Read Yupik Genesis 46 Bible Online

Genesis 46 - Yupik bible

Genesis 46

¹Jacob-aaq ayagtuq pini tamalkuita ayaulluki, Beershebah-mun-llu tekicami ekuagiuq Agayutiinun atami Isaac-aam.

²Unugmi tangrruartelluku Agayutem qanrutaa Jacob-aaq qanerluni, “Jacob! Jacob!” Ellii kiuguq, “Waniwa wantua.”

³Agayun qanertuq, “Agayutnguunga atavet Agayutii. Alingyaqunak ayallerkarpenek Egypt-aamun; cakneq yugyangevkarciqamken.

⁴Maligciiqamken Egypt-aamun, cali-llu kinguveten ataam maavet nunamun ut'rutarkauluki. Joseph-aam nayurciqaaten tuqukuvet.”

⁵Jacob-aaq-llu ayagtuq Beersheba-mek. Qetunrain-llu ayautaat ataseng, nuliateng-llu irniartuumaita qamuruatgun akalrialegteggun Egypt-aarmiut angayuqrata ayaucetellrikun ekumavikesqelluki.

⁶Kuluvauteteng malikait akluteng-llu tamalkuita unakelteng Canaan-aami, ayagluteng-llu Egypt-aamun. Jacob-aam malikellrui kinguveni tamalkuita:

⁷qetunrani, tutgarani tan'gaurluut, panini tutgarani-llu nasaurluut.

⁸Waniwaugut ukut kinguvri Jacob-aam Egypt-aamun ayallermini malikellri: Reuben-aaq Jacob-aam ciuqlikacaaq qetunraa,

⁹Reuben-aam-llu qetunrai: Hanoch, Pallu, Hezron, Carmi-llu.

¹⁰Simeon-aam qetunrai: Jemuel, Jamin, Ohad, Jachin, Zohar, Shaul-aaq-llu Canaan-aarmium arnam qetunraa.

¹¹Levi-am qetunrai: Gershon, Kohath, Merari-llu.

¹²Judah-m qetunrai: Shelah, Perez, Zerah-llu. (Jacob-aam allak qetunraak Er-ankuk Onan-aaq-llu tuqullrulutek Canaan-aami.) Qetunraak-llu Perez-am Hezron-aaq Hamul-aaq-llu.

¹³Issachar-am qetunrai: Tola, Puah, Jashub, Shimron-aaq-llu.

¹⁴Zebulon-aam qetunrai: Sered, Elon, Jahleel-aq-wa.

¹⁵Ukut waniwa Leah-m qetunrai Jacob-aakun Mesopotamia-mi, pania-wa cali Dinah. Tamarmeng kinguvri Leah-kun amllertaut yuinaq qula pingayunek cipluku (33).

¹⁶Gad-am qetunrai: Zephon, Haggi, Shuni, Ezbon, Eri, Arod, Areli-llu.

¹⁷Asher-aam qetunrai: Imnah, Ishvah, Ishvi, Beriah, Serah-wa nayagaat. Beriah-m-wa qetunraak Heber-aankuk Malchiel-aaq-llu.

¹⁸Ukut akimiaq ataucimek cipluku kinguveqai Jacob-aam Zilpah-kun. Una pista cikiutekellrua Laban-aam paniminun Leah-mun.

¹⁹Rachel-aam-wa, Jacob-aam nulirran, qetunraak Joseph-aankuk Benjamin-aaq-llu.

²⁰Joseph-aaq-llu irniangellruuq Egypt-aami Manasseh-mek Ephraim-aamek-llu. Aanalutek Asenath-aamek Potipher-aam agayulirtem Heliopolis-aami panianek.

²¹Benjamin-aam qetunrai: Bela, Becher, Ashbel, Gera, Naaman, Ehi, Rosh, Muppim, Huppim, Ard-aq-wa.

²²Ukut Rachel-aam qetunraqai Jacob-aakun, akimiarunritarauluteng.

²³Qetunraa Dan-am: Hushim.

²⁴Naphtali-m qetunrai: Jahzeel, Guni, Jezer, Shillem-aaq-llu.

²⁵Ukut malrunlegen qetunraqai Bilhah-m, Laban-aam cikiutekellran Rachel-aamun paniminun.

²⁶Jacob-aam nakmiin kinguvri Egypt-aamun ayallret, ilakevkenaki Jacob-aam qetunrain nulirrit, amllertaut yuinaat pingayun arvinlegnek cipluku (66).

²⁷Joseph-aam-llu qetunraak Egypt-aami malruulutek. Yuinaat pingayun qulnek cipluku (70) amllertaluteng Jacob-aam ilai Egypt-aamun ayallret.

²⁸Jacob-aam Judah ciumegteggun ayagcetaa qanrutesqelluku Joseph-aaq pairrsaagesqelluteng Goshen-aami. Tuavet tekicata,

²⁹Joseph-aam ayagassuutni upluki pairrsaagaa atani Goshen-aami. Tangrrucamek Joseph-aam uyaqurrikun atani akuqerluku ak'anun aluviliurtuq.

³⁰Jacob-aam qanrutaa Joseph-aaq, “Nutaan kitaki tuqukilii tangrrumarillemni unguvaluten.”

³¹Joseph-aaq qanertuq anelgutminun ilaitnun-llu, “Egypt-aam angayuqra Pharaoh qanrucartuqata'rqa anelgutenka atama-llu ilai Canaan-aami uitallret tainiluki wangnun.

³²Qanruciiqaqa qusngiliurten͞guniluci ungungssinek aulukilriaruniluci ungungssiuceci-llu taitniluki, akluci-llu tamalkuita.

³³Pharaoh-m taisqekaci apluci-llu camek caliangqerrucirpecen̄ek,

³⁴pinritevkenaku qanrutniarci piyugngarirraanerpecen̄ek aulukilriaruniluci ungungssiarnek ciuliarpecetun. Tamana nallunriquniu uitavkarciqaaci Goshen-aam nuniini.” Joseph-aam waten qanrutai Egypt-aarmiunun qusngiliurtet pellernarqelriatun ayuqngata.