Read Yupik Genesis 42 Bible Online

Genesis 42 - Yupik bible

Genesis 42

¹Jacob-aam nallunriamiu neqkartangqerrucia Egypt-aami, qetunrani qanrutai, “Ciin ellmikun uitaluci tangertaaguceci?

²Niitua neqkartangqerrniluku Egypt-aami; ayagluci tuavet kipucarturci neqkamten̄ek palunritniartukut.”

³Tua-i qulnguluteng Joseph-aam anelgutai ayagtut Egypt-aamun kipucarturluteng neqkanek.

⁴Tau͡gaam Jacob-aam maligucetenritaa Benjamin-aaq Joseph-aam kinguqlia anngainun, aaryugluni picurlagnayukluku.

⁵Jacob-aam qetunrai kipussaagtut allanun ilaulluteng kipussaalrianun, piitnaan-llu cali Canaan-aami.

⁶Joseph-aaq nunam angayuqaqaa; ellii-llu tun'isten͞guluni yugnun tamalkuitnun. Tua-i Joseph-aam anelgutai taingameng ciktut ciuqerranun nuna kegginameggnek agturluku.

⁷Joseph-aam anelgutni tangrramiki elitaqai, tau͡gaam nallunguarai qancurlagalluki-llu. Qanrutai, “Naken piceci?” Taukut kiugaat, “Canaan-aamek piukut neqkanek kipussaagluta.”

⁸Joseph-aam anelgutni elitaqai, ellaita tau͡gken elitaqevkenaku.

⁹Joseph-aam-llu neq'erai qavanguq'lallni ellaitnek; qanrutai-llu, “Nunamek paqtellriaruuci, nuna man'a paqtarci nallunrirnaluci nau͡gg'un cirlakumallerkaanek.”

¹⁰Ellaita qanrutaat, “Qang'a, neqkanek kiputnaluta tau͡gaam taillruukut.

¹¹Ataucim angutem qetunraqaakut, piciuluta yuulriaruukut nunamek paqtellriaruvkenata.”

¹²Joseph-aam qanrutai, “Qang'a, nunam mat'um nau͡gg'un cirlakumallerkaanek paqtellriaruuci.”

¹³Taukut qanertut, “Wangkuta qula malrugnek cipluku anelgutkelriaruukut ataucimek ataluta, Canaan-aami; kinguqlikacaarput watua atamini uitauq, aipaa tau͡gaam piunrillruuq.”

¹⁴Joseph-aam tau͡gaam qanrutai, “Qanellrucimtun nunamek paqtellriaruuci.

¹⁵Waten iqluunrilucirci naspaaciqaqa: waniwa ukvernarcariunga atanrem atrakun; maaken ayagngaituci kinguqlikacaarci tainatkaanun.

¹⁶Ilasi utertelluku aqvavkarciu, unegtellriani itengqaniartuci nallunairumanatkaanun iqluunrilucirci, wall'u ilumun nunamek paqtellriaruuci.”

¹⁷Tamalkuita-llu itengqavkarai pingayuni ernerni.

¹⁸Erenret pingayuatni Joseph-aam qanrutai, “Waten pikici unguvayukuvci, wiinga qigcikngamku Agayun:

¹⁹Piciulriaruluci yuukuvci ilasi unegceciu itengqavkarluku, elpeci ut'rutniartuci ilavci neqkaitnek.

²⁰Kinguqlikacaarci taitarkaugarci wangnun, qanllerci asguranairluku, tuqunritniartuci.” Tuaten tua-i piyugtut

²¹ellmeggnun qanruyulluteng, “Ilumun wangkuta pinarqelriaruamta kinguqlimten̄un, nanikualuni kaigavikengraakut niitellrunrilamteggu, tua-i maa-i pinerrlugcecimalriakut.”

²²Reuben-aam kiugai, “Nauwa qanrutellruyaaqamci assiinaku tan'gaurluq pisqevkenaku. Tau͡gaam niitellrunritarpecia. Tua-i waniwa tuqucillemta akia aturarput.”

²³Nalluat Joseph-aamun qanllerteng taringuraucianek, qanercirluni qalarutellruateng.

²⁴Joseph-aam uniarrluki aluviliurtuq. Ataam qalarcugngariami ullagai, Simeon-aaq-llu tangvagtelluku ellaitnun qillerqaa.

²⁵Joseph-aaq-llu alerquiguq imiisqelluki issratait mukaarkanek, akiliutellrit-llu ataam ekesqelluki issrataitnun, taquitesqelluki-llu. Tua-i tuaten piit.

²⁶Taukut ucilirait ciulvateng neqkanek kiputellermeggnek ayagluteng-llu.

²⁷Iliita-llu callartellerminiu issratni ciulvani nerevkarnaluku arulairumallermeggni akiliutekellni nalaqai issratem paingani.

²⁸Anelgutni-llu qanrutai, “Akiliutekelqa utercetliniat. Tang waniwa issratma paingani!” Niicamegteggu ircaqruallagtut, uuleggluteng-llu tangertaagutut qanerluteng, “Ciin wangkuta Agayutem waten piakut?”

²⁹Tekicameng Jacob-aamun atameggnun Canaan-aami qanemcikaat tamana tuaten pimallerteng:

³⁰“Angutem nunam angayuqran qancurlagataakut, nunamek-llu paqtellriaruniluta.

³¹Wangkuta qanrutarput, ‘Wangkuta piciulriaruluta yuugukut, nunamek paqtellriaruvkenata.

³²Qula malrugnek cipluku anelgutkelriaruukut atamta qetunraqluta. Atauciq tau͡gaam piunrillruluni, kinguqlikacaaq-llu maa-i uitauq atamini Canaan-aami.’

³³Taum nunam angayuqran qanrutaakut, ‘Uuggun nallunrirciqaqa piciulriarucirci: Ilasi unilluku maavet neqkanek ayauci kainiqellrianun ilavcen̄un.

³⁴Kinguqlikacaarci wangnun taitniarci. Nutaan nallunrirniarqa piciucirci nunamek-llu mat'umek paqtellriarunrilucirci; anelgutsi-llu ataam tunluku elpecen̄un, maani-llu elpeci kipussaalarniartuci.’”

³⁵Imairamegteki issrateteng, maaten piut tamarmeng akiliutekellrit issrataitni uitaluteng. Ellaita atameng-llu tangrramegteki akikalgiralteng kapegcugniurtut.

³⁶Jacob-aam qanrutai, “Angniilutkiurarpecia irniamkun: Joseph-aaq piunrirluni Simeon-aaq-llu, waniwa-llu cali ayaucugluku Benjamin-aaq. Wangnun tau͡gaam makut nangteqnarqelriit tut'ut.”

³⁷Reuben-aam atani qanrutaa, “Ut'rutenrilkumku Benjamin-aaq tuqutniagken wiinga malruk irniagka. Wangnun aulukevkaquvgu ut'ruciiqaqa.”

³⁸Tau͡gaam Jacob-aam kiugaa, “Qetunrama maliggngaitaaci, anngaa nauwa ak'a tuqullrulria, ellii kiimellirluni. Ayainanerpecen̄i picurlakan ak'allaurcama angniitem ugaani tuquvkarciqerpecia.”