Read Yupik 2 Samuel 19 Bible Online

2 Samuel 19 - Yupik bible

2 Samuel 19

¹Qanrutaat Joab-aq Angayuqaq David-aaq aluviliurluku angniitniluku Absalom-aamek picirluku.

²Tua-i-llu angnillrat cirlakillermeggnek picirluteng mumigtuq angniitmun tamarmeng David-aam anguyagtainun taumi ernermi, niicameng angayuqaq angniitniluku qetunrani pitekluku.

³Utertut nunarpagnun nepaunateng, anguyagtet kasnguyulauciicetun anguyalrianek qimagaullret.

⁴Angayuqam kegginani patuluku qiaguq qastuluni, “Qetunramaa! Qetunramaa, Absalom-aaq! Absalom-aaq, qetunramaa!”

⁵Joab-aq ag'uq angayuqam eniinun qanrulluku-llu, “Ernerpak umyugait atrartaten anguyagtevvet, anguyagtet unguvavnek anirturillret, qetunrarpet panivet-llu unguvaitnek nuliarpet-llu nulirruarpet-llu.

⁶Pairtaten kenkesteten ikayurluki-llu eq'ukesteten! Nallunairiuten anguyagtevvet atanerruarit anguyagteten-llu elpenun caunriluciat. Tangrraqa angniryaucin Absalom-aaq ernermi mat'umi unguvakan wangkuta tau͡gken tuqullruluta.

⁷Taumek wanirpak ayii caceturrluki-llu anguyagteten. Nallunairiunga ATANREM atrakun pinrilkuvki, atauciunger'mi iliita nayurngaitaaten unuakuq tekilluku. Tauna assiitellriit arcaqanqeciqaat nangteqlerpet yuurqaanerpenek.”

⁸Tua-llu angayuqaq nangertuq, anluni-llu aqumuq nunarpiim ikirtuqain yaaqsinrilkiitnun. Anguyagtain niitaat tuanetniluku, tamarmeng-llu quyurtut avatiinun. Mat'um nalliini Israel-aam yui qimagallruut nakmiin nunameggnun.

⁹Nunameggni tamarmeng kiutaagut'ngut ilameggnun. “Angayuqam David-aam aviutellruakut inglumten̄ek,” qanraqluteng ilameggnun. “Anirtullruakut Philistine-anek, tau͡gaam qimagtuq Absalom-aamek nunavut-llu unilluku.

¹⁰Atawaqercetellruarput Absalom-aaq angayuqaqsagulluku, tau͡gaam tuqutaullruuq anguyagmi. Ciin-mi tua-i wani-wa kia ut'rutengnaqenritau Angayuqaq David-aaq?”

¹¹Qanemcim qaillun Israel-aam yuin qalartellratnek tekitaa Angayuqaq David-aaq. Tua-i ayagcetak agayulirtek Zadok-ankuk Abiathar-aq-llu apcesqelluki ciuliqagtai Judah-m, “Ciin kinguqlikacagaulutek ikayuucetek angayuqam ut'rutlerkaanun atanruvianun?

¹²Elpeci wiinga ilakamci, nakmiin kemellgutekluci, aullgutekluci-llu; ciin kingumek ut'rutengnaqucetegnga?”

¹³David-aam cali qanrutak waten qanresqellukek Amasa-mun, “Ilakutaqamken. Wak'nirnek ayagluten ataniumasqanka elpenun anguyagtenka Joab-aq enaiqerluku. Agayutem yaggviklua tuquskilia watnanrilkuma!”

¹⁴David-aam qanellrin ukverrluki piciuluki tuigcetai tamalkuita Judah-m anguyagtai, qanrucarturcetaat-llu utercesqelluki, tamalkuita-llu atanerruari malikluki.

¹⁵Uterrnginanermini angayuqaq anguyagtainek Judah-m pairkenguq Jordan-aam Kuigani, taillret Gilgal-aamun qeraucarturluku kuigkun qerallrani.

¹⁶Taum-llu nalliini, Benjamin-aam yuinek, Shimei-aq qetunraa Gera-m Bahurim-aarmiu, cukangnaqluni ayagtuq Jordan-aamun pairrsaagluku Angayuqaq David-aaq.

¹⁷Maligluni anguyagten̄ek tiissitsaanek (1,000) Benjamin-aam ilakellriarinek. Ziba-llu, pistiit Saul-aam nakmiin ilain, maligutuq qetunraminek akimiarnek yuinarnek-llu (20) pistem̄inek maligluni, tekilluteng-llu Jordan-aamun angayuqam ciungakun.

¹⁸Qeraraat-llu kuik ikayurluki qerautnaluki Angayuqaq ilai-llu qerallratni angayuqam-llu cat piyullri pinaluki. Angayuqaq-llu uptellrani qeraqatarluni, Shimei-aq ciktuq ciuqerranun

¹⁹qanerluni-llu, “Elpet Ucurnarqellriami, kitaki nalluyaguteqerr'u picurlalqa tuani ernermi ayautevni Jerusalem-aamek. Wangnun tauna ellimauranrirluku umyuaqenrirluku-llu.

²⁰Nallunritaqa, wiinga assiilngilqa, man'a-llu pitekluku ciuqlirnun ilautua tailrianun negeqlirnek ilakutellrianek paiqertevnun ernerpak, Elpet Ucurnarqellriami.”

²¹Abishai-aq qetunraa Zeruiah-m qanertuq, “Shimei-aq tuqutnarquq elliin aniqlaallruaku ATANREM cucukellra angayuqausqelluku.”

