Read Yupik Genesis 44 Bible Online

Genesis 44 - Yupik bible

Genesis 44

¹Joseph-aam alerquraa pisten̄i, “Imiqiki ukut issratait pivigtutaciicetun, akikalgirait-llu issrataita paingitnun elliluki.

²Saskaqa-llu qerrirliq kinguqlikacagiita issratiin painganun akiutainun tapquulluku elliniaran.” Tauna-llu piuq alerquumacirmitun.

³Unuaquan tanqigiarautiini taukut ayagtut ciulvateng malikluki.

⁴Yaaqsigivailgata nunarpagnek Joseph-aam qanrutaa pisten̄i, “Maligeski imkut angutet; angukuvki qanrutniaten, ‘Ciin assilria assiilngurmek akinaurceciu? Ciin teglegceciu angayuqama qerrirliq saskaa?

⁵Tuaggun angayuqaqa meqainaqsaitelartuq, tau͡gaam cali ciunerkarcurcuutekaqluku. Picurlagtuci tuaten piluci.’”

⁶Taum anguamiki tuaten qalarutai.

⁷Taukut-llu kiugaat, “Ciin waten qalarcit wangkutnun? Wangkuta tuaten pingaitukut!

⁸Akit nalaqelput issratemten̄i ut'rutellruaput elpenun Canaan-aamek; qaillun tua-i piluta teglegciqseta qerrirlinek wall'u suulutaanek angayuqerpet eniinek?

⁹Ilamten̄ek nalaqekuvgu tauna tuqucimakili, wangkuta-llu angayuqerpet pisteksagulluta.”

¹⁰Tauna qanertuq, “Tuaten ayuqli qanrucirpetun; tau͡gaam kiimi tauna teglelleq saskamek pisteksaguciiqaqa, ilaini tau͡gken qaillun pimangaunaci.”

¹¹Tua-i tamarmeng patagmek issrateteng atrartait ikirrluki-llu.

¹²Yuariigai-llu ciuqlikacagiitnek ayagluki kinguqlikacagiitnun; saskaq-llu tauna nalaqaa Benjamin-aam issratiinek.

¹³Anngaqellriit-llu taukut aturateng allgurait qessanayugluteng. Ciulvateng-llu ucilirraarluki ataam utertut nunarpagnun.

¹⁴Judah anelgutni-llu tekicameng Joseph-aam eniinun, maaten piat cali tamaantellinilria. Tua-i nuna agturluku ciktut ciuqerranun.

¹⁵Joseph-aam qanrutai, “Qaillun piavci waten piceci? Nalluarci-qaa canek nallunriryugngaciqa ciunerkarcuryarakun?”

¹⁶Judah-m kiugaa, “Camek qanerciqseta elpenun, qaillun-llu pillrunrilucirput nallunairyugngaciqseta? Agayutem pinarqelriarucirput nasvagaa, tua-i tamamta pisten͞gurrnaurtukut saskam-llu avaliqestellra.”

¹⁷Tau͡gaam Joseph-aaq qanertuq, “Arenqia, qang'a! Tuaten wiinga piyunaitaanga! Saskam tau͡gaam avaliqestellra pisteksaguciiqaqa. Elpeci umyuarniurpek'naci uterrniartuci atavcen̄un.”

¹⁸Judah-m Joseph-aaq ullagluku qanrutaa, “Qanrutqernaamken niicugniqernga. Qenqerrucaqunii; elpet Egypt-aarmiut angayuqracetun pitalriaruavet.

¹⁹Nauwa aptellrukevkut qanerluten, ‘Atangqertuci-qaa allamek-llu anelguterluci?’

²⁰Waten-llu kiullruamteggen, ‘Atangqertukut angukara'urlurmek, kinguqlikacaarput-wa ak'allaurrnermikun atamta irniara. Anngaa tuqullruuq, ellii-llu kiimi ellirluni aanami irniarini. Atiin-llu kenekluku cakneq.’

²¹Elpet-llu qanellruuten taitesqelluku maavet tangerrnaluku.

²²Wangkuta-llu qanrulluten tan'gaurlurmun unitesciigatniluku atani; uniskani tuquciqngan.

²³Elpet tua-llu qanrutarpekut, ‘Kinguqlikacaarci malikenrilkuvciu tangenqiggngaitarpecia.’

²⁴“Utercamta atamten̄un qanemcitellruarput makunek qanllerpenek.

²⁵Atavut qanellrani, ‘Cali ayagluci kipucartuqerci neqkamten̄ek,’

²⁶qanrutellruarput, ‘Ayagciigatukut. Ciuniunqiggngaitaakut, malikekumteggu tau͡gaam kinguqlikacaarput. Tua-i malikarkaukumteggu ayagciqukut.’

²⁷Atamta waten qanrutaakut, ‘Nallunritarci nulirqa Rachel-aaq malrugnek tau͡gaam irniangellruuq wangkun.

²⁸Ak'a aipaan unitellrukiinga. Yuilqurmiutaat ungungssit allgurluku piunrillrulliatgu tayima tangenqigtenrilkeka ayaggaanranek.

²⁹Una-llu ayauskuvciu wangnek picurlagluni-llu, angukara'urluurcama angniitem ugaani tuquvkarciqerpecia.’

³⁰“Tua-llu waniwa, ut'reskumta atamten̄un, kinguqlimten̄ek malingqenritlerput elpekekuniu tuquciquq. Kenekngamiu nanelkauvkenaku-llu, cali-llu angukara'urluurcami, wangkuta angniilutkaanek pikumta angniitem ugaani tuquciquq.

³²Wiinga cayailkuciryullruaqa tan'gaurluq qanerlua, ‘Ut'rutenrilkumku elpenun wangnun tusngavkaqiu unguvarma taktaciatun.’

³³Wiinga tau͡gaam uitavkarnga pisten͞guvkarlua elpeni, una tan'gaurluq pivkarpek'naku, utertelluku ilai maliggluki.

³⁴Wiinga utercuumiitua atamnun tan'gaurluq malikevkenaku, tangerrsuumiilamku ataka umyugaa navgumaluku.”