Read Yupik Genesis 7 Bible Online

Genesis 7 - Yupik bible

Genesis 7

¹ATANREM-llu Noah qanrutaa, “Angyarpagmun eki ilaten-llu. Nallunritaqa kiivet ellualriaruuten ukuni yuullgutkelriani.

²Ekevkarluki ungungssit menuilnguut malrunlegtaarluki aipaqu'urluki angucaluq arnacaluq-llu. Ungungssinek-llu menuulrianek malrutaarluki aipaquralriit angucaluq arnacaluq-llu;

³yaqulegnek-llu ayuqenrilngurnek malrunlegtaarluki, angucalunek arnacalurtuumaita. Catairutesqevkenaki nunami.

⁴Erenret malrunelgen pellukata ellallirceciiqaqa. Ernerni unugtuumaita yuinaagni malrugni (40), piunrirciqanka unguvalriit tamalkuita piliallrenka nunam qaingani.”

⁵Tua-i Noah tuaten ATANREM pisqellratun piuq.

⁶Noah allrakungellruuq tiissitsaam avga, yuinarnek tallimanek cipluku (600) tuani ulerpallran nalliini.

⁷Noah, nuliani, qetunrani nulirrit-llu ekellruut angyarpagmun ulellerkaanek qimagluteng.

⁸Menuilnguut ungungssit, menuulriit-llu, yaqulget, mikellriit-llu ungungssit,

⁹angucalut arnacalut malruuqaqluteng ek'ut angyarpagmun Noah-llu, Agayutem alerquuciatun.

¹⁰Erenret malrunelgatni ulem nuna tekitaa.

¹¹Noah-llu allrakungluku tiissitsaam avga, yuinarnek tallimanek cipluku (600) cali iralum aipaa akimiaq malrugnek cipluku ernengqerluku, meq amlleq nunam acianek ulvuq, qilagmi-llu mer'em capai ikirrluteng.

¹²Ellallirluni-llu ernerni unugtuumaan yuinaagni malrugni.

¹³Tuani ernermi Noah, nuliani-llu, ekellruuk angyarpagmun ilalutek qetunramegnek ukunek Shem-amek, Ham-amek Japheth-aamek-llu, taukut-llu nulirrit.

¹⁴Taukut ekellruut ilalirluki ungungssit ayuqenrilnguut, nuyurrilnguut nuyurtalriit ungungssirpiit ungungssiyagaat, yaqulget-llu ayuqenrilnguut.

¹⁵Ek'ut angyarpagmun malruuqaqluteng angucaluq arnacaluq, unguvangqellriit tamarmeng Noah ilalirluku,

¹⁶Agayutem alerquutii aturluku. Nutaan-llu ATANREM amiik patua Noah itraartelluku.

¹⁷Ul'uq taqeksaunani ernerrluni yuinaagnek malrugnek (40), meq nunam qaingani et'uriinarluni, kiituani angyarpak pugtertaa.

¹⁸Meq-llu et'uriuq, angyarpak pugtaluni.

¹⁹Meq et'uriqapigcami ingrit quyingraata tamalkuita patui.

²⁰Meq ulngiinartuq ingrit patuluki, ingrit kangritnek et'utaluni it'ganernek yuinaq tallimanek (25) cipluku.

²¹Cat-llu tamarmeng unguvangqellriit piunrirtut: yaqulget, ungungssit, yuut-llu,

²²tamarmeng nunam qaingani anerteqelriit piunrirluteng.

²³ATANREM piunrirai tamalkuita yuut, ungungssit, yaqulget-llu. Noah kiimi ellirluni angyarpagmi-llu ekumallgutai.

²⁴Meq-llu et'utacimitun uitallruuq ernerni yuinarni malrunlegni qulnek cipluku (105).