Read Yupik Genesis 49 Bible Online

Genesis 49 - Yupik bible

Genesis 49

¹Jacob-aam qetunrani taisqai qanrulluki-llu, “Quyurci tailuci, qanrutnaamci elpecen̄un tut'arkanek ernerni ukegkuni.

²“Quyurrluci niicugnici Jacob-aam qetunraini. Niicugniciu atasi Israel-aaq.

³“Reuben-aaq, irniama ciuqlikacaaqaatgen, piniutekamken Irniaqerraaqngamken piniryugallemni. Qutegtenruuten pininqurrauluten-llu.

⁴Ulerpagtun arulaircimasciigalngurtun ayuquten, Tau͡gaam ilavni angenrungaituten, Tua-i-wa tutellruavgu nulirruaqa Menuurrluki atavet ingelri.

⁵“Simeon-aankuk Levi-aq-llu anelgutkuk. Caskutek aturluki aarnarqelria atularaak.

⁶Aassaqlutek qalaruskagnek ilalirngaitagka, Quyurrvikegni-llu ilalirngaunakek, Qenqerrlutek tuqucilallruagnek yugnek Ulapequcilaagnek-llu ungungssiarnek casciigalivkaraqluki.

⁷Aniqlaamali qenqerrutiik anagarullutek tuatnalaamek, Aniqlaamali-llu qenngelallrak takumcuyugpek'natek. Cekavceciiqagka tamiinun Israel-aam nuniinun. Avverqeciqagka yuinun.

⁸“Judah, anelgutvet nanrarciqaatgen. Inglukesteten uyaqurritgun tegumiaqeciqaten. Anelgutvet ciktaarvik'larciqaatgen.

⁹Judah yugtutulitun ayuquq, Pissuqengani tuquqaarluku utertaqluni igtem̄inun, Nengluni-llu inarrluni. Kia-llu tuparqellerkaa alikaa.

¹⁰Judah-m tegumiaqeciqaa septer-aaq angayuqrulriim tegumiaqetukii, Kinguvrin atanirturilriarullrat iquklisngaituq. Atanruviit takarnarqutmek taiciiqaat Ciuqerranun-llu ciktelarciqut niisngaluku.

¹¹Petugaa ciulvayagani wine-arkam avayaanun, Assinkacagarmun wine-arkanek naugitulimun. Eruraqluki-llu aturani kavirlimun wine-amun.

¹²Iik kavirivkarak mer'allran wine-amek, Keggutai-llu qat'rivkarluki milgem mel'allran.

¹³“Zebulun-aaq enengqerciquq imarpiim cen̄iini. Sun'at uqisvik'larciqaat uitavian cen̄ii. Nunautiin engelii tekisngaciquq Sidon-aamun.

¹⁴“Issachar-aq cangallrunrituq ciulvagmi Elavngalartuq aqumlleran qemaggviigken akuliigni.

¹⁵Mernuinercirvini assikngamiu Nuna-llu nunaniqluni, Pull'uni atmircetuq Teguatun-llu pistetun aksang'e'rmi calivkaumaluni.

¹⁶“Dan-am atanirturciqai yun'i. Israel-aani ilamegcetun ayuqeciqut.

¹⁷Dan-aq ciissirpauciquq tumyarat caniatni, Tuqunarqelriaruluni ciissirpauluni tumyarat mengliitni, Keggmaraqluki horse-aat iruitgun, Qaingani ekumalria kingutmun igtelluku.

¹⁸“Utaqaunga anirtullerkarpenek ATANEQ.

¹⁹“Teglengalriit callugciqaat Gad-aq, Tau͡gaam elliin tuiggvikluki malirqaraciqai.

²⁰“Asher-aam nunautii neqkaqegtaarnek naugiciquq. Neqkautenglarciquq angayuqat neqkaqsugngakaitnek.

²¹“Naphtali tuntuuguq pangalgatuli piyugtacirmitun, Irniaqluni tangssunarqelrianek tuntuyagarnek.

²²“Joseph-aaq yuilqurmiutartun ciulvagtun ayuquq mer'em ulvelriim caniani, Yuilqurmiutauguq kuuniyagaq qemim uvernerani;

²³Inglukestain curukaraat uluryanaqluteng Malirqeraat-llu pitgaquluteng.

²⁴Tau͡gaam urluvra caqtaaqsaituq, Tallik-llu pinirivkaumalutek Piniakun Artuqailnguum Agayutiin Jacob-aam, Qusngiliurtem Qaunqestiin Israel-aam.

²⁵Ikayurtekan atavet Agayutii, Artuqailnguum Agayutem atawaqercet'laraaten Ellallirtelluku atawaqautnek pakmaken Mermek-llu nunam akuliinek, Atawaqautnek kuluvagugarnek mikelngurnek-llu,

²⁶Atawaqautnek mukaarkanek naucetaanek-llu, Atawaqautnek ak'allarnek ingrinek, qemiini-llu nangyuilngurni uitalrianek. Makut atawaqautet tull'it Joseph-aamun, Cunguanun allakaumalriim anelgutminek.

²⁷“Benjamin-aaq alingnarqelriatun keglunertun ayuquq. Unuakumi unugmi-llu tuqurqiluni nerlartuq.”

²⁸Ukut tamalkuita ilakutellriartaqai Israel-aam. Makut-llu atiita qanelqai atawaqercetlerminiki tua-ingunrituurluki, atauciuqaqluki qanrutaqluki ellaitnun pitalqellriamek.

²⁹Nutaan-llu alerqurai qetunrani, “Wiinga tuquarkaurtua; tungmageskicia ciuliama nuniitnun qerranqumun nuniinun Ephron-aam Hittite-am,

³⁰Machpelah-mi calaralirnerani Mamre-m Canaan-aami. Abraham-aam kiputellrua qerranquq nunii-llu Ephron-aamek qungurvigkauluku.

³¹Tuavet tungmagtellruagket Abraham-aankuk Sarah-llu; Isaac-aankuk-llu Rebecca-llu. Tuavet-llu wiinga tungmagtellruaqa Leah.

³²Nuna qerranquq-llu kipukengauguk Hittite-anek. Tungmageskicia tuavet.”

³³Jacob-aam qetunrani alerquanriamiki taklarrluni anernerirtuq.