Read Yupik Genesis 47 Bible Online

Genesis 47 - Yupik bible

Genesis 47

¹Joseph-aam maligluni tallimanek anelgutminek angayuqaq ullagaa qanrulluku-llu, “Ataka anelgutenka-llu katngauteteng ang'aqluki akluteng-llu taigut Canaan-aamek, waniwa-llu uitaluteng Goshen-aam nuniini.”

²Talliman-llu taukut anelgutni ullautai angayuqamun.

³Pharaoh-m Joseph-aam anelgutai aptai, “Camek caliangqerceci?” Taukut kiugaat, “Wangkuta ciuliamcetun qusngiliurten͞guukut.

⁴Maani nunami uitayarturtukut, Canaan-aam nuniini piitnaq anagucan katngauteput neqkaitelartut. Uitavkaasqumayaaqukut Goshen-aam nuniini.”

⁵Tua-llu Pharaoh-m Joseph-aaq qanrutaa, “Atavet anelgutvet-llu ullagaatgen.

⁶Egypt-aami assinkacagiini nunam piyullermeggni nunaliyugngaut. Uitavkarki Goshen-aam nuniini; ilangqerqata-llu piyugngalrianek kuluvautemnek aulukivkarniaten.”

⁷Joseph-aam-llu atani taitaa itrulluku-llu Pharaoh-m ciuqerranun. Jacob-aam-llu atawaqaasqaa Egypt-aarmiut angayuqrat.

⁸Pharaoh-m aptaa Jacob-aaq, “Qaillun pitalriamek yuullrurcit?”

⁹Jacob-aam kiugaa, “Allrakuni yuinarni arvinlegni qulnek cipluku (170) yuullrurtua. Ikgetut nangteqnaqluteng-llu allrakut atullrenka, ayuqsugnaunateng unguvamallracetun ciuliama tarratellermeggni.”

¹⁰Jacob-aam cali atawaqercetraarluku an'uq angayuqam eniinek.

¹¹Tua-i Joseph-aam atani anelgutni-llu nunalgartai cikirluki nunam assinqurranek Egypt-aami, nunarpiim Rameses-aam yaaqsinrilkiini, atanrem alerquuciatun.

¹²Joseph-aam-llu neqkaitnek cikirai atani ilai-llu aulukaarit cuqekluki.

¹³Neqkartaitellruuq nuna tamarmi piitnaq anagucan, yuut-llu Egypt-aami Canaan-aami-llu kaillrata piniarulluki.

¹⁴Neqkanek kipuqurallratni Joseph-aam quyurrluki akit tamalkuita angayuqam eniinun qemagtai.

¹⁵Egypt-aarmiut Canaan-aarmiut-llu akikateng nangengata Egypt-aarmiut Joseph-aaq ullagaat qanrulluku-llu, “Neqkamten̄ek cikirkut! Tuquvkaryaqunata, akikairutukut!”

¹⁶Joseph-aam kiugai, “Ungungssiarauceci taiciki neqkanun navrutnianka akiutairuskuvci.”

¹⁷Ungungssiarauteteng tua-i taitait Joseph-aamun, elliin-llu naverrluki neqkanun horse-aat, qusngit, qusngirngalnguut, kuluviit ciulviit-llu. Tuani allrakumi neqkangqercetai navrulluki tamalkuitnun ungungssiarautaitnun.

¹⁸Allrakuq tauna pelluan, alla-llu ayagnirluni, yuut ullagaat Joseph-aaq qanrulluku-llu, “Aassaqusngaitamteggen akiutairuyucimten̄ek, ungungssiarauteput-llu tamalkuita piksagutaten. Camek allamek akikairutukut wangkutnek tau͡gaam nunautemten̄ek-llu.

¹⁹Tuquvkaryaqunakut, nunauteput yuirtelluki! Kipuskut nunauteput-llu, neqkanek akilirluta. Pharaoh-m wangkuta pistekniaraakut, nunauteput-llu piksagulluki. Cikirkut mukaarkanek unguvaniartukut, naucetaarkanek-llu nauceciiniartukut naucetaarvimteggun.”

²⁰Tua-i Pharaoh Joseph-aam kipuyutaa Egypt-aam nuniinek tamalkuan. Egypt-aarmiut-llu tamarmeng nunauteteng tunait qunukeng'e'rmegteki arenqialan anagulluni piitnaq; nuna-llu tamalkuan atanrem piksagulluku.

²¹Joseph-aam-llu pisten͞gurtai Egypt-aam yui tamalkuita.

²²Nunautait agayulirtet kiingita kiputenritai, camek tun'inarqenrilata angayuqam yuutekaitnek cikilaateng.

²³Joseph-aam yuut qanrutai, “Atam waniwa kiputellrurtamci nunautetuumarpeci angayuqamun piksagutelluci. Waniwa-llu naucetaarkat nauceciigarkaci naucetaarvigpecen̄un.

²⁴Quyurciyaram nalliini angayuqaq cikilararkaugarci quyurtellerpeci avenrita tallimaingitnek. Ilakuat elpeci irniartuumarpeci pikarkauluki neqkaqluki naucetaarkaqluki tuaten.”

²⁵Yuut qanertut, “Elpet tuquvkanritarpekut; assirluta-llu piuraavkut pisten͞gurciiqukut angayuqamun.”

²⁶Joseph-aam alerquutngurtaa nuniini Egypt-aam yuum quyurtaarin naucetaat avenrita tallimaingit angayuqam pikarkauluki. Tamana-llu alerquun maa-i cakaniqsaunani. Agayulirtet tau͡gaam nunautait kiingita piksagutenritai atanrem.

²⁷Israelite-at uitaut Egypt-aami Goshen-aam nuniini; tuani tukuurtut, irnialingameng-llu yugyangluteng.

²⁸Jacob-aaq-llu uitallruuq Egypt-aami akimiaq malrugnek cipluku allrakuni; tapeqluki allrakungluni yuinarnek malrunlegnek malrugnek cipluku (147).

²⁹Tuqullerkani Jacob-aam canimellian, taisqaa qetunrani Joseph-aaq qanrulluku-llu, “Unateten elliluki qugtuqagma akuliignun, navgarkaqenrilkevnek-llu akqi tungmaggngaitnilua Egypt-aami.

³⁰Tungmacimayugtua ciuliama nuniitnun; ayauskia Egypt-aamek tungmagglua-llu tungmagcimallrata nuniitnun.” Joseph-aam kiugaa, “Pisqellerpetun piciqua.”

³¹Jacob-aam pia, “Kitaki ukvernarcari wangnun.” Tua-i ukvernarcariuq Joseph-aaq, Jacob-aaq-llu quyaluni piicagtuq tuani inglemini.