Read Yupik 2 Samuel 15 Bible Online

2 Samuel 15 - Yupik bible

2 Samuel 15

¹Mat'um kinguani, Absalom-aaq pikarciuq ellminek pekcessuutmek akalrialegmek horse-aanek-llu, yuinaak-llu malruk qulmek cipluku (50) angutnek maligcestekaminek.

²Makcara'arluni-llu ayalartuq nangerngaurluni-llu tumyaram caniani nunarpiim ikirtuqaani. Kina tua-i tuavet tekitaqan apyuterluni arenqiallugutmek inglukucarakun angayuqamun ikayurluni arenqigisqelluku, Absalom-aam taisqelluku aptelaraa camiungucianek. Qanrucani-llu tua-i kinkunek ilakellrianek piciminek,

³Absalom-aaq qanerluni, “Tangerrluku, alerquutet maliggluki ikayuumayugngauten, tau͡gaam qanertetaituq angayuqamek kingunelegmek niicugnistekarpenek.”

⁴Iquliraqluku waten, “Qanercetaaristen͞guyularyaaqua! Nutaan kina imna arenqiallugutellek, wall'u teguarkalek, tailaryalria wangnun, wiinga-llu elluarrluku caliaqelaryaraqa.”

⁵Kina yuk taigaqan Absalom-aam ciuqerranun palurcarturluni, Absalom-aam, yaggvikluku tegularaa, cingarluku-llu.

⁶Absalom-aam Israel-aam yui waten pilarai tamalkuita tailriit angayuqamun cuqcimanaluteng pitekluku, tuaten-llu pillermikun unakai ellminun ilaksagutelluki.

⁷Allrakut cetaman kinguatni Absalom-aaq qanertuq Angayuqamun David-aamun, “Ayagcetqernga Hebron-aamun akqutkelqa atuqernaurqa ATANERMUN.

⁸Geshur-aarmiungullemni Syria-mi, ATANEQ akqellruaqa ut'ruskanga Jerusalem-aamun, agayuyarturciqnilua elliinun Hebron-aami.

⁹“Ayii uitanqegcitkun,” angayuqaq qanertuq. Tua-i Absalom-aaq ayagtuq Hebron-aamun.

¹⁰Tau͡gaam kevgatgun qanrucarturcetai tamalkuita ilakellriartai Israel-aam qanertelluki waten, “Niiskuvciki cupu'uryarat qalrialriit, qayagpakici, ‘Absalom-aaq angayuqaqsagutaa Hebron-aam!’”

¹¹Yuinaat qulen (200) angutet Absalom-aam unayaqngateng ayallruut Jerusalem-aamun maliggluku; nalluluteng aassaqluni picirkiuraanek ayagluteng ukveqluku.

¹²Elliinginanermini-llu ekuagarkanek, Absalom-aaq ayagceciuq nunarrarmun Gilo-mun taisqelluku Ahithophel-aaq, Angayuqam David-aam arenqiirturtain iliit. Aassaqluni picirkiuraa cukamek tukniriinartuq, Absalom-aam-llu maligcestai amlleriluteng.

¹³Kevgam qanrutaa David-aaq, “Israel-aam yui akqiut piciuluteng kevgiurnaluku Absalom-aaq.”

¹⁴Tua-i David-aam qanrutai tamalkuita anguyagtem̄i atanerruarit nayurten̄i Jerusalem-aami, “Wanirpak ayagnarqaakut qimagluku Absalom-aaq! Patagmek! Tekiarrluni tayima cirlakciqaakut tuqulluki-llu yuut tamalkuita nunarpagmi wani.”

¹⁵“Aa-ang, Elpet Ucurnarqelriami,” taukut kiugut. “Wangkuta upingaukut qanellren aturarkauluku.”

¹⁶Tua-i angayuqaq ayagtuq, maligluni nakmiin ilakutaminek atanerruaminek-llu, tau͡gaam qulen nulirruari pivkenateng, taukut unilluki atanruvik qaunqesqelluku.

¹⁷Angayuqaq malini-llu annginanermeggni nunarpagmek, enemun nangneqlikacaarmun arulairtut.

