Read Yupik Genesis 39 Bible Online

Genesis 39 - Yupik bible

Genesis 39

¹Joseph-aaq ayaucimallruuq Egypt-aamun, Potiphar-aam-llu Egypt-aarmiut angayuqrata atanerruaran kiputaa Ishmaelite-anek ayaucestellrinek tuavet.

²ATANREM nayuraa Joseph-aaq piluaqaraluni-llu yuuluni, eniini-llu angayuqami Egypt-aarmium uitaluni.

³Taum-llu nallunriraa Agayutmun nayuucia Joseph-aaq piluaqaravkarluku callra tamalkuan.

⁴Potiphar-aam ilukegcitkaa elliin-llu nakmiin pisteksagulluku, qaunqesten͞gurrluku eneminun cautminun-llu tamalkuita.

⁵Tuaken ayagluku Joseph-aaq pitekluku ATANREM atawaqercetai enelgutai cat-llu tamalkuita eniinelnguut naucetaarvii-llu taum Egypt-aarmium.

⁶Taumek cat tamalkuita Joseph-aamun aulukevkarai umyuarniuruteksuunaki, elliin tau͡gaam neqkani. Joseph-aaq yun'erraqegtaarauguq kenegnarluni.

⁷Kinguqvaarni angayuqran nulirran aglumakengaa unayaqluku-llu inartellguteksugluku.

⁸Tau͡gaam Joseph-aaq qessauq qanrulluku angayuqami nulirra, “Maanlama uin camek umyuarniuqsaitelartuq, cautminun-llu tamalkuita qaunqesten͞gurrlua.

⁹Ellmitun pitavkarlua maancetaanga, cat tamalkuita umyugiurutkevkarluki elpet tau͡gaam, tua-i-wa nuliqngamiten. Qaillun tua-i wiinga waten piciqsia assiilngurmek, Agayutmun assiilngirlua.”

¹⁰Joseph-aam unuaquaqan unayaqengraani ilangciksaitaa, arnaqeksaunaku aipaqeksaunaku-llu.

¹¹Tau͡gaam erenret iliitni enemun itellrani caliani caliaqsarturluki, allamek-llu enem ilua yugtaunani,

¹²arnam aturaakun tegua qanrulluku, “Inglemni inarrnaurtukuk.” Tau͡gaam Joseph-aam aturani unilluku tegumiara qimagtuq enemek anluni.

¹³Anngan qimagluni aturani unilluku,

¹⁴arnam enemi pistet taisqai qanrulluki-llu, “Tangerciu una Hebrew-q aiparma taitellra picingssautekesqelluta. Calluglua arnaqengnaqsaaqaanga, tau͡gaam wiinga aarpagaunga pitacirramtun.

¹⁵Aarpagiima qimagtuq anqerrluni aturani unilluku.”

¹⁶Aturaq-llu tauna avaliqaa Joseph-aam angayuqra iternatkaanun.

¹⁷Pisten̄un-llu qanllermi ayuqiinek qanrulluku qanerluni, “Hebrew-q pista taitellren wangkutnun iterluni akusrarutekengnaqsaaqaanga.

¹⁸Qayagpagiima aturani unilluku qimallruuq.”

¹⁹Joseph-aam angayuqran niicamiu nuliani makunek qanellrani qenqe'rtuq.

²⁰Iterrluku-llu Joseph-aaq angayuqam itertain uitaviketukiitnun.

²¹Tau͡gaam ATANREM nayuraa Joseph-aaq atawaqertelluku-llu, iterciviim-llu qaunqestiinun elluarrluku pivkarluku.

²²Iterciviim-llu qaunqestiin aulukaaqsagucetai itengqalriit tamalkuita; itercivigmi-llu calallrit tamalkuita elliinun tunai ataniuresqelluki.

²³Iterciviim qaunqestiin umyuarniurutkenrirai Joseph-aam caliari, tua-i-wa Agayutem nayuaku piluaqerrlainartelluku callra tamalkuan.