Read Yupik 2 Samuel 21 Bible Online

2 Samuel 21 - Yupik bible

2 Samuel 21

¹David-aam angayuqrullran nalliini kainiqerpagtut allrakut pingayun naaluki. Tua-i David-aam ATANERMUN qalarutkaa, ATANEQ-llu qanertuq, “Saul-aaq nakmiin-llu ilani pinarqutengqertut tuqucillermeggnek; tuqurqellrui Gibeon-aam yui.”

²(Gibeon-aam yui Israelite-aunritut; amllerpek'nateng quyungqalriaruut Amorite-auluteng Israel-aam yuin akqellri murilkelarciqniluki, tau͡gaam Saul-aam piunrirtengnaqellruyaaqluki cumigtellni niilluku ikayurnaluki Israel-aam yui Judah-m-llu.)

³Tua-i David-aam taisqai Gibeon-aam yui qanrulluki-llu, “Camek wangnun pisqumaceci? Picurlaumallerci assirikaniircecugyaaqaqa, atawaqercecesqelluki elpecen̄un ATANREM yui.”

⁴Kiugut, “Wangkuta umyuarput assiinaku kiutaarutelput Saul-aamun nakmiin-llu ilainun qerrirliq wall'u suulutaaq aturluku elluaringaituq, tuquciyuumiinata-llu Israelite-at iliitnek.” “Camek tua-llu umyuarteqceci casqumaluci wangnun?” David-aaq aptuq.

⁵Kiugut, “Saul-aam piunrircullruakut ilaput ataucirraungraan unguvasqumavkenaku Israel-aami.

⁶Taumek wangkutnun taiski malrunlegen angutet kinguvri, agarrniaput ATANREM ciuqerrani Gibeah-mi, nakmiin nuniini Saul-aam, ATANERMEK nakmikumalriim angayuqam.” “Taiciiqanka,” angayuqaq kiuguq.

⁷Tau͡gaam qigcignarqellriamek atunem akqillertek Jonathan-aaq-llu pitekluku, David-aam ilakevkanritaa Jonathan-aam qetunraa Mephibosheth-aaq, tutgarii Saul-aam.

⁸Tau͡gaam teguak Armoni-nkuk Mephibosheth-aaq-llu, malruk qetunraak Rizpah-m, Aiah-m panian Saul-aamun irnillrek; talliman-llu cali qetunrai Saul-aam panian Merab-am irnillni Adriel-aamun Barzillai-am qetunraanun, Meholah-rmium.

⁹David-aam tunai yuinun Gibeon-aam, taukut-llu agartait ingrimun ciuqerrani ATANREM, tamarmeng-llu malrunlegen tuquut quyurmeng. Tuani up'nerkaq iquklicartullruluni, ayagniqanrakun barley-nek quyurciyaraq, tuani tuqutaullratni.

¹⁰Tua-llu Saul-aam nulirruara Rizpah, pania Aiah-m, missuullermek aturluni uqruciurtuq teggalqum qaingani temaita tuqumalriit uitaviatni, tuanlluni-llu quyurciyaram ayagnillranek ayagluni uksuarmi ellallirturalallra tekisvianun. Erenrani yaqulget ayalegtelarai taukunun tuqumalriit temaitnun, tuamta-llu unuan yuilqurmiutarnun ungungssinun pillerkaat murilkelaraa.

¹¹David-aam niicamiu Rizpah-m tuatnallra,

¹²ayagtuq Saul-aam-llu enri teguluki qetunraan-llu Jonathan-aam Jabesh-aam yuinek Gilead-aami. (Teglegaqellruit nunat quyurrviatnek Beth Shan-ami, Philistine-at temnek agarcivillratnek taumi ernermi tuqutellermeggni Saul-aaq Ingrimi Gilboa-mi.)

¹³David-aam tegui Saul-aankuk Jonathan-aaq-llu enkek cali-llu quyurrluki enrit malrunlegen angutet agarcimallret.

¹⁴Elautait-llu Saul-aam Jonathan-aam-llu enri qunguanun Saul-aam atiin Kish-am, Zela-mi nunautiini Benjamin-aam, angayuqam pisqellra tamalkuan maliggluku. Taum-llu kinguani, Agayutem piicautait kiugai nunateng pitekluku.

¹⁵Allamek cali anguyagtut Philistine-at Israel-aat-llu, David-aankut-llu anguyagten̄i-llu ayagtut callugluki-llu Philistine-at. Callugpiinret iliitni David-aaq mernunguq.

¹⁶Yugpak aterluni Ishbibenob-aamek, tegumialek punernermek narulkautamek uqamarluni uspernek malrunlegnek avegmek cipluku, nutaramek-llu nuussirpakegciluni, umyuartequq David-aaq tuqucugngayukluku.

¹⁷Tau͡gaam Abishai-aq, qetunraa Zeruiah-m, taiguq ikayurnaluku David-aaq, curukaraa-llu yugpak, tuqulluku-llu. Tua-i-llu David-aam anguyagtain David-aaq akqivkaraat maligtenqigtarkaunrirtelluteng anguyagmun. “Israel-aarmiut ciunerkameggnun cacetuqutekaatgen, wangkuta-llu ilakenriryuumiitamteggen,” ellait qanerluteng.

¹⁸Taum kinguani cali anguyagtut Philistine-anek Gob-ami, tuani-llu Sibbecai-aq Hushah-rmiu tuquciuq yugpagmek at'legmek Saph-amek.

¹⁹Cali tuamtellu anguyagluteng Philistine-anek Gob-ami, Elhanan-aam-llu qetunraan Jair-am Bethlehem-aarmium, tuqutaa Goliath-aaq Gath-armiu, taum narulkautaan epua ellegtaluni tupigluki ulilistet teguyaraatun.

²⁰Ataam cali allamek anguyagtut Gath-ami, yugpagtarluni tuani callugyunqellriamek. Unatek inglugtun yuararlutek arvinlegnek it'gai-llu cali arvinlegnek putukurluteng inglugtun.

²¹Taum Israel-aam yui ingluliurai, Jonathan-aam-llu, David-aam anelgutiin Shammah-m qetunraan, tuqutaa.

²²Ukut cetaman kinguveqait yugpacaryuut Gath-armiut, tuqutait-llu David-aankut anguyagten̄i-llu.