Read Yupik 2 Samuel 2 Bible Online

2 Samuel 2 - Yupik bible

2 Samuel 2

¹Mat'um kinguakun, David-aam aptaa ATANEQ, “Ayaglii-qaa nunain iliitnun Judah-m?” “Aa-ang,” ATANEQ kiuguq. “Naliat?” David-aaq aptuq. “Hebron-aaq.” ATANEQ qanertuq.

²David-aaq tua-i ayagtuq Hebron-aamun, maliklukek malruk nuliagni: Ahinoam-aaq, Jezreel-armiulleq, Abigail-aq-llu Nabal-am aipainra, Carmel-aarmiulleq.

³Cali-llu malikai anguyagten̄i nakmiin-llu ilait, nunalgarrluteng-llu nunarrarnun Hebron-aam avatiinun.

⁴Tua-i-llu Judah-m yui tekilluteng Hebron-aamun uqumek mingugaat David-aaq angayuqaurrluku Judah-mun. Niitellermini David-aaq yugnun Jabesh-aami Gilead-aamelngurmi tungmagtellrucia Saul-aaq,

⁵ayagceciuq anguyagtet ilaitnek qanerkirluki: “ATANREM atawaqertellici qigcikucirci angayuqerpecen̄un manillerpecen̄ek tungmagtellerpeciuggun.

⁶Watua-llu ATANREM nakleklici piciuli-llu elpecen̄un. Wiinga-llu assirluci piciqamci watnalci pitekluku.

⁷Piniqici cacetuluci-llu! Angayuqerci Saul-aaq tuquuq, yuin-llu Judah-m uqumek mingullruatnga ellaita angayuqaqsagullua.”

⁸Atanerruarat Saul-aam anguyagtain, Abner-aaq qetunraa Ner-am, qimallruuq Saul-aam qetunraanek Ishbosheth-amek maligluni Jordan-aam akianun Mahanaim-amun.

⁹Tuani Abner-aam angayuqrurtaa Ishbosheth-aaq nunautainun Gilead-aam, Asher-aam, Jezreel-am, Ephraim-aam, Benjamin-aam-llu, tamiini-llu Israel-aami.

¹⁰Ellii yuinaagnek malrugnek (40) allrakungellruuq angayuqrurtellermini Israel-aamun, atanirturiluni-llu allrakugni malrugni. Tau͡gaam yuullgutkellriari Judah-m maligtaat David-aaq,

¹¹atanirturaa-llu Hebron-aamlluni tamalkuan Judah malrunlegni avegmek cipluku allrakuni.

¹²Abner-aaq atanerruari-llu Ishbosheth-aam ayagtut Mahanaim-amek nunarpiinun Gibeon-aam.

¹³Joab-aq, aanalek Zeruiah-mek, allat-llu David-aam anguyagtain atanerruarin paiqerait nanvarra'armi, tuani-llu tamarmeng aqumut, Israel-aam yui ukalirnermun Judah-m-llu yui akilirnermun.

¹⁴Abner-aaq qanertuq Joab-amun, “Kitaki yun'erraat ilait akiqliitnun saskutgun anagtassiigutevkaqerlaut.” “Kitaki,” Joab-aq kiuguq.

¹⁵Tua-i qula malrugnek cipluku (12) angutet, Ishbosheth-aamek ilakellriartain Benjamin-aam, callugait qula malrugnek cipluku David-aam yui.

¹⁶Tamarmeng ingluteng qamiqurritgun tegularait kap'lerulluku-llu nuussirpani caniqerranun inglumi, tua-i yuinaq cetamanek cipluku (24) tamarmeng iquut tuquluteng ataucikun. Taumek nuna tauna Gibeon-aami atengqellria “Nuussirpiit Nuniit.”

¹⁷Tua-llu tuknilria anguyak ayagnirtuq, Abner-aaq-llu Israel-aam-llu yui cirlakait David-aam anguyagtain.

¹⁸Pingayun qetunrai Zeruiah-m tuantut: Joab-aq, Abishai, Asahel-aaq-llu. Asahel-aaq, aqvaquryugngalriim cukataluni yuilqurmiutartun tuntutun,

¹⁹malirqeraa Abner-aaq, aqvaqurluni ciuneqluku ullagluku.

²⁰Abner-aaq kingyarluni qanertuq, “Elpenguuten-qaa, Asahel-aaq?” “Aa-ang,” kiuguq.

²¹“Malirqanrilnga!” Abner-aaq qanertuq, “Malirqerru anguyagtet iliit teguluku-llu ca tegumiara.” Tau͡gaam Asahel-aam taqevkenani malirqeraa.

²²Pulenglluni Abner-aam qanrutaa, “Malirqaranrirnga! Ciin tuqucetengnaqu'urcit wangnun? Qaillun tangerrsugngaciqsia anelguten Joab-aq?”

²³Tau͡gaam Asahel-aaq taqsunrituq; tua-i Abner-aam, tunutmun kap'lerulluku narulkarcuutni, aqsiigken'gun nall'artaa narulkarcuun tunuakun anqertelluku. Asahel-aaq-llu nunamun ayaluqertuq tuquluni, tamarmeng-llu tuavet tekitellriit taklavianun arulairluteng tuavet nangengqalartut.

²⁴Tau͡gaam Joab-ankuk Abishai-aq-llu kingunrirturaak Abner-aaq, akertem-llu tevillrani tekituk qemianun Ammah-m, keggaknelirneranelnguum Giah-m tumyaraani yuilqurtaanun Gibeon-aam.

²⁵Angutet ilakellgutkelriartainek Benjamin-aam quyurtut Abner-aam avatiinun ataam nangerrluteng-llu qemim kangranun.

²⁶Abner-aaq qayagaurtuq Joab-amun, “Callugturqatartukut-qaa imumirpak? Tangerciigatan-qaa iquani neqnialngurtun ayuqerkaucia? Wangkuta ilakutaqavkut. Qaku anguyagteten alerquqatarciki malirqanermek taqesqelluta?”

²⁷“Piciulua qanertua unguvalriakun Agayutkun,” Joab-aq kiuguq, “qanenrilkuvet, anguyagtem̄a malirqerturyaraatgen unuakuurrnatkaanun.”

²⁸Tua-llu Joab-am cupu'uryaraq cupaa nallunailkutaqluku arulairesqelluki kingunrirtunermek Israel-aam yui; tua-i-llu anguyallrat arulairtuq.

²⁹Abner-aaq anguyagten̄i-llu eglertut Jordan Valley-kun taumi unugmi; qerarluku Jordan-aaq Kuik, eglerqaarluteng-llu unuaquan unuakumi, tekitut kingunermeggnun Mahanaim-amun.

³⁰Joab-am taqngameng malirqanermek, yun'i tamalkuita quyurtai nallunrirluni-llu yuinaunritaraan cataitellinilriit, ilaluteng Asahel-aamek.

³¹David-aam anguyagtain tuqutellrulliniit yuinaat akimiaret yuinarnek pingayunek cipluki (360) Abner-aam yui ilakellgutkelriarinek Benjamin-aam.

³²Joab-am anguyagten̄i-llu teguat Asahel-aam temii tungmaggluku-llu ilakellriit tungmagciviatnun Bethlehem-aami. Egilraurluteng-llu unugpak erqaarallrani-llu kingunilluteng Hebron-aamun.