Read Yupik 2 Samuel 14 Bible Online

2 Samuel 14 - Yupik bible

2 Samuel 14

¹Joab-am nallunritaa Angayuqamun David-aamun yuarnakucia Absalom-aaq cakneq,

²taumek taisqevkaraa umyuartulria arnaq Tekoa-rmiu. Tekican, qanrutaa, “Angniilnguara tuquillertun, all'uki tuquissuutet aturaten, nuyaten-llu nuyuuqsaunaki. Pinguarluten arnatun tuquiluni angniicimalriatun.

³Tua-i-llu ullagluku angayuqaq qanrulluku-llu wii qanrucesqellemnek.” Nutaan qanrutaa qanerkaanek.

⁴Tua-i arnam ullagaa angayuqaq, cikluni nunamun qigcikellni mania, qanerluni-llu, “Ikayurnga, Elpet Ucurnarqellriami!”

⁵“Camek piyugcit?” aptaa. “Wiinga arrsaagaulua aipainruunga,” elliin kiugaa. “Uika tuqullruuq.

⁶Malrugnek qetunrangqellruunga, erenret iliitni kiutaarutellruuk naucirivigmi, kitumek avvucestekaunatek, aipaan-llu tua-i aipani tuqulluku.

⁷Tua-i-llu wani-wa ilakutama tamarmeng eq'uyagullua taicesqu'urluku-llu qetunraqa ellmeggnun, tuqucugluku anelgutni tuqutellra pitekluku. Watnakata, qetunrairuciiqua. Neryuniurutairuciiqua uika-llu qetunrairulluni at'mi maktacestekaanek.

⁸“Uterten kingunerpenun,” angayuqaq kiuguq, “wiinga aulukciqaqa tauna pinarqellria.”

⁹“Elpet Takarnarqellriami,” arnaq qanertuq, “qaillun ping'e'rpet, wiinga nakmiin-llu ilakutanka avalitnguyugtukut; elpet atanruviin-llu camek pinarqutaituci.”

¹⁰Angayuqaq qanertuq, “Kia imum alingcira'arqaten, wangnun taiskiu, taum caaksuaranqiggngaitaaten.”

¹¹Arnaq qanertuq, “Elpet Takarnarqellriami, piicagvikqerru ATANEQ Agayuten, tauna ilakutaqa akinaulleq qetunrama tuqullranun angenranek picurlanritnaurtuq tuqutellermikun qetunrama aipaa.” “Akqamken unguvalriakun ATANERKUN,” David-aaq qanertuq, “elpet qetunraan akngiringangaituq carraungraan.”

¹²“Kitaki, Elpet Ucurnarqelriami, cali ataucimek qanqerlii,” arnaq qanertuq. “Kitaki,” ellii kiuguq.

¹³Arnam qanrutaa, “Ciin picurlautmek taqucit Agayutem yuinun? Elpet pillerkamek cikiqsaitan nakmiin qetunraan utercesqelluku qimagaullranek, taumek elpenek akeqnerrlugutmun tekiututen waten qanllerpegun.

¹⁴Tamamta tuquciqukut; mertun ayuqukut kuvumalriatun nunamun, ataam quyurtenqigcesciiganani. Agayutem-llu tuaten tuqulria unguircetenrilengraaku, tau͡gaam angayuqaq qaillun ut'rutellerkaanek nallunriryugngauq qimagaulria.

¹⁵Tua-llu, Elpet Ucurnarqellriami, uumek avalitengqerrlua tailua qanellguteksullruamken yuut akeqnerrlugtellratnek, taumek umyuartequa qanellguteknaluten neryuniurlua piyulqa elpenun atuusqumaluku.

¹⁶Umyuartequa niillua elpenun anirtuusqumayaaqlunuk qetunraqa-llu tuqutengnaqestem̄egnek au͡g'arlunuk nunamek Agayutem cikiutellranek yum'inun.

¹⁷Wangnek qanrutua akqutevnun camun pivkarngaitnilua, angayuqaq Agayutem an'gilaatun ayuqngan taringyugngaluku assilria assiitellriamek. ATANREM Agayutvet nayurliten!”

