Read Yupik 2 Samuel 13 Bible Online

2 Samuel 13 - Yupik bible

2 Samuel 13

¹David-aam qetunraa, Absalom-aaq, kenegnalriamek uingeksailngurmek nayagangqellruuq aterluni Tamar-amek. Amnon-aam, David-aam cali qetunrain iliita, kenegyagutaa.

²Kenkessiyaallni-llu pitekluku naulluunguq, elliini caperrnariluni aipaqlerkaa; angutmek agtuumaksailami, angutnun ullagtaarucimanrituq.

³Tau͡gaam yugnikek'ngangqertuq, umyuartuqapiarmek aterluni Jonadab-amek, qetunraanek David-aam amaqlian Shammah-m.

⁴Jonadab-aq qanertuq Amnon-aamun, “Angayuqam qetunraqaaten, tau͡gken unuaquaqan tangerrnaamken tangellren angniinani. Qaillun pisit?” “Kenkiunga Tamar-amek nayagaanek allamek atalgem anelgutma Absalom-aam,” ellii kiuguq.

⁵Jonadab-aq qanertuq elliinun, “Naulluunguarluten kitak inarten. Atavet tailuni tangerrsartuqaten, qanrutniaran, ‘Kitak apteqerr'u nayagaqa Tamar-aq tailuku nereqsartuusqellua. Neqkiuresqumaaqa maani tangerrsugngakemni, tua-i-llu neqliurlua elliin.’”

⁶Tua-i Amnon-aaq naulluunguarluni inartuq. Angayuqam David-aam tangerrsarturaa, Amnon-aam-llu qanrutaa, “Tamar-aq tang taivkarluku kelipivkaqerr'u neqnirqellrianek tangvak'ngamni, elliinun-llu neqliurtellua.”

⁷Tua-i David-aam Tamar-aq qanrucarturcetaa angayuqauvigmi: “Amnon-aam eniinun agluten neqkiuryarturru.”

⁸Tuavet agngami pia inglerni inangqaluni. Keliparkamek tegutuq, uptaa, neqnirqellrianek-llu kelipiluni tangerrsugngakiini. Kelipiluki-llu neqnirqelriit kelipat

⁹ipugluki-llu kelipissuutmek elliinun neresqelluki, tau͡gaam piyuumiituq. Qanertuq, “Tamalkuita yuut anevkarki” tamarmeng-llu an'ut.

¹⁰Tua-llu qanrutaa arnaq, “Taiski wavet inglemnun kelipat elpet-llu neqliurutekluki.” Teguluki kelipat ullagaa.

¹¹Tunnginanrani-llu, teguleraa qanerluni-llu, “Tailuten canimnun inarten!”

¹²“Qang'a,” arnaq qanertuq, “Qessange'rma waten pivkanrilnga mat'umek kasngunarqellriamek! Tamana cakneq assiituq!

¹³Qaillun pilua yuut takuatni ciugcugngaciqsia mat'um kinguani? Elpet-llu, angtuamek-llu elpet kasngunaqciquten Israel-aami. Angayuqaq qalarusgu, wii nallunritaqa nallunailngurmek elliin tunciqaanga elpenun.”

¹⁴Tau͡gaam niitenritaa; elliini-llu pininruami, cirlakaa agluku-llu.

¹⁵Tua-llu Amnon-aaq eq'ukutmek imanguq elliinun; eq'ukaa kenkellmini arcaqanruluku ciungani. Qanrutaa, “Ani!”

¹⁶“Qang'a,” arnaq kiuguq. “Waten ayagcetlerkan pinarqenruuq watnallerpeni wangnun!” Tau͡gaam Amnon-aam pamatekenritaa;

¹⁷qayagauraa-llu nakmiin kevgani qanerluni-llu, “Arnaq una ciuqamnek au͡g'arru! Elatmun eggluku kelucarru amiik!”

¹⁸Pistem-llu antaa amik-llu kelucarluku. Tamar-aq aturartullruuq taktuamek ulikutamek alirpalegmek, atutukiitnek kassuuteksailnguut neviarcaraat angayuqat paniita tamatum nalliini.

¹⁹Kanvaa qamiquni qamllermek, allgurluku ulikutani, kegginani-llu unatminek patuluku ayagtuq qialuni.

²⁰Anngaan Absalom-aam tangrramiu, aptaa, “Amnon-aam-qaa kasngunarqellriamek pillruaten? Nayagamaa, mat'umun umyuan assiitessiyaagcetevkenaku pii, allamek aataluni anngaqan, kina mat'umek qanrucaqunaku.” Tua-i Tamar-aq uitaurtuq Absalom-aam eniini, angniinani aliayugluni-llu.

