Read Yupik 2 Samuel 10 Bible Online

2 Samuel 10 - Yupik bible

2 Samuel 10

¹Mat'um kinguakun Angayuqaq Nahash-aq Ammon-aarmiu tuquuq, qetunraa-llu Hanun-aaq angayuqrurrluni.

²Angayuqaq David-aaq qanertuq, “Wiinga piciulriamek yugnikutmek piarkaugua Hanun-aamun, elliin atiin Nahash-am wangnun pillruciatun.” Tua-i David-aaq ayagceciuq kevganek qanrucarturtelluku naklekniluku. Tekitellratni Ammon-aamun,

³Ammonite-at ciuliqagtet qanertut angayuqamun, “Umyuartequten-qaa aatavnek takaqillni pitekluku David-aaq ukunek taivkariyukluku qanrucarturluten naklekniluten? Tuaten pinrituq! Maavet taivkallrui pinrilnguarluki yuvriryarturtelluku man'a nunarpak, teguaqnaluta!”

⁴Teguaqai-llu Hanan-aam David-aam kevgai, ungairai-llu ungaita ingluit, aturait-llu kepluki mecangqait tekilluki, ayagtelluki-llu.

⁵Kasnguyugtut cakneq utertellerkameggnun kingunermeggnun. David-aam niicamiu qaillun pillrat, qanrucarturcetai Jericho-mi uitasqelluki utertevkenaki ungait naunatkaitnun.

⁶Ammonite-at taringut ellmeggnek David-aamek inglukiurucimeggnek, tua-i anguyagtekameggnek piteklirtut tiissitsaanek yuinarnek (20,000) Syria-rmiunek anguyagten̄ek Bethrehob-amek Zobah-mek-llu, qula-llu malrugnek cipluku tiissitsaanek (12,000) anguyagten̄ek Tob-amek, angayuqamek-llu Maacah-mek tiissitsaanek (1,000) anguyagtelegmek.

⁷David-aam niitaa man'a ayagcetaa-llu Joab-aq akiuryarturtelluki tamalkuitnun anguyagten̄un.

⁸Ammon-aarmiut ayagtut arulaiqsaunateng upluteng-llu uitavigkameggni Rabbah-m iteryaraani, nunarpameng atanruviani, allat-wa tamarmeng Syria-rmiut anguyagtet-llu Tob-amek, Maacah-llu, uptellriit uitavigkameggni camek capkutailngurmi yuilqumi.

⁹Joab-am tangrraa inglumeng anguyagtaitnun curukataucini ciunerminek kingunerminek-llu, tua-i cucuklirtuq Israel-aam anguyagtain assinqurraitnek elliluki-llu Syria-rmiut ciunratnun caumaluki.

¹⁰Cipnerit anguyagtem̄i tunai anelgutminun Abishai-amun ataniuresqelluki, ellii-llu nekaitnun Ammon-aarmiut caumaluki.

¹¹Joab-am qanrutaa, “Syria-rmiunun tangerquvnga cirlakevkarlua, tailuten ikayuryartuqia, Ammon-aarmiut-llu cirlakekatgen, tailua ikayurciqamken.

¹²Piniqici alingevkenaci-llu! Pitacirramcetun calluutnauput yup'ut nunarpai-llu Agayutemta. ATANREM-llu pisqutii piukili!”

¹³Joab-aq yun'i-llu ciutmun ayagtut curugluteng, Syria-rmiut-llu qimagluteng.

¹⁴Ammonite-at tangrramegteki Syria-rmiut ayagavkarluki aqvaqurluki, qimagtut Abishai-amek uterrluteng nunarpagmun. Tua-i-llu Joab-aq kingutmun cauguq callullerminek Ammon-aarmiut uterrluni-llu Jerusalem-aamun.

¹⁵Syria-rmiut taringut cirlakucirmeggnek Israel-aanun, tua-i-llu qayagaurait tamalkuita anguyagteteng quyurrluki.

¹⁶Angayuqam Hadadezer-aam taisqevkarai Syria-rmiut keggaknelirnerani Kuigem Euphrates-aam uitalriit, tekitut-llu Helam-aamun ataniurterluteng Shobach-amek, atanerruaratnek anguyagtain Angayuqam Hadadezer-aam Zobah-rmium.

¹⁷David-aaq mat'umek niicami, quyurtai Israel-aat anguyagtait, qerarluku-llu Kuik Jordan-aaq, arulaiqsaunateng-llu ayagluteng Helam-aamun, tuani Syria-rmiut upingaluteng caumaluku. Tua-llu anguyallrat ayagnirtuq,

¹⁸Israel-aam-llu yuin kingupiartait Syria-rmiut anguyagtait. David-aaq yun'i-llu tuquciut tiissitsaam avga yuinarnek qulnek cipluku (700) Syria-rmiunek akalrialget alulartaitnek yuinaagnek-llu malrugnek tiissitsaagnek (40,000) horse-aatgun anguyatulinek, ekiliraat-llu Shobach-aq, inglumeng atanerruarat, tauna-llu tuquluni anguyagvimeggni.

¹⁹Angayuqat yuliucimalriit Hadadezer-aamun taringameng cirlakumacimeggnek Israel-aanun, inglucitenrirluteng ellaitnun iliksagutait. Syria-rmiut-llu alinguqaat ikayullerkait Ammon-aam yui.