Read Yupik 2 Samuel 1 Bible Online

2 Samuel 1 - Yupik bible

2 Samuel 1

¹Saul-aam tuqullran kinguani David-aaq utertuq cirlakraarluki Amalek-aam yui erenregni-llu malrugni uitaluni Ziklag-ami.

²Unuaquan ayagyuaq angun tekituq Saul-aam yuilqumi uitavianek. Nasvagnaluku angniilucini aturani allgullruluki urr'amek-llu qamiquni elliivikluku. Ullagluku David-aaq ciktuq nunamun qigcikutni maniluku.

³David-aam aptaa, “Naken taillrusit?” “Ayakallruunga Israel-aam yuin uitaviatnek,” ellii kiuguq.

⁴“Qanrusnga qaillun pillratnek,” David-aaq qanertuq. “Anguyagteput qimallruut calluutellrianek,” tauna kiuguq, “amlleret-llu anguyagteput tuqucimaluteng. Saul-aankuk-llu qetunrani-llu Jonathan-aaq cali tuqucimallruuk.”

⁵“Qaillun nallunriciu Saul-aankuk Jonathan-aaq-llu tuqullruciak?” David-aam aptaa.

⁶Ellii kiuguq, “Ingrim Gilboa-m qaingantellruunga, tangellruaqa-llu Saul-aaq narulkarcuutminun aksaumaluni ayagassuutet-wa akalrialget horse-aatgun-llu pilriit ingluin kassugucartuqiit.

⁷Tua-llu tuigtuq, tangerrlua-llu, qayagauraanga. Kiugaqa, ‘Aa-ang, wantua!’

⁸Aptaanga kituucimnek, qanrutaqa-llu Amalekite-aunilua.

⁹Tua-llu qanertuq, ‘Tailuten tuqusnga! Wiinga cakneq akngiringaunga, tuquqatarlua-llu.’

¹⁰Tua-i ullagluku tuqutellruaqa, nallunrilamku tuquciqngan egmian iqukuni. Tua-i-llu teguluku nasqerrun qamiqurranek talliraq-llu tallianek, taitellruagka elpenun.”

¹¹David-aam aturani allgurai angniinani, tamarmeng-llu anguyagtai elliitun piluteng.

¹²Iluteqluteng angniitut yagluteng-llu atakurnatkaanun Saul-aaq Jonathan-aaq Israel-aaq-llu pitekluki, yui ATANREM, tua-i-wa amlleret tuqucimiita anguyagmi.

¹³David-aam aptaa yun'erra'ar qanrucarturtellni qanemcimek, “Camiungusit?” “Amalek-aaruunga, tau͡gaam nunavcen̄i uitalartua.”

¹⁴David-aam aptaa, “Qaillun piluten alingunak tuquciu ATANREM cucukellra angayuqaq?”

¹⁵Tua-llu David-aam anguyagtem̄i iliit qayagauraa qanerluni-llu, “Tuqusgu!” Taum anguyagtem kaugturaa Amalekite-aq akngirrluku egmirtelluku-llu,

¹⁶qanrutaa-llu David-aam Amalek-aaq tauna, “Elpenek mat'umun tekiututen. Elpenek picurlaututen apervikuallerpeni tuqutellruniluku ATANREM cucukellra angayuqrusqelluku.”

¹⁷David-aam atullrua man'a yuarun angniilun Saul-aamun qetunraanun-llu Jonathan-aamun,

¹⁸alerquulluku-llu elitnaurutkesqelluku yuinun Judah-m. (Igausngauq Kalikaini Jashar-am.)

¹⁹“Qaingatni Israel-aam qemiin ciuliqagteput tuquut! Cacetunqurrait anguyagtemta iquut!

²⁰Qanruteksaqunaku Gath-ami wall'u tumyaraini Ashkelon-aam. Arnait Philistia-rmiut quyavkaryaqunaki; paniit agayumanrilnguut nunaniryugcecaqunaciki.

²¹“Ellalluk yukutaq-llu igtenrilli Gilboa-m ingriinun; naucetaarvii-llu kesianek naugiyuilkilit! Capkutait cacetulriit uitiita cailkami kasngunaqluteng; capkutaa Saul-aam qevlercaumanrirtuq uqumek.

²²Jonathan-aam urluvra tuqunarqellruuq, Saul-aam nuussirpii naklegitellruuq, iqutaqluki pinilegpaulriit, tuqutaqluki inglut.

²³“Saul-aaq Jonathan-aaq-llu angnirnaqlutek kenegnaqlutek-llu; quyurmek unguvami, quyurmek tuqumi; cukanrulutek yaqulpagni, pininrulutek yugtutulini.

²⁴“Arnaini Israel-aam, angniilutkiciu Saul-aaq! Aturirtuumallruaci akitulrianek kavirlinek taqmagnek tangnirqucirluci-llu qevlialrianek suulutaanek-llu.

²⁵“Cacetulriit anguyagtet iqucimaut, tuqucimaluteng anguyagmi. Jonathan-aaq taklauq tuqumaluni qemini.

²⁶“Angniilutkamken, anelgutmaa Jonathan-aaq; kenegnarqellruuten wangni! assiqapigtellruuq kenken wangnun, assinruluni-llu kenkutiini arnam.

²⁷“Cacetulriit anguyagtet iquut, saskuit cakaarumaut atuunrirluteng.”