²²Tau͡gaam David-aaq qanertuq Abishai-amun anelgutiinun-llu Joab-amun, “Kia umyuarteqlerpenek aptaten? Picurlagcetaaqatararpenga-qaa? Wiinga wani-wa atanrulriarurtua Israel-aami, ernerpak-llu kina Israel-aam yua tuqutaungaituq.”

²³Cali-llu qanertuq Shimei-amun, “Qanrutamken elpet tuqutaungaituten.”

²⁴Tua-llu Mephibosheth-aaq, Saul-aam tutgarii, atrartuq paiqerluku angayuqaq. It'gani eruqsaitai, ungani-llu engelkegteksaunaki, aturani-llu iqaiqsaunaki ayaggaanranek angayuqaq Jerusalem-aamek utertellra cirlakillminek tekilluku.

²⁵Mephibosheth-aaq tekican Jerusalem-aamek paiqerluku angayuqaq, angayuqam qanrutaa, “Mephibosheth-aaq, maligtellrunritarpenga. Ciin pillrunricit?”

²⁶Kiuguq, “Nallunrilucirpetun, Elpet Ucurnarqellriami, wiinga tussitua. Pillruyaaqaqa pisteka aqumgavia ciulviim ellisqelluku ekumalua maliggnaluten, tau͡gaam narurtellruanga.

²⁷Iqluurutkellruanga Elpenun Ucurnarqellriamun, tau͡gaam elpet ayuquten Agayutem an'gilaatun, taumek assikellren kiiki maligesgu.

²⁸Tamarmeng atama nakmiin ilai tuqucimanaqsaaqut, Elpet Ucurnarqellriami, tau͡gken elpet piunarqucimek cikiravnga nerellguciisqelluten estuuluvni. Wiinga camek allamek apcunaitamken ikayurcetaarutmek, Elpet Ucurnarqellriami.”

²⁹Angayuqaq kiuguq, “Camek allamek qanenermek taqnariaten. Wiinga pillerkiullruunga elpetegnun Ziba-llu tamarpetegnun pikesqelluku Saul-aam nunautii.”

³⁰“Tamalkuan Ziba-mun pikevkarru,” Mephibosheth-aaq kiuguq. “Wangni amllertuq, Elpet Ucurnarqellriami cavkenak utertellren.”

³¹Barzillai-aq-llu, Gilead-aarmiu, atrallruuq Rogelim-aamek ikayurluku maligcarturluku angayuqaq qerallrani Jordan-aakun.

³²Barzillai-aq angulluapiartuq, allrakungluni yuinarnek cetamanek (80). Tukuuqapiarluni angayuqaq-llu neqkiumallruluku Mahanaim-aamtellrani.

³³Angayuqam qanrutaa, “Maligesnga Jerusalem-aamun, aulukniamken.”

³⁴Tau͡gaam Barzillai-aq kiuguq, “Wiinga unguvamangairutua; ciin wiinga maligciiqsia, Elpet Ucurnarqellriami, Jerusalem-aamun?

³⁵Ak'a allrakungua yuinarnek cetamanek (80), camek-llu wangni anglanarqellriartairulluni. Nerellrenka mellrenka-llu elpegciyuirutanka, aturtet-llu erinait niicuirulluki. Kiingan cakviurutnguciqua Elpenun Ucurnarqellriamun.

³⁶Wiinga nunuliutmek angtuamek pinarqenritua. Taumek kiingan kituqerluku Jordan-aaq maligarciiqamken.

³⁷Nutaan utercetniarpenga nunamnun tuquniartua-llu angayuqaagma qungugken mallgeskiigni. Wani-wa tang qetunraqa Chimham-aq, kevgiurtekan, malikiu, Elpet Ucurnarqellriami, aulukniaran assikellerpegun.”

³⁸Angayuqaq-llu kiuguq, “Malikeciqaqa pisqumallerpegun-llu aulukluku. Ca-llu tamalkuan pisqellren wii piciqaqa.”

³⁹Tua-i-llu David-aam tamarmeng-llu anguyagtain qeraraat Jordan-aaq. Cingaraa Barzillai-aq atawaqertelluku-llu, Barzillai-aq-llu utertuq kingunerminun.

⁴⁰Angayuqaq qeraumariami, ikayurluku Judah-m yuin tamarmeng Israel-aam-llu yuin avgin, ciumutmun ayagtuq Gilgal-aamun, Chimham-am-llu maligtaa.

⁴¹Tua-llu tamarmeng Israel-aam yuin ullagaat angayuqaq qanerluteng-llu elliinun, “Elpet Ucurnarqellriami, ciin anelgutput Judah-m anguyagtai umyuarteqat ayaucugngariluten ikayuryugngariluten, nakmiin-llu ilaten, anguyagteten-llu qeraulluci Jordan-aakun?”

⁴²Judah-m anguyagtain kiugaat, “Watnallruukut angayuqaq ilakngamteggu. Ciin mat'um eq'uqercetaci? Neqkaput akiliuteksaitai wall'u camek cikiqsaunata.”

⁴³Israel-aam yui qanertut, “Wangkuta qula naaluku piyunarqucingqenruukut Angayuqamun David-aamun elpecen̄i, ilakeng'e'rpeciu. Ciin caunrilleksecikut? Nalluyagucaqunaku wangkuta ciumek qalarutkellerput angayuqaq ut'rutengnaqnaluku!” Tau͡gaam Judah-m anguyagtai alingnartaarluteng piyunarqucingqenruniut anguyagtaini Israel-aam.