Read Yupik 2 Samuel 17 Bible Online

2 Samuel 17 - Yupik bible

2 Samuel 17

¹Tamatum kinguani akaurpailgan, Ahithophel-aam qanrutaa Absalom-aaq, “Cucukliqatartua qula malrugnek cipluku tiissitsaanek (12,000) angutnek, tua-i-llu ataku ayagluta David-aaq kingunrirturluku.

²Curugciqaqa mernullran cayuumiitellran-llu nalliini. Alingeciquq cakneq, anguyagtai-llu tamarmeng qimagciqut. Kiingan angayuqaq tuquciiqaqa

³tailluki-llu tamalkuita anguyagtai elpenun, uingnerrartun arnatun utertellriatun uiminun. Tuqucugan atauciq angun; yuut ilai qaillun pimangaitut.”

⁴Man'a assilriarungatuq alerquun Absalom-aamun tamalkuitnun-llu Israel-aam yuin ciuliqagtaitnun.

⁵Absalom-aaq qanertuq, “Kitaki Hushai-aq qayagaurluku, niitniaput elliin qanerkaa.”

⁶Hushai-aq tekican, Absalom-aam qanrutaa, “Uumek pisqutmek Ahithophel-aam cikiraakut; maligglaut-qaa? Pingailkan, elpet qanruskut qaillun pillerkamten̄ek.”

⁷Hushai-aq kiuguq, “Watua Ahithophel-aam alerquutii elpecen̄un assinrituq.

⁸Nallunritan elpet aatan, David-aaq, anguyagten̄i-llu tukniluteng callugten͞guciat alingnaqsugngaciat-llu taqukatun irniaminek teguimalriatun. Aatan elisngaqapiarluni anguyagten͞guuq unugmi-llu anguyagten̄i ilagayuunaki.

⁹Wanirpak-llu tayima aipaagni tegalqum qerranquani iirumauq wall'u allami. Egmian David-aam curuuciatun anguyagteten, kinkut niitellriit qanerciqut anguyagteten ak'a cirlakumaniluki.

¹⁰Tua-i-llu cacetulriarung'ermeng-llu anguyagtet, alingilnguunger'meng-llu yugtutulitun, alingeciqut tamarmeng Israel-aami nallunrilamegteggu atavet nangrunaunani anguyagten͞gucia anguyagtai-llu tukniluteng callugten͞guciat.

¹¹Wiinga pisqutkaqa elpenun quyurcesqelluki Israel-aam yui nunam uitavimta iquanek ayagluki akillilluku; amllertaluteng imarpiim cen̄iin qau͡gyaatun, elpenun-llu tungaunak ciuliqagcesqelluki anguyagmun.

¹²Nataqeciqerput David-aaq nanlengraan, nalluani-llu curugluku. Ellii anguyagten̄i-llu anagngaitut.

¹³Qimakan nunarpagmun, yup'ut ilavkugnek tailluteng qamurciqaat nunarpak atraulluku unavet kuignayugmun. Teggalqurrartairulluku qemim qainga.”

¹⁴Absalom-aaq tamarmeng-llu Israel-aam yui qanertut, “Picirkiutii Hushai-am assinruuq Ahithophel-aam pillrani.” ATANEQ picirkirtuq Ahithophel-aam assilria picirkiutekellra maligcesqevkenaku, arenqiallugun tuc'esqelluku Absalom-aamun.

¹⁵Tua-llu Hushai-am qanrutak agayulirtek Zadok-ankuk Abiathar-aq-llu qaillun pisqellerminek Absalom-aaq Israel-aat-llu yuita ciuliqagtait, qaillun-llu Ahithophel-aam pisqellrinek cali.

¹⁶Hushai-am-llu ilaluku, “Patagmek, wanirpak! Qanrucarturceciu David-aaq unugisqevkenaku kuiget qeraryaraitni yuilqumi, tau͡gaam egmian qeraasqelluku Jordan-aaq, ellii anguyagtai-llu teguluki tuqucimasqevkenaki.”

¹⁷Abiathar-am qetunraa Jonathan-aaq, Zadok-aam-llu qetunraa Ahimaaz-aq, utaqauk Enrogel-aam ulevlaani, elatiini Jerusalem-aam, kitumun tangrresqumavkenatek itertellutek nunarpagmun. Kevgam arnam akultutaciqeggluni qanrucarturaqlukek qaillun pilrianek, tua-i-llu elkenka ayaglutek qanrucarturluku Angayuqaq David-aaq.

¹⁸Tau͡gaam erenret iliitni tan'gaurluum tangerqerak, qanrulluku-llu Absalom-aaq; taumek cukangnaqlutek ayagtuk iiryarturlutek uum angutem eniinun Bahurim-aami. Elakarluni enemi canimelkiini, tuavet ek'uk.

¹⁹Angutem nulirra patukamek piuq, saggluku-llu tauna elakam painganun mukaarkanek-llu saggvikluku, kitumun tangertiinun nallunariluku.

²⁰Absalom-aam anguyagtai tekitut enemun aptaat-llu arnaq, “Nauwa Ahimaaz-ankun Jonathan-aaq-llu?” “Kuik qerallruak,” ellii kiuguq. Anguyagtet yuaryaaqakek tau͡gaam nataqenritakek, tua-i-llu uterrluteng Jerusalem-aamun.

²¹Ayaumariata, Ahimaaz-ankuk Jonathan-aaq-llu nuglutek elakamek, ayaglutek qanemciyarturtuk Angayuqamun David-aamun. Qanrutaak qaillun Ahithophel-aam pillerkiullranek elliin tungiinun qanerlutek-llu, “Cukangnaqluten qerarru kuik.”

²²Tua-i David-aaq anguyagten̄i-llu qerartut Jordan-aakun, erqaarallrani-llu nangluteng tamarmeng qeraumariluteng.

²³Ahithophel-aam tangrramiu picirkiutmi atuumanritellra, ciulvani aqumvilirluku utertuq nunaminun. Caliarkani elluarqaarluki, ellminek agartuq. Qunguutaat-llu nakmiin ilain qungurviatnun.

²⁴David-aaq tekitellruuq nunarriinun Mahanaim-am Absalom-aam Israel-aam-llu yuin qerallrata nalliini Jordan-aaq.

²⁵(Absalom-aam Amasa ellillrua ciuliqagcesqelluki anguyagtet Joab-aq enaiqertelluku. Amasa Jether-aam qetunraqluku Ishmaelite-am; aanii Abigail-auluni, Nahash-am panikluku Joab-am-llu aaniin Zeruiah-m nayagaqluku.)

²⁶Absalom-aaq anguyagten̄i-llu pelatekiurluteng qavartartut nunami Gilead-aami.

²⁷David-aaq tekitellrani Mahanaim-amun, Shobi-m Nahash-am qetunraan ciuniuraa, nunarpiinek Rabbah-m kingunerluni Ammon-aami, cali-llu Machir-aam Ammiel-aam qetunraan, Lodebar-armium, Barzillai-am-llu, Rogelim-aarmium Gilead-aami.

²⁸Taitut qantanek, egatnek qikunek, inarvigkaitnek-llu, neqkanek-llu David-aamun anguyagtainun-llu: mukaarkanek, barley-nek, meluyaarnek, kelipimalrianek grain-anek, papinek, peas-aanek, yuilqurmiutarmek paatakaamek, cheese-amek, milegmek, qusnginek-llu. Nalluvkenaku David-aaq anguyagten̄i-llu kaigarkauciat, meqsugluteng, mernuluteng-llu yuilqumi.