Read Yupik Genesis 4 Bible Online

Genesis 4 - Yupik bible

Genesis 4

¹Adam-aam nuliani Eve-aq qingiraa. Qetunrangami Eve-aq qanertuq, “Agayutem ikayuanga qetunrangua.” Aciraa-llu Cain-amek.[7]

²Allamek qetunrangenqigcami Abel-aamek aciraa. Abel-aaq-llu qusngiliurten͞gurtuq, Cain-aq tau͡gken nauceciiyurten͞guluni.

³Erenret iliitni Cain-aq naucetaami ilaitnek elliiguq ATANERMUN.

⁴Abel-aaq-llu taituq qusngimi irniaqerraaranek. Assinqurra-llu ATANERMUN elliitekaa. ATANREM-llu ilukegcitkaa Abel-aaq elliitekellra-llu.

⁵Tau͡gaam ciuniunritaa Cain-am elliitii. Cain-aq-llu qenqe'rtuq qavyurrluni cakneq.

⁶ATANREM-llu qanrutaa Cain-aq, “Ciin qenercit? Ciin-llu qavyurcit?

⁷Elluarrluten pillrukuvet elliillerpeni ciuniullruya'arqa elliitekellren. Tau͡gaam assiilnguum ingcuraaten amigpet elatiini; atanirturyugyaaqluten, elpet tau͡gaam cirlaknarqan.”

⁸Cain-am-llu kinguqlini Abel-aaq qanrutaa, “Yuilqumun ayakarluk.” Yuilqumun-llu tekicamek Cain-am kinguqlini caugaa tuqulluku-llu.

⁹Taum kinguani ATANREM Cain-aq aptaa, “Nauwa-mi kinguqliin Abel-aaq?” Kiugaa, “Nalluaqa, kinguqlirma-qaa qaunqestekaanga?”

¹⁰ATANEQ-llu qanertuq, “Ciin waten pisit? Kinguqlirpet augan qayagauraanga nunamek.

¹¹Aniqlaamauten nauceciingairulluten kinguqlirpet auga nunamun meciucan tuqutellerpeni.

¹²Nauceciingnaq'nge'rpet nuna naugingaituq. Nunaunak qimagauciquten calliggluten nunami.”

¹³Cain-am ATANEQ qanrutaa, “Anucimirqecetaarutemni-lli arturnaqvaa.

¹⁴Nunamek uitavimnek antarpenga, ciuqerpenek-llu. Nunaunii qimagauciqua nunam qaingani, nalaqestem̄a-llu tuquciiqaanga.”

¹⁵Tau͡gaam ATANREM kiugaa, “Qang'a. Yuum tuquskaten malrunelgen yuut tuqucimaciqut akinaurulluten.” ATANREM-llu Cain-aq nallunailkuciraa aarcirtuutngusqelluku tuqucugtainun. Tauna tangerrluku tuqutesqevkenaku.

¹⁶Cain-aq-llu Agayutem ciuqerranek ayagtuq, uitaluni-llu Nod-ami, calaralirnerani Eden-aam.

¹⁷Cain-ankuk nuliani-llu qetunranguk Enoch-aamek. Nunaliuq nunarpagmek acirluku-llu qetunrami atranek.

¹⁸Enoch-aaq-llu qetunranguq Irad-amek, Irad-aq atakaa Mahujael-aam, Mahujael-aaq-llu qetunrangluni Mathusael-aamek, Lamech-aam atiinek.

¹⁹Lamech-aaq-llu malrugnek nulirturtuq, aipaa atengqerrluni Adah-mek aipaa-llu Zillah-mek.

²⁰Adah-llu qetunranguq Jabal-aamek. Taum kinguvri enengqertut pelatekanek, qunguturanek-llu anglicariluteng.

²¹Anelgutii-llu atengqertuq Jubal-aamek; taum kinguvri aturcetaanek elisngaut.

²²Zillah-llu qetunranguq Tubal-Cain-amek, tauna taqurqelartuq calissuutnek punernernek cavignek-llu. Nayagarluni-llu Naamah-mek.

²³Lamech-aam-llu qanrutak nuliagni, “Adah, Zillah, niicugnitegnga: Angutmek tuqucillruunga yaq'errlua akngircanga.

²⁴Cain-am tuqucimallra akinaurumakan, tuqulluki malrunelgen yuut, Wii akinaurucimaciqua tuqulluki yuinaat pingayun akimiaq malrugnek cipluku (77).”

²⁵Adam-aankuk nuliani-llu allamek qetunranguk, acirluku-llu Seth-amek.[8] Eve-aq qanertuq, “Agayutem allamek irniangevkaraanga Abel-aam cimirkaanek, Cain-am tuqutellran.”

²⁶Seth-aq-llu qetunranguq acirluku-llu Enosh-aamek. Taum nalliini yuut piicalangellruut ATANREM atra aturluku.