Read Yupik Genesis 43 Bible Online

Genesis 43 - Yupik bible

Genesis 43

¹Piitnaq arenqiatuq anagulluni tamaani nunami.

²Nangucameng neqkanek Egypt-aamek pillermeggnek atiita qanrutai, “Ayagluci cali neqkaaramten̄ek kipucarturci.”

³Judah-m qanrutaa, “Angutem takarnarcarluni aarcirtullruakut waten, ‘Tangerrngaitarpecia kinguqlirpeci maligtenrilkaci.’

⁴Malikevkaquvgu kinguqlirput ayagciqukut kipucarturluta neqkamten̄ek.

⁵Tau͡gaam malikevkanrilkuvgu ayagngaitukut, taum angutem qanrutellruakut, ‘Tangerrngaitarpecia kinguqlirci malikenrilkuvciu.’”

⁶Jacob-aaq qanertuq, “Ciin picurlagcetaarcecia qanrulluku tauna allamek anelgutengqerrniluci?”

⁷Taukut kiugaat, “Angutem taum apqaunqegcaarallruakut wangkutnek tungelqumten̄ek-llu, qanerluni, ‘Atasi-qaa cali unguvauq? Allamek-qaa anelgutengqertuci?’ Qanrutqainallruarput apyutai makut kiuluki; qaillun nallunricarceta waten qanllerkaa, ‘Kinguqlirci taiskiciu?’”

⁸Judah qanertuq ataminun, “Maligutessgu Benjamin-aaq wangnun, upluta ayagniartukut, tuquvkenata unguvaniartukut, tamamta mikelngurtuumamta.

⁹Wiinga cayailkuciumaciqaqa; wangnun tusngavkarniaran. Utertenrilkuma malikluku wangnun tusngakili akwarpak.

¹⁰Qarivakanrilkumta ak'a ayallruyartukut malrurqugnek.”

¹¹Jacob-aam qanrutai, “Tua-i tuaten piarkaullinikan tuaten pikici. Ang'aqici cucunarqenritnek nunam mat'um atsainek, allanek-llu cali cikiutekarpecen̄ek ayaulluci.

¹²Akinek ayautellerci tapluku ayaulluci; akit-llu qemagcimallret issratevcen̄un malikluki nallumeggni ekellruyuarait.

¹³Kinguqlirci-llu malikluku, upluci ayagci ullagluku ataam tauna angun.

¹⁴Agayutem artuqailnguum takumcukevkaqilici taumun angutmun utercetnauraa anelgutsi unegtelleq Benjamin-aaq-llu. Yuarnayugarkaukuma irniamnek tua-i yuarnayugniartua.”

¹⁵Cikiutekameggnek piluteng akikateng-llu taptelteng tapeqluki, Benjamin-aaq-llu malikluku ayagtut Egypt-aamun, Joseph-aaq ullagluku.

¹⁶Joseph-aam Benjamin-aaq tangrramiu, malikelliniatgu, enemi aulukestii qanrutaa, “Enemnun ukut itruski, ungungssiarmek-llu tuquciluten neqkiurniartuten, ukut angutet nerellgucirciqaatnga erenrem qukallrani.”

¹⁷Tauna angun piuq Joseph-aam alerquuciatun, taukut-llu agulluki Joseph-aam eniinun.

¹⁸Taukut-llu alingut agucateng Joseph-aam eniinun, qanerluteng-llu, “Akit-wa ekumallret issratemten̄un taiqerraallemten̄i pitekluki maavet taiteskiikut, pitkaminek yuarluni, pisteksagutnaluta, ciulvaput-llu tegunaluki.”

¹⁹Tua-i enemun itqataameng Joseph-aam eniin murilkestii qanrutaat,

²⁰“Usuuq, wangkuta ciuqlirmek maavet taillruukut neqkanek kiputnaluta.

²¹Uterrnginanemten̄i-llu qavartarvigkamten̄un tekitellemten̄i issratput ikirtellemten̄i akiliutekelput nalaqaput issratemta paingitni ekumaluteng. Taumek waniwa ataam taiskeput.

²²Allanek-llu cali akinek tailluta neqkanek kipuyutkamten̄ek. Wangkuta nalluarput kitumun akit ekellruciit issratemten̄un.”

²³Pistem kiugai, “Umyuarniurutkenriciki alingevkenaci-llu. Agayutevci, atavci Agayutiin, ekellrungatai akit issratevcen̄un. Akiliuteci akurtullruanka.” Simeon-aaq-llu anutaa ellaitnun.

²⁴Pistem taum Joseph-aam eniinun itrucamiki mermek cikirai it'gait erurtelluki ciulvait-llu nerqelluki.

²⁵Taukut uptait cikiutekateng Joseph-aamun erneq qukaqan taigarkaungan, niicameng nerellgutkeciqniluku tuani.

²⁶Joseph-aaq eneminun taingan cikiutekateng elliinun ullautait cikluteng-llu ciuqerrani.

²⁷Apqaurai-llu qaillun ayuquciatnek, qanerluni, “Atasi-qaa qanrutkellerci angukar canrituq? Unguvauq-qaa cali?”

²⁸Taukut qanertut, “Pisten atavut cali unguvauq cavkenani.” Ciisqumiggluteng-llu ciktut ciuqerranun.

²⁹Kiarrluni tangrraa kinguqlini Benjamin-aaq aanami qetunraa, qanerluni-llu, “Una-qaa waniwa kinguqlikacaarci qanrutkellerci wangnun? Agayutem atawaqertelliten qetunramaa!”

³⁰Joseph-aam uniartai kinguqlirmi tangellranek cirliqngami keneksaaqluku. Kiimetqervigkaminek yuarluni uitaviminun itertuq, tuani-llu aluviliurluni.

³¹Ermiggaarluni an'uq, canrilvaguarluni-llu qanertuq, “Neqkat paivvnarii.”

³²Allakaan estuulumi ellii neqkiuraat, anelgutai-llu cali allakaita. Egypt-aarmiut-llu nerellgutkelallri cali allakaita. Egypt-aarmiut umyualngukaat nerrlerkarteng nerellgucirluki Hebrews-aat.

³³Anelgutai aqumevkallruit caumaluku Joseph-aaq, tungliqu'urtelluki anngaatnek yaavet kinguqlikacagiitnun. Taukut-llu anngaqellriit tangertaagutut irr'iluteng.

³⁴Neqkanek anelgutai neqliularait Joseph-aam estuuluanek. Benjamin-aaq tau͡gaam ilamini amllenruluni neqliurumaaqluni. Tua-i mertut nunaniryullgutekluku Joseph-aaq.