Read Yupik Genesis 9 Bible Online

Genesis 9 - Yupik bible

Genesis 9

¹Agayutem-llu atawaqaasqai Noah qetunrai-llu, qanrulluki, “Irnikici amlleriinarluci nunam qainga yirluku.

²Unguvalriit angelriit mikellriit-llu neqet-llu alikarkaurtaiceci; elpeci ataniumaarkaungavciki.

³Unguvalriit tamarmeng neqkaurtut elpecen̄un; cikillrucimtun naunrarnek, canek tamalkuitnek cikiramci.

⁴Tau͡gaam kemget ner'arkaunritaci augtuumaita, unguva augmelan.

⁵Yuk yuullgutminek tuqucikan anucimirqecetaarciqaqa. Ungungssiq-llu yugmek tuqucilria tuquvkarciqaqa.

⁶Agayutem ayuqucimitun yuk piliaqellrua, taumek kina tuqucilria yugmek allam yuum tuquciiqaa.

⁷“Elpeci irnilaqici amlleriluci nunam qainga yirluku.”

⁸Tua-llu Agayutem qanrutai Noah qetunrai-llu,

⁹“Watua akqutmek taqutua elpecen̄un kinguverpecen̄un-llu,

¹⁰ilakluki unguvangqellriit yaqulget ungungssit-llu tamaita angyarpagmek anellgutkelten.

¹¹Makutgun qaneryaratgun akqut'lillgutkamken: wak'nirnek unguvangqellria tamarmi piunriumanqiggngaituq ulerpagkun; ulerpiim piunrinqiggngaitaa nuna.

¹²Uumek nallunailkutangqerciquq una akqun nangyuilnguq elpenun tamalkuitnun-llu unguvangqellrianun, yugnun-llu ukani yuurtarkanun:

¹³Amirlunun agluryaqa elliaqa. Nallunailkutauvkarluku akqutemnun ellarpagmun.

¹⁴Amirlungevkaraqamku ella agluryaq-llu alaitaqan,

¹⁵umyuaqutkelarciqaqa akqutkellemnun elpenun, ungungssinun-llu tamaitnun, ulerpagkun piunrinqiggngaunaki.

¹⁶Agluryaq alaitaqan amirluni umyuaqelarciqaqa iquilnguq akqutka tamaitnun unguvalrianun ellarpagmi.

¹⁷Tauna nallunailkutaqaa akqutma piurtellma unguvalrianun tamalkuitnun nunami.”

¹⁸Noah-m-llu qetunrai angyarpagmek anellret ukuugut: Shem-aq, Ham-aq, Japheth-aaq-llu. Ham-aq atakaa Canaan-aam.

¹⁹Ukut pingayun Noah-m qetunrai ciuliaqait ellarpiim yuin tamarmeng.

²⁰Noah nauceciiyurten͞guami nauceciillruuq wine-arkanek.

²¹Wine-aliaminek-llu mer'aluni taangiquq. Matarmi pelatekamini inangqaluni.

²²Ham-am-llu, Canaan-aam atiin, tangrramiu tuaten atani matangqaluku an'uq qanrullukek-llu anelgutegni.

²³Tua-i Shem-ankuk Japheth-aaq-llu tegutuk 'lumarrarmek, tusmegnun-llu iqukek pilukek kingupiarlutek pelatekamun itertuk. Uluumiimek atasek matangqaluku tangenrritaak, patuluku-llu tamatumek 'lumarrarmek.

²⁴Noah-llu taangiqenriami, nallunriamiu-llu qetunrami kinguqliatnun tuatnallruciminek,

²⁵qanertuq, “Aniqlaan tull'i Canaan-aamun! Pisten͞gurciiquq amaqliigminun.

²⁶Atawaqertelliu ATANREM Agayutma Shem-aq! Canaan-aaq-llu pisteksaguskiliu.

²⁷Agayutem Japheth-aaq[10] yugyangevkaqiliu! Kinguvri-llu yuukilit Shem-am yui ilagarluki! Canaan-aaq-llu pisteksaguskiliu.”

²⁸Ulerpiim-llu kinguakun Noah unguvauq allrakuni yuinaat akimiaq malruk qulnek cipluku (350)

²⁹tuquluni-llu allrakungluni tiissitsaam avga, yuinaat yuinaat malrugnek cipluku qula-wa (950).