¹⁸Tamarmeng anguyagtain atanerruari nangertut canainun atanruviim murilkestai ciuqamegteggun kitullratni. Cali-llu tiissitsaam avga yuinarnek tallimanek cipluku (600) anguyagtet maligcestellri Gath-amek kiturluteng,

¹⁹tua-llu angayuqaq qanertuq Ittai-amun, ciuliqagtem̄eggnun, “Ciin maligcikut? Uterrluten nayuryarturru nutaraq angayuqaq. Allanruuten, qimagauluten nakmiin nunavnek.

²⁰Makumiungurtellren akaurteksaituq, ciin wii malikluten ayagaciiqsia? Natmun-llu wii ayakatauciqa nalluluku. Uterrluten quyurcarturki nunalguteten ATANREM-llu naklekluten piciugurqili elpenun.”

²¹Tau͡gaam Ittai-aq kiuguq, “Elpet Ucurnarqelriami, ukvernarcariunga ATANREM atrakun maligqurararkauluten natmun ayallren tamalkuan, tuqutekarkaungramku.”

²²“Assirpaalli!” David-aaq kiuguq. “Kiiki ciutmun ayii!” Tua-i Ittai-aq ayagtuq tamalkuita malini ilait-llu malikluki.

²³Yuut qastuluteng qiagut David-aam maligcestai ayallratni. Angayuqam qeraraa Kuicuar Kidron-aaq, yuin kingunrirturluku, malikluteng-llu ayagtut yuilqum tungiinun.

²⁴Zadok-aq agayulirta tuanlluni, Levi-am yuinek ilaluni, ayaulluku qigcignarqellria Akqutem Yaassiiga. Elliat-llu nunamun tegunqigtevkenaku-llu yuut tau͡gaam nangeng'ata anelriit nunarpagmek. Tuantellruuq-llu cali agayulirta Abiathar-aq.

²⁵Tua-llu angayuqaq qanertuq Zadok-aamun, “Ut'rusgu Akqutem Yaassiiga nunarpagnun. ATANREM umyugaa nall'areskumku, erenret iliitni utertellua tangerceciiqaa nani-llu uitavia.

²⁶Tau͡gaam umyugaa nall'artenrilkan tungemnun, elliin qaillun piyullmitun pikilia.”

²⁷Tuamtellu Zadok-aq qanrulluku, “Tangerrluku, malikluku qetunraan Ahimaaz-aq, Abiathar-am-llu qetunraa Jonathan-aaq uterten uitanqegcitkun nunarpagmun.

²⁸Wani-wa tau͡gaam, utaqaciqua kuigem qeraryaraini yuilqumi qanemcimek niitnatkamnun elpenek.”

²⁹Tua-i Zadok-aankuk Abiathar-aq-llu ut'rutaak Akqutem Yaassiiga Jerusalem-aamun tuantaurlutek-llu.

³⁰David-aaq mayurtuq Olive-aat Ingriatgun qialuni; kamilangqaluni qamiquni patumaluku angniitellni maniluku. Malii-llu tuaten qamiquteng patuluki ellait-llu qiagut.

³¹Qanrucimallermini-llu David-aaq Ahithophel-aaq ilautniluku Absalom-aam inglukillranun, ellii piicagtuq, “Kitaki, ATANEQ, Ahithophel-aam picirkiurai cautngunrirceski!”

³²David-aam kangllicaku qemim kangra, agayularvigmek pitalek, piciuluni yugnikek'ngaan Hushai-am Arch-armium paiqeraa aturai allgurluteng qamiqua-llu marayirluni.

³³David-aam qanrutaa, “Maligeskuvnga wangnun ikayuutngungaituten,

³⁴tau͡gaam ikayurciqerpenga wani-wa ut'reskuvet nunarpagmun qanrulluku-llu Absalom-aaq kevgiurciqniluku piciuluten atii kevgiullrucirpetun. Pitacirpetun-llu akiurluki aturpek'naki picirkiutet Ahithophel-aam ellimerrutai.

³⁵Agayulirtek Zadok-aankuk Abiathar-aq-llu tuanciiquk; qanrutaqlukek piniagken canek tamalkuitnek niitellerpenek angayuqam atanruviani.

³⁶Tamarmek qetunratek Ahimaaz-aq Jonathan-aaq-llu nunaqliqakek, wangnun taicet'larniaten tamalkuita nallunrilten elkegnun.”

³⁷Tua-i Hushai-aq, David-aam yugnikek'ngaa, utertuq nunarpagnun Absalom-aaq tekiteqanrakun.