Read Yupik 2 Samuel 20 Bible Online

2 Samuel 20 - Yupik bible

2 Samuel 20

¹Gilgal-aami yugtangqelliniuq cakegtakumanrilngurmek yugmek aterluni Sheba-mek qetunraanek Bikri-m, ilakellriartainek Benjamin-aam. Cupsaraq cupluku qayagaurauq, “Atrarli David-aaq! Maliggngaitarput! Anguyagtaini Israel-aam, kingunemten̄un uterrnaurtukut!”

²Tua-i Israel-aam yuin yuirautaat David-aaq maliggluku-llu Sheba, tau͡gaam Judah-m anguyagtai cakanirpek'nateng maligtaat David-aaq Jordan-aamek ayagluteng Jerusalem-aamun.

³David-aaq tekicami atanruviminun Jerusalem-aami, qulen nulirruani tegui unitellni atanruvini aulukesqelluku murilkescirluki-llu. Aturyuk'ngait-llu pikirluki, tau͡gaam tutegpek'naki. Unguvameng taktaciatun kelucausngaluteng, aipainertun ayuqluteng.

⁴Angayuqaq tua-llu qanertuq Amasa-mun, “Judah-m anguyagtai quyurceski malikluki maanetniartuci amatiiku.”

⁵Amasa ayagtuq quyurcarturluki, tau͡gaam angayuqam pillerkillra tamaancesqelluki nall'artenritaa.

⁶Tua-i angayuqaq qanertuq Abishai-amun, “Sheba-m picurlagcetenruciqaakut Absalom-aami. Malikluki anguyagtenka kingunrirturru, pengegnaircaumalriit nunat piksagucuarai anagluni-llu wangkutnek.”

⁷Taumek Joab-am anguyagtai, angayuqam-llu nayurtai, tamarmeng-llu allat anguyagtet ayagtut Jerusalem-aamek Abishai-aq pillgucirluku kingunrirturnaluku Sheba.

⁸Tekiteqertelluki teggalqurpagmun Gibeon-aami, Amasa-m pairtai. Joab-aq upingaluni anguyagcuutnek aturluni, nuussirpii caqumini qungasngaluni naqugutiinun qillrusngaluni. Ciutmurteqanrakun, nuussirpak igtuq.

⁹Joab-aq qanertuq Amasa-mun, “Qaillun ayuqsit, yugnikekmaa?” teguluku-llu ungaikun tallirpilernerkun unatmikun cingarnaluku.

¹⁰Amasa-q keltevkenani Joab-am tegumiaranek nuussirpagmek unatmi ingluanek, Joab-am-llu kap'leraa aqsiigken'gun, cakungllui-llu maq'errluteng nunamun. Egmian-llu tuquuq, Joab-am-llu yaggvikenqigtevkenaku. Tua-i-llu Joab-ankuk anelgutni-llu Abishai-aq ayagtuk kinguakun Sheba-m.

¹¹Joab-am anguyagtain iliit nangerrluni Amasa-m temiin canianun qayagpagtuq, “Kina imna Joab-ankugnun David-aaq-llu ilauyulria maliggliu Joab-aq!”

¹²Amasa-m temii, auguluni, nevengqauq tumyaram qukaani. Joab-am anguyagtiin tangrrai yuut tamarmeng arulairturalriit tuavet, taumek qamuraa temii tumyaramek cailkamun maavet patuluku-llu uligmek.

¹³Tema au͡gaumarian tumyaramek, yuut tamarmeng maligtaat Joab-aq malirqerluku Sheba.

¹⁴Sheba-m tumkaa nunautiit ilakellriartain Israel-aat tekilluni-llu nunarpiinun Abel Beth Maacah-m, tamarmeng-llu tungayai Bikri-m quyurtut maliggluku-llu itellrani nunarpagmun.

¹⁵Joab-am anguyagtain niitaat Sheba tuanetniluku, tua-i ullagluku kassugutaat nunarpak. Quyurciut-llu nunamek elalirnerani casgum acilirnerakun-llu cali casgum elagluteng ayaluqercetengnaqluku.

¹⁶Umyuartulriamek-llu tuani nunarpagni arnartangqertuq qayagaurauq-llu casgumek, “Kaaka, kaaka! Qanruciu Joab-aq wavet taisqelluku; qanelguteksugaqa.”

¹⁷Joab-am tua-i ullagaa, arnam-llu aptaa, “Joab-auguten-qaa?” “Aa-ang, taunguunga,” ellii kiuguq. “Niicugninga wiinga,” arnaq qanertuq. “Niicugniunga,” elliin kiugaa.

¹⁸Arnaq qanertuq, “Akaar imumi waten qanlallruut, ‘Ayagluten kiutekan niicarturru nunarpagmi Abel-aami,’ tuaten-llu tua-i piyarturaqluteng.

¹⁹Wangkuta nunarpagput assipiartuq, ilakluku qinuilnguut piciulriit-llu Israel-aami. Ciin navgungnaqsiu? Piunrircugan-qaa ATANERMEK pikestelek?”

²⁰“Tuaten pingaitqapiartua!” Joab-aq kiuguq. “Watqapik piunrirngaitaqa wall'u navgurngaitaqa nunarpagci!

²¹Tamana pillerkiuraqenritarput. Angun aterluni Sheba-mek qetunraa Bikri-m, kingunelek qemililriamek nuniinek Ephraim-aam, ayagnercillruuq inglulilluni Angayuqamun David-aamun. Una angun atauciq taiciu wangnun, nunarpagmek ayagniartua.” “Egciiqaput qamiqurra casgum quliikun elpenun,” arnaq qanertuq.

²²Tua-i-llu ayagluni pillerkiurani qanrutkaa nunarpiim yuinun, Sheba-m-llu qamiqurra kepluku egtaat casgum quliikun Joab-amun. Cupsaraq-llu cupluku elpengcarai anguyagten̄i nunarpagmek ayaasqelluki, tua-i-llu uterrluteng kingunermeggnun. Joab-aq-llu uterrluni Jerusalem-aamun angayuqamun.

²³Joab-am ataniumai anguyagtai Israel-aam; Benaiah-m-llu qetunraan Jehoiada-m ataniumaluki David-aam nakmiin nayurtai;

²⁴Adoniram-aaq-llu qaunqesten͞guuq umyuarteng aturpek'naku calivkaumalrianun; Jehoshaphat-aq qetunraa Ahilud-aam igarten͞guluni;

²⁵Sheva qanercetaarviim igartekaa; Zadok-ankuk Abiathar-aq-llu agayulirten͞gulutek,

²⁶Ira-llu nunarriinek Jair-am ilakaat David-aam agayulirtain.