Read Yupik Genesis 41 Bible Online

Genesis 41 - Yupik bible

Genesis 41

¹Allrakuk kinguagni Egypt-aarmiut angayuqrat qavangurturtuq nangengqaluni Kuigem Nile-am cen̄iini.

²Tangertuq nugelrianek kuigmek malrunlegnek kuluvagnek uqurilrianek, nerluteng-llu tamaani canegnek naumalrianek.

³Tuamta-llu allat malrunelgen kuluviit nug'ut kemgitqapiggluteng nangerngaluteng-llu nuniitni taukut allat kuluviit Nile-am cen̄iini.

⁴Taukut malrunlegen kemgilnguut kuluviit nerait uqurilriit. Egypt-aam-llu angayuqra tupakarluni.

⁵Qavanqigcami aipiriluni qavangurturtuq; tangerrluni-llu malrunlegnek mukaarkanek qerrunqeggluteng assirluteng naulrianek ataucimek acilqurluteng.

⁶Tuamta-llu allat mukaarkat naugut nauluaqaumavkenateng calaramek anuqem uulluki.

⁷Taukut-llu nauluaqaumanrilnguut mukaarkat nerait assirluteng naullret. Egypt-aam angayuqra tupakaami, maaten piuq qavangurtullinilria.

⁸Taum unuaquani umyuassuugartuq aqvavkarluki-llu angalkut tamalkuita umyuartulriit-llu Egypt-aami. Qavanguminek-llu qanemcilluki, tau͡gaam taukut qavangua nalqigtesciigataat.

⁹Tauna imna kevgaq wine-aliurta qanertuq angayuqamun, “Unuamek picurlallruciqa elpekaqa.

¹⁰Imumi qenrutellrukevkuk wiinga kelipistet-llu ciuqliat, iterrlunuk-llu eniinun kellutestet angayuqrata.

¹¹Caqerlunuk unuut iliitni qavangurturtukuk tamamegnuk, qavangupuk-llu allakarmeng nalqigutengqerrluteng.

¹²Hebrew-rtangqellruuq tuani ayagyuarluni, kellutestet angayuqrata kevgaqluku. Taum-llu qavangumegnek qanrucamegni nalqigutellruakuk, nalqigglukek tamarkenka ayuqenrilnguuk qavangupuk.

¹³Nalqigutellruciatun-llu tuaten pimallruukuk. Wiinga caliaqa ataam teguluku, kelipista-llu agarcimaluni.”

¹⁴Egypt-aam angayuqran aqvavkaraa Joseph-aaq, patagmek-llu taitaat itercivigmek. Ungairraarluni ac'inqigqaarluni-llu angayuqamun ag'uq.

¹⁵Egypt-aam angayuqran qanrutaa, “Qavangurtullruunga nalqigcestekaunani-llu. Qanelrianek niitellruunga elpet qavangunek niiqaarluki nalqigcituniluten.”

¹⁶Joseph-aam kiugaa, “Wangnek pisciigatua; Agayutem tau͡gaam nallunriryukevnek nalqiguciiqaaten.”

¹⁷Tua-i Pharaoh-m Joseph-aaq qanrutaa, “Qavangumni nangengqaunga Kuigem Nile-am cen̄iini;

¹⁸malrunlegen-llu kuluviit uqurilriit nug'ut Nile-amek, nerluteng-llu cen̄am evginek.

¹⁹Tua-llu allat cali malrunlegen nug'ut kinguatgun assirpek'nateng kemgitqapiggluteng-llu, tuaten-llu ayuqelrianek tangeqsaitua Egypt-aami tamiini.

²⁰Taukut kuluviit kemgilnguut nerait taukut malrunelgen ciumek nugellret,

²¹tau͡gaam nererraartelluki taukunek yuum nalluyaraa nerellruciat, ayuqucimegcetun ayuqngata cakanirpek'nateng. Tua-i-llu tupakarlua.

²²Qavangumni cali tangertua mukaarkanek malrunlegnek assirluteng nauluaqaumaluteng ataucimek acilqurluteng.

²³Cali-llu allat malrunlegen naugut, kinerrluteng, aminateng, calaram anuqem uuvkallri,

²⁴taukut-llu amilnguut nerait taukut assilriit. Makunek qanemcicaaqanka angalkut, tau͡gaam iliita nalqigutenritaanga.”

²⁵Joseph-aam qanrutaa Pharaoh, “Qavangugken ataucimek nalqigutengqertuk; Agayutem nallunrircetaa elpenun piarkani.

²⁶Malrunlegen assilriit kuluviit, malrunlegen-llu assilriit mukaarkat allrakuugut malrunlegen; qavangun atauciuguq.

²⁷Malrunlegen kemgilnguut kuluviit, malrunelgen-llu mukaarkat anuqem calaramek uutellri cali allrakuugut malrunlegen, piitnallerkauluteng.

²⁸Tuaten piciquq qanrutellrucimtun, Agayutem nasvitaaten elliin piarkaminek.

²⁹Allrakuni malrunlegni cat nurnaitarkaugut Egypt-aami.

³⁰Tau͡gaam taukut kinguatgun nuna piitnarciquq allrakuni malrunlegni. Egypt-aarmiut-llu cirillerteng nalluyaguciiqat piitnaq tuskan, tua-i-wa kainiqellrata piunrirciqngaku nuna.