¹⁸Angayuqaq kiuguq, “Apteqataramken apyutmek, qanrutnarqavnga piciulriamek.” “Apesnga piyullerpenek, Elpet Ucurnarqellriami,” arnaq kiuguq.

¹⁹“Joab-am-qaa waten pisqaaten?” arnaq aptaa. Kiuguq-llu, “Ukvernarcariunga qigcignarqellriakun, Elpet Ucurnarqellriami, kiunricesciigataqa apyuten. Ilumuuguq anguyagtevvet atanerruarata Joab-am qaillun pillerkamnek qanrutellruanga qaillun-llu qanllerkamnek.

²⁰Tau͡gaam waten pillruuq waten man'a pinarqellria kitugingnaqluku. Elpet Ucurnarqellriami, umyuartunek pikan an'gilaatun Agayutem nalluvkenaki-llu cauralriit tamalkuita.”

²¹Atatakuan angayuqam Joab-aq qanrutaa “Piarkaurtaqa wani-wa piyullren. Ayagluten aqvau yun'erraq Absalom-aaq ut'rulluku-llu maavet.”

²²Joab-aq ciktaartuq nunamun ciuqerranun David-aam qigcigyugluni, qanerluni-llu, “Agayutem atawaqertelliten, Elpet Ucurnarqellriami! Wani-wa nallunriraqa quyakuciqa elpenun, unakicavgu kaigatka.”

²³Nangerrluni-llu ayagtuq Geshur-aamun ut'rulluku-llu Absalom-aaq Jerusalem-aamun.

²⁴Angayuqaq, tau͡gaam, alerquriuq Absalom-aaq atanruvigmi uitangaitniluku. “Tangerrsuumiitaqa,” angayuqaq qanertuq. Tua-i Absalom-aaq nakmiin enemini uitauq angayuqamun ageksaunani.

²⁵Allamek pitaituq Israel-aami tangkegcinartatailngurmek Absalom-aatun; camek canganarqutaunani kakangcaminek ayagluni kanavet it'gagminun.

²⁶Nuyai mamtupiarluteng, kep'arkauluki-llu allrakumi ataucirqumek; taklirissiyaagaqata uqamairulluteng-llu. Uqamangqerraqluteng uspernek tallimanek uqamaltassiarcuutai atanruviim aturluki.

²⁷Absalom-aaq pingayunek qetunrarluni atauciq-wa pania Tamar-amek aterluni, cakneq kenegnaqpiarluni arnaq.

²⁸Absalom-aaq uitallruuq Jerusalem-aami allrakugni malrugni tangeqsaunaku angayuqaq.

²⁹Tua-llu aqvavkaraa Joab-aq, ellimirrnaluku angayuqamun kevgartuusqelluni; tau͡gaam Joab-aq taiyuumiituq. Cali Absalom-aam taisqevkaraa, tuamtellu Joab-aq qessaluni taiyuumiinani.

³⁰Tua-i Absalom-aaq qanertuq pistem̄inun, “Tangerciu Joab-am naucirivia pima canianlluni, canegpagnek-llu naumalriartarluni. Ayagluci ekuavkaryarturciu.” Tua-i ayagluteng naucirivik ekuavkaraat.

³¹Joab-aq agluni Absalom-aam eniinun aptaa, “Ciin pistevvet naucirivika ekuavkartatgu?”

³²Absalom-aam kiugaa, “Tua-i-wa taisqengramken taiyuumiitellruavet. Ayagluten angayuqamun apyucicartuusqumayaaqellruunga: ‘Geshur-aaq ciin unilluku maavet taisia? Wangnun assinrullruyartuq tamaantaurallrukuma.’” Absalom-aaq-llu cali qanerluni, “Arenqigcesqumaaqa elpenun wangnun tangllerkaa angayuqam, pinarqutengqerquma-llu elliin tuqutauvkarniaraanga.”

³³Tua-i Joab-am Angayuqaq David-aaq ullagaa qanrulluku-llu Absalom-aam qanellranek. Angayuqam taisqevkaraa Absalom-aaq, tailuni-llu ciuqerranun cikluni nunamun. Angayuqam-llu ciuniuraa cingarluku.