²¹Angayuqam David-aam niitellermini qaillun pillra, cakneq qenertuq.

²²Absalom-aam-llu eq'uksiiyaagamiu Amnon-aaq agellra nayagani Tamar-aq pitekluku camek qanqaucuirutaa.

²³Allrakuk malruk kinguagni Absalom-aam qusngini asmegcetai Baal Hazor-ami, nunarraam Ephraim-aam yaaqsinrilkiini, kelgai-llu tamalkuita angayuqat qetunrait tamalkuita tuancesqelluki.

²⁴Ullagluku-llu Angayuqaq David-aaq qanrutaa, “Elpet Ucurnarqellriami, qusnginka asmegcetanka. Tailuten-qaa anguyagtevvet-llu atanerruarit ilaucuumiituten piciryaraput angnirluta atullemten̄i?”

²⁵“Qang'a, qetunramaa,” angayuqaq kiuguq. “Arenqiallugutnguciquq elpenun tamamta taikumta.” Absalom-aaq aguagtuq cakneq, tau͡gaam angayuqaq maligarutenrituq, Absalom-aaq-llu anesqaa.

²⁶Tau͡gaam Absalom-aaq qanertuq, “Kitaki tuaten pii, tau͡gaam-qaa anelgutka Amnon-aaq maligucecugngaan?” “Ciin tuaten pinarqa?” angayuqaq aptuq.

²⁷Tau͡gaam Absalom-aaq taqsuarirtu'rtuq, David-aaq-llu niicaqlirluni Amnon-aaq, allat-llu tamalkuita qetunrai, maligutevkarvianun Absalom-aamun. Absalom-aaq uptuq nerevkaritekamek pitaciluku angayuqat pilallrat;

²⁸alerqualuki-llu pisten̄i: “Murikekiciu Amnon-aam kemningllerkaa, tua-i-llu ellimerruskumku, tuqulluku. Alingyaqunaci. Wiinga avalitkevkarciqua. Cacetukici pinaciarpek'naci-llu!”

²⁹Tua-i pistet maligtaquat Absalom-aam alerquatii tuqulluku-llu Amnon-aaq. Ilai-llu tamak'acagarmeng David-aam qetunrai ekluteng ciulvameggnun qimagtut.

³⁰Uterrnginanratni, David-aaq qanrutaat: “Absalom-aam tuqutellrui tamalkuita qetunraten, iliit atauciunger'mi unegtevkenani!”

³¹Angayuqaq nangertuq, aturani-llu allgurai angniitem pitaciani, nunamun-llu narullgulluni. Pistain-llu nayurtain aturateng allgurmiit.

³²Tau͡gaam Jonadab-aq, qetunraa Shammah-m David-aam anelgutiin, qanertuq, “Elpet Ucurnarqellriami, tuquteksaitait tamalkuita qetunraten. Kiimi Amnon-aaq tuquuq. Tangllermikun Absalom-aaq nallunaitellruuq umyuangellra waten piarkaurrluni ayagneqluku Amnon-aam agellra nayagani Tamar-aq.

³³Taumek ukveqsaqunaku qanemcillrat tamalkuita qetunraten tuquniluki; kiimi Amnon-aaq tuqutaullruuq.”

³⁴Taum nalliini Absalom-aaq ayakarluni qimallruuq. Tua-llu piqerluni anguyagta nayulria tangertuq yugugarnek atralrianek qemikun Horonaim-amek tumyaraq aturluku. Angayuqaq ullagaa qanrutekluki-llu tangellni.

³⁵Jonadab-aq qanertuq David-aamun, “Tamakut qetunraqaten tailriit, qanellrucimtun waten piciqniluki.”

³⁶Taqeq'anrakun waten qanenermek, David-aam qetunrai tekilluteng itertut; qiagut-llu, David-aaq-llu anguyagtain-llu atanerruarit qiaqapigtut.

³⁷Absalom-aaq qimagtuq ayagluni-llu angayuqranun Geshur-aam, Talmai-amun qetunraanun Ammihud-aam, tuanlluni-llu allrakuni pingayuni. David-aam-llu angniilutkumallrua qetunrani Amnon-aaq;

³⁹tau͡gaam pelluamiu Amnon-aam tuqullranek tuaten pillni, umyuanguq tangerrsugluku qetunrani Absalom-aaq.