³¹Enuqitenritlerteng umyuaqngaitaat piitnam tuskateng, tua-i anagutarkaungami kainiqlerkaat.

³²Malrurqugnek qavangurtullerpet nallunairaa Agayutmun pinritevkenaku tuaten piarkaurcetellrucia, cali-llu ukaqvaggun tamana piarkauluni.

³³“Elpet cucukliyunarquten umyuartulriamek ayuqucingumalriamek-llu Egypt-aam atanirturtekaanek.

³⁴Allanek-llu cali atanerrualiluten avurtekanek ilaita nunam naugillrinek allrakuni malrunlegni cat nurnaitellratni.

³⁵Avurtelluki neqkanek taukuni neqkam nurnaitellrini, qemagtelluki tamakut qemaggvignun, nayurcirluki-llu.

³⁶Tamakut neqkat neqkautekesqelluki yugnun nunam piitnallran nalliini allrakut malrunlegen aturluki, yuut palunritniartut piitnam nalliini.”

³⁷Joseph-aam qanellri assikait Pharaoh-m atanerruarin-llu.

³⁸Pharaoh-llu qanertuq atanerruaminun, “Allamek-qaa yugmek nalaquciiqukut uutun Agayutem anerneranek avalingqelriatun?”

³⁹Pharaoh Joseph-aamun qanertuq, “Agayutem nasvicaten makunek elpetun ellatuluni umyuartulriartaituq.

⁴⁰Angayuquarciiqamken nunamnun, alerquutevnun-llu yuut tamarmeng maligngatarkaugut. Atanruvigmi tau͡gaam wiinga kiima quyinruciqua elpeni.

⁴¹Waniwa elpenun ataniumaarkaurcetaqa Egypt-aaq tamalkuan.”

⁴²Tua-i Pharaoh-m takarnarqucirissuutni kulun yuuluku Joseph-aamun ac'etaa. Aturaqegtaarnek-llu at'elluku, suulutaamek-llu taqumalriamek uyamilirluku.

⁴³Ayagassuutmi-llu aipaigkenkun ayagaarkaurtelluku, ayagaaqan-llu ciunrani kellutestem̄ek ciuqlingqelartuq, qayagauraaqluni, “Avici! Avici!” Tuaten piluku atanirturilriarurcetaa Egypt-aami tamalkuan.

⁴⁴Cali Pharaoh-m Joseph-aaq qanrutaa, “Wiinga angayuqaugua, yuk camek pisqevvailegpeni pingaituq Egypt-aami tamalkuan.”

⁴⁵Pharaoh-m Joseph-aaq Egypt-aarmiucetun aciraa, Zaphenath Paneah-mek nulirturtelluku-llu Asenath-aamek, Potipher-aam, agayulirtem nunarpagmi Heliopolis-aami panianek. Joseph-aaq allrakungluni yuinaq qulmek cipluku (30) kevgiungellrua Egypt-aarmiut angayuqrat. Atanruvigmek-llu ayiimi ayagallruuq tamiinun nunamun tamaani.

⁴⁶

⁴⁷Taukuni malrunlegni allrakuni cat nurnaitellratni naucetaat nauluaqerturalartut.

⁴⁸Joseph-aaq-llu neqkanek quyurtuq taukuni allrakuni malrunlegni naucetaat nauluaqallratni; qemagciluni neqkanek tamalkuitni nunarpagni avataitni naucetaarvignek uitalrianek.

⁴⁹Joseph-aaq-llu qemagciuq neqkanek amllernek, imarpiim cen̄iini qau͡gyatun amllertalrianek, uspernanrirluki-llu amllerem ugaani uqamaltassiallerkaat caperrnarian.

⁵⁰Piitnaq nunamun tupailgan Joseph-aaq qetunrangellruuq malrugnek Asenath-aakun nuliamikun, Potipher-aam agayulirtem paniakun.

⁵¹Qanertuq, “Agayutem nalluyagucetaa nangtequalqa ilanka-llu tamalkuita”; taumek aciraa ciuqliq qetunrani Manasseh-mek.[53]

⁵²Cali-llu qanertuq, “Agayutem irniangevkaraanga nunami nangteqvimni”; taumek aciraa kinguqlia qetunrami Ephraim-aamek.[54]

⁵³Allrakut malrunlegen cat nurnaitellrat Egypt-aami iquklitut,

⁵⁴malrunlegen-llu allrakut nunam piitnallerkaa ayagnirtuq, Joseph-aam qanellruciatun. Piitnarluni-llu nunani tamalkuitni; tau͡gaam Egypt-aami tamalkuan neqkartarluni.

⁵⁵Egypt-aarmiut neqkairucameng kaigavikaat Pharaoh neqkameggnek pisqelluteng. Pharaoh-m-llu qanrutai, “Joseph-aaq ullagciu qanellra maligtaquluku piniartuci.”

⁵⁶Piitnaq nunanun tamalkuitnun tuc'an, Joseph-aam ikirtai qemaggviit, tun'ivikelarai-llu Egypt-aarmiut tamaaken piitnaq anagucan.

⁵⁷Cali-llu nunanek tamalkuitnek tailartut Egypt-aamun kipussaagluteng neqkanek Joseph-aamek, piitnaq arenqialan nunami tamalkuan.