Read Yupik Genesis 45 Bible Online

Genesis 45 - Yupik bible

Genesis 45

¹Joseph-aaq piningnaqesciigali'irtuq yuut nayurtem̄i takuatni, qanlerluni-llu anesqelluki tuaken tamalkuita. Tua-i Joseph-aaq allamek nayurtaunani nallunrircetuq anelgutminun.

²Joseph-aaq-llu aluviliurtuq qastuluni, qastum ugaani Egypt-aarmiut anellret niitaat, qaneryarturluteng-llu tamatumek Pharaoh-mun.

³Joseph-aam qanrutai anelgutni, “Joseph-aaruunga. Ataka-qaa cali unguvauq?” Tau͡gaam anelgutai kiusciigatut cakneq alingalliimeng.

⁴Joseph-aam anelgutni qanrutai, “Taikanirluci canimnun.” Tua-i ullakaniatni qanrutai, “Anelgutkarpecia Joseph-aaq, tunllerci Egypt-aamun.

⁵Uitacurlagyaqunaci tut'esteksaqunaci-llu tun'illerci ukunun wangnek pitekluku. Tang Agayutem tau͡gaam ayagcetellrukiinga ciuvciuggun yuut anirtuasqelluki.

⁶Maa-i piitnallrurtuq malrugni allrakugni; tayima cali allrakut talliman, taukuni yuk nauceciingaituq quyurcingaunani-llu.

⁷Agayutem ciuvciuggun ayagcetellruanga irr'inarqellriakun, piunrirpek'naci unegtausqelluci, elpeci kinguveci-llu.

⁸Elpeciingunrituq maavet ayagcecesteka, tau͡gaam Agayun. Elliin quyinrurtellua tamalkuitnun Egypt-aam atanerruarinun. Atanirturilriaruunga Egypt-aarmiunun tamalkuan.

⁹“Kitaki cukangnaqluci atamnun uterrluci qanrutniarci waten Joseph-aaq qetunraa qanerniluku: ‘Agayutem angayuqaurcetaanga tamalkuan Egypt-aamun; atatakutevkenak tamaa taikina.

¹⁰Uitaniartuten yaaqsigpek'nii Goshen-aam nuniini, elpet irniaten, tutgaraten, ungungssiuteten cauteten-llu tamalkurmeng.

¹¹Tuani uitakuvet aulukciqamken, tallimani cali allrakuni piitnararkaungan. Tamarpeci, ilaten ungungssiuteten-llu, kainiqenritniartuci.’”

¹²Joseph-aaq-llu cali qalartuq, “Waniwa iigpeciuggun tangrrarpecia, kinguqlirma-llu Benjamin-aam, tangerrluku Joseph-aaruciqa.

¹³Qanruskiciu ataka takarnarqucimnek maani Egypt-aami, qanemcitniarci-llu tangllerpecen̄ek tamalkuitnek. Cukangnaqluci ataka maavet taitniarci.”

¹⁴Akuqerluku Benjamin-aaq aluviliurtuq; Benjamin-aam-llu cali akuqaumaluku aluviliurluni.

¹⁵Aluviliurluni tamalkuita anelgutni akuqaqui, melugarluki tuaten. Taum kinguakun anelgutain qalarutaat.

¹⁶Egypt-aam angayuqran niicamiu Joseph-aam anelgutai tekitniluki ilukegciuq pistetuumarmi.

¹⁷Pharaoh-m qanrutaa Joseph-aaq, “Anelguteten qanruski uciliisqelluki ungungssiutait utertevkarluki-llu Canaan-aamun.

¹⁸Ataseng-gguq ilai-llu aqvalitki uterrluteng-llu maavet. Nunam assinqurranek Egypt-aami cikirciqanka, cat neqkait-llu cipnengqelarciqut maani.

¹⁹Alerqurluki-llu qamuruanek akalrialegnek ayautesqelluki Egypt-aamek irniarita nulirrita-llu ekumavigkaitnek, malikluku-llu ataseng ataam maavet utertesqelluki.

²⁰Cautmeggnek-gguq unicillerkarteng umyuarniurutkenrilkilitgu; cat assinkacagaitnek pingciqngata Egypt-aami.”

²¹Jacob-aam qetunrai qanrucimacimegcetun piut. Joseph-aam-llu qamuruanek akalrialegnek cikirai Egypt-aarmiut angayuqrata alerquuciatun, taquilluki-llu.

²²Tamalkuita cikirai nutaranek aturanek, Benjamin-aaq tau͡gaam cikiraa yuinarnek akimiarnek (300) qerrirlinek akinek tallimanek-llu aturanek.

²³Atani-llu tuyuraa makunek: qulnek ciulvagnek uciarluteng canek assilriarinek Egypt-aam, qulen-wa cali ciulviit arnacalut uciarluteng kelipanek neqkanek-llu atami taquarkainek.

²⁴Anelgutni ayagcetai qanrulluki, “Tumevcen̄i nakukucaqunaci.”

²⁵Tua-i ayagtut Egypt-aamek, tekilluteng-llu atameggnun Canaan-aami.

²⁶Ellaita qanrutaat, “Joseph-aaq unguvalliniuq atanirturilriaruluni tamalkuan Egypt-aamun.” Jacob-aaq-llu caciirtuq ukveqesciiganaki-llu.

²⁷Tau͡gaam qanemcicatni Joseph-aam qanellrinek, tangerrluki-llu ekumassuutekat Joseph-aam tuyuqellri Jacob-aaq caciirtellerminek ayaniriuq.

²⁸Qanertuq-llu, “Una ilatekaituq piyuumiuteka! Joseph-aaq qetunraqa cali unguvalliniuq! Tangerrsarturnarqaqa tuquvailegma.”