Read Yupik Genesis 40 Bible Online

Genesis 40 - Yupik bible

Genesis 40

¹Tamatum kinguani wine-anek kevgiurtiin Egypt-aam angayuqran kelipistain-llu ciuqliata umyugaa navgaak.

²Qenrutakluku-llu ukuk atanerruagni, ciuqliat wine-anek kevgiurtem̄i ciuqliat-llu kelipistem̄i.

³Iterrlukek-llu eniinun qaunqestet ciuqliata Joseph-aam itengqavianun.

⁴Ak'anun taukuk itengqauk, qaunqestet-llu ciuqliata Joseph-aamun kevgiurcetak.

⁵Unugmi ataucimi taukuk qavangurturtuk, qavangukek-llu ayuqenrilngurnek nalqiguterlutek.

⁶Joseph-aam ullallermini unuakumi elpekak camek umyuarniurlutek.

⁷Aplukek-llu, “Qaillun pilriatek kanangllugcetek unuamek?”

⁸Taukuk qanrutaak, “Qavangurtullruukuk, kitumek-llu pitaituq qavangumegnuk nalqigcestekaanek.” Joseph-aam kiugak, “Agayun nalqigciyugngavkarilartuq qavangunek, qanrutegnga qavangurpetegnek.”

⁹Kevgiurtet ciuqliata qavanguni Joseph-aamun qanemcikaa qanerluni, “Qavangumni tangertua wine-arkam avayaanek,

¹⁰tauna-llu pingayunek avayarluni. Cuyangami egmian naunrai naugut atsaurrluteng wine-arkauluteng ak'a qecugnariluteng.

¹¹Wiinga-llu angayuqam saskaanek tegumiarlua; tegullua atsanek mecuiriunga saskam iluanun, tunluku-llu elliinun.”

¹²Joseph-aaq qanertuq, “Qavangun waten ayuquq: pingayun avayat erenruut pingayun.

¹³Ernerni pingayuni angayuqam itengqanrirceciiqaaten ataam-llu calian caliaqsagutelluku, ciungani-llu pilaucirpetun angayuqaq merkaanek payugtelarciqan.

¹⁴Tau͡gaam umyuaqekia elluiluten uitakuvet, takumcuklua qanrutkekia angayuqamun, maaken anevkarniaraanga.

¹⁵Ilumun teguarullruunga Hebrew-t nuniitnek. Maani-llu camek piksauni itengqatkamnek.”

¹⁶Kelipistet ciuqliata niicamiu qavangum ayuqucia niitekegcinaqluku, qanertuq Joseph-aamun, “Wiinga-llu qavangurturtua issratet pingayun qamiquma qainganlluteng.

¹⁷Qullik'acagiit imarluni ayuqenrilngurnek kelipanek angayuqam neqkainek, tau͡gaam yaqulget nerait kelipat qamiqumni issratem iluani uitalriit.”

¹⁸Joseph-aam qanrutaa, “Qavangun waten ayuquq: taukut assigtat pingayun pingayuugut erenret.

¹⁹Ernerni pingayuni Egypt-aam angayuqran anevkarciqaaten, qamiqun-llu kepraarluku temen agarrluku napalriamun, tuani-llu yaqulget kemgen nerluku.”

²⁰Erenret taukut pingayuatni Egypt-aarmiut angayuqrat anutiirtuq, nerevkariluni-llu kelegluki pisten̄i tamalkuita. Wine-anek kevgiurten̄i kelipistet-llu ciuqliat itercivigmek anevkaraq taillukek-llu atanerruami ciuqerratnun.

²¹Wine-anek kevgiurtem̄i caliara ataam elliinun caliaqsagucetaa,

²²tau͡gaam agartaa kelipistet ciuqliat Joseph-aam qanellruciatun.

²³Taum-llu wine-anek kevgiurtem Joseph-aaq umyuaqeqaqsaitaa, tua-i nalluyagulluku.