²Tua-i utertuq Judah-mun qanerluni-llu, “Nalaqenritaqa. Angutet-llu tamatum yuin qanrutaatnga akissurtangqeqsaitniluku tamaani.”

²³Judah kiuguq, “Tua-i tamakut elliin piksagulliki, temciksuaraitkuk. Akilingnaqsaaqaqa tua-i, tau͡gaam nalaqenritan.”

²⁴Iralut pingayun kinguatni Judah qanrutaat, “Tamar-aq ukurraan akissuullrulliniuq, maa-i-llu qingarluni.” Judah-llu qanertuq, “Anulluku ekuavkarciu.”

²⁵Anusnginanratni Tamar-am qanrucarturcetaa cakini, qanerluni, “Ukut pikestiita qingillruanga.” Qanerluni-llu cali, “Nallunairturciki kitumun pikuciat, takarnarqucirissuun, uyamigtuumarmi ayaruq-wa.”

²⁶Judah nallunairtuq ellminek pikniluki, qanerluni, “Canganarqenrituq. Wiinga pisqun aturarkaqa pillrunrilamku uingevkarluku qetunramnek Shelah-mek.” Judah taum kinguani taumek arniunqigtenrituq.

²⁷Irnillerkaa pinarian elpekaat malriqataucia.

²⁸Teggiurcillrani aipaan unatai an'ut; irnivkartiin-llu qillervikaa kavirlimek yualukamek qanerluni, “Una ciumek an'uq.”

²⁹Tau͡gaam unatni cayullrani aipaa ciumek an'uq, arnaq-llu qanertuq, “Waten cuna-wa elpet anyulriaten.” Taumek tauna aciraat Perez-aamek.[51]

³⁰Kinguakun aipaa-llu an'uq, unatmikun kavirlimek yualukamek nallunailkutalek; aciraat tauna Zerah-mek